ငလျင်ကြီးလှုပ်ရင် လူသုံးသိန်း သေဆုံးနိုင်တယ်လို့ ဂျပန် ခန့်မှန်း
တိုကျို၊ ဧပြီ ၂
ဂျပန်နိုင်ငံရဲ့ ပစိဖိတ်ကမ်းရိုးတန်းမှာ ကြီးမားတဲ့ ငလျင် လှုပ်ခတ်ရင် ဖျက်အားပြင်း ဆူနာမီလှိုင်းတွေ ဖြစ်ပေါ်လာနိုင်ပြီး နိုင်ငံ့စီးပွားရေး အနေနဲ့ ကန်ဒေါ်လာ ၁ ဒသမ ၈၁ ထရီလီယံ ဆုံးရှုံးနိုင်သလို အဆောက်အဦ ရာပေါင်းများစွာ ပြိုကျနိုင်တာကြောင့် လူ သုံးသိန်းလောက် သေဆုံးနိုင်တယ်လို့ မတ် ၃၁ ရက်မှာ ထုတ်ပြန်တဲ့ အစိုးရ အစီရင်ခံစာမှာ ဖော်ပြထားပါတယ်။
နိုင်ငံရဲ့ ပြည်တွင်း ထုတ်ကုန်တန်ဘိုး GDP ရဲ့ ထက်ဝက်နီးပါး ပမာဏ ဖြစ်တဲ့ ယန်း ၂၇၀ ဒသမ ၃ ထရီလီယံ (ဒေါ်လာ ၁ ဒသမ ၈၁ ထရီလီယံ) ဆုံးရှုံးမယ်ဆိုတဲ့ ခန့်မှန်းချက်ဟာ အရင်က ခန့်မှန်းထားတဲ့ ပမာဏထက် ပိုပြီး ခန့်မှန်းထားတာ ဖြစ်ပါတယ်။
ဂျပန်ဟာ ကမ္ဘာမှာ ငလျင်လှုပ်ခတ်မှု အများဆုံး နိုင်ငံတွေထဲက တစ်နိုင်ငံ ဖြစ်ပြီး ငလျင်ဇုန်အတွင်း ရစ်ချ်တာစကေး ၈ ကနေ ၉ အထိ အားပြင်းငလျင် လှုပ်ခတ်နိုင်ခြေ ၈၀ ရာခိုင်နှုန်း ရှိတယ်လို့ ဝန်ကြီးများရုံးရဲ့ အစီရင်ခံစာမှာ ဖော်ပြပါတယ်။
အဆိုးရွားဆုံး ဖြစ်နိုင်ခြေအနေနဲ့ ရစ်ချ်တာစကေး ၉ အဆင့်ရှိ ငလျင် လှုပ်ခတ်ခဲ့မယ်ဆိုရင် ဂျပန်နိုင်ငံ လူဦးရေ စုစုပေါင်းရဲ့ ၁ ရာခိုင်နှုန်း ဒါမှမဟုတ် လူပေါင်း ၁ ဒသမ ၂၃ သန်းကို ဘေးကင်းရာ ပြောင်းရွှေ့ပေးရမှာ ဖြစ်ပါတယ်။
ဆောင်းရာသီအတွင်း ညအချိန်မှာသာ ငလျင် လှုပ်ခဲ့မယ်ဆိုရင် လူပေါင်း ၂၉၈၀၀၀ အထိ သေဆုံးနိုင်တယ်လို့ အစီရင်ခံစာမှာ ဖော်ပြထား ပါတယ်။
ဂျပန်ရဲ့ ငလျင်ဇုန်ဟာ အနောက်တောင် ပစိဖိတ်ကမ်းရိုးတန်း အလွန်မှာ တည်ရှိပြီး ကီလိုမီတာ ၉၀၀ လောက် ရှည်လျားပါတယ်။
အဲဒီလို နေရာမှာ နှစ်ပေါင်း ၁၀၀ ကနေ ၁၅၀ လောက်ကြာတိုင်းကြီးမားတဲ့ ငလျင် လှုပ်ခတ်လေ့ရှိကြောင်း သမိုင်း အထောက်အထားတွေက ဖော်ပြနေပါတယ်။
၂၀၁၁ ခုနှစ်မှာ ရစ်ချ်တာစကေး ၉ အဆင့်ရှိ ငလျင် လှုပ်ခတ်မှုကြောင့် ဆိုးရွားလွန်းတဲ့ ဆူနာမီလှိုင်းတွေ ဖြစ်ပေါ်ခဲ့ပြီး နျူကလီးယား ဓာတ်ပေါင်းဖို သုံးလုံး အရည်ပျော်သွားပြီးနောက် လူပေါင်း ၁၅၀၀၀ သေဆုံးခဲ့ရပါတယ်။
