ပိတ်ဆို့မှုများကြောင့် ပို့ကုန်တင်ပို့မှု လျော့နည်းနေဟု နစကဥက္ကဋ္ဌပြော
ရန်ကုန်၊ မတ် ၁၇
မိမိတို့နိုင်ငံအပေါ် စီးပွားရေးအရ ပိတ်ဆို့မှုတွေ ရှိနေတာကြောင့် ပို့ကုန်တွေ တင်ပို့မှုလျော့နည်းလျက်ရှိကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က မတ်လ ၁၅ ရက်နေ့မှာ အေးရှားဝေါလ်ဆိပ်ကမ်းတံတားကို လာရောက်ကြည့်ရှုရင်း ပြောကြားခဲ့ပါတယ်။
ဒါ့ကြောင့် ရင်ဆိုင်ကြုံတွေ့နေရတဲ့ အခက်အခဲတွေ၊ ကန့်သတ်ချက်တွေကို ကျော်လွှားပြီး ပို့ကုန်တွေ ပိုမိုတင်ပို့နိုင်ရေး နည်းလမ်းတွေကို ရှာဖွေဆောင်ရွက်သွားဖို့ ညွှန်ကြားခဲ့ပါတယ်။
ပြည်တွင်းကုန်ထုတ်လုပ်မှုတွေကို တိုးမြှင့်ကာ ဈေးကွက်ရှိပြီးဖြစ်တဲ့ စိုက်ပျိုးရေးနဲ့ ပတ်သက်တဲ့ ထုတ်ကုန်ပစ္စည်းတွေကို ပိုမိုထုတ်လုပ် တင်ပို့နိုင်ဖို့ လိုတယ်လို့ ၎င်းက ဆိုပါတယ်။
ပို့ကုန်တွေ တိုးမြှင့်ရရှိရေးတွက် စိုက်ပျိုးရေးပန်းတိုင် ရည်မှန်းချက်အတိုင်း ထွက်ရှိအောင် ဆောင်ရွက်ဖို့လိုပြီး အထွက်နှုန်းကောင်းမွန်မှသာ ပြည်ပပို့ကုန်တွေလည်း တိုးတက်လာမှာဖြစ်တယ်လို့ နစကဥက္ကဋ္ဌက ဆက်ပြောပါတယ်။
ပြည်တွင်းက ထုတ်လုပ်တဲ့ စိုက်ပျိုးမွေးမြူရေးထုတ်ကုန်တွေ ပြည်ပတင်ပို့မှုအပေါ် ကန့်သတ်ထားတာမရှိလို့ လျင်မြန်ချောမွေ့စွာတင်ပို့နိုင်ရေး တာဝန်ရှိသူအဆင့်ဆင့်က အလေးထားဆောင်ရွက်ဖို့လည်း ညွှန်ကြားထားပါတယ်။
စီးပွားရေးလုပ်ငန်းရှင်ကြီးတွေနဲ့ ငွေကြေးခိုင်မာတောင့်တင်းတဲ့ လုပ်ငန်းရှင်တွေအနေနဲ့ စိုက်ပျိုးမွေးမြူရေးလုပ်ငန်းတွေနဲ့ ၎င်းကို အခြေခံထုတ်လုပ်တဲ့ ထုတ်ကုန်ပစ္စည်းထုတ်လုပ်ရေး လုပ်ငန်းကဏ္ဍတို့မှာ ဦးစားပေး ရင်းနှီးမြှုပ်နှံကြဖို့ တိုက်တွန်းထားပါတယ်။
သတင်း - BETV Business
