#နိုင်ငံတကာသတင်း
◼ဒရုန်းများကို သစ်သားအိမ်ငယ်အမိုးများထဲ ထည့်သယ်ပြီး ရုရှားလေတပ်စခန်းများကို ယူကရိန်းတိုက်ခိုက်ခဲ့
ဖောက်ခွဲရေး ပစ္စည်းများ တပ်ဆင်ထားသော ဒရုန်းများအား သစ်သားအိမ်ငယ်အမိုးများထဲတွင် ထည့်သွင်းသယ်ဆောင်သွားကာယူကရိန်းလျှို့ဝှက်ထောက်လှမ်းရေးအဖွဲ့ က ရုရှားလေတပ်စခန်းများရှိ မဟာဗျူဟာမြောက် ဗုံးကြဲလေယာဉ်ကြီးများကို တိုက်ခိုက်နိုင်ခဲ့ကြောင်း ယူကရိန်းအရာရှိတစ်ဦး၏ ပြောကြားချက်နှင့် အွန်လိုင်းပေါ် မှ ဓာတ်ပုံများအရ သိရသည်။
ယူကရိန်းပြည်တွင်းထောက်လှမ်းရေးအေဂျင်စီ(SBU) က ‘ပင့်ကူအိမ်’ ဟု အမည်ပေးထားသော တိုက်ခိုက်မှုအား ၎င်းတို့လုပ်ဆောင်ခဲ့ကြောင်း အတည်ပြုခဲ့ကာ အတိုင်းအတာတစ်ခုအထိ ပျက်စီးမှု ကြီးမားခဲ့ကြောင်း ပြောသည်။
ယူကရိန်း၏စစ်ဆင်ရေးအတွင်းသစ်သားအိမ်ငယ်များအား ထရပ်ကားများပေါ် တင်ဆောင်၍ လေဆိပ်များအနီးသို့ မောင်းသွားခဲ့သည်။
ယင်းသစ်သားအိမ်ငယ်များ၏ အမိုးများအား အဝေးထိန်းစနစ်တစ်မျိုးဖြင့် လှမ်းဖွင့်လိုက်ပြီးနောက် ဒရုန်းများ ပျံထွက်ကာ တိုက်ခိုက်မှုများ လုပ်ဆောင်ခဲ့ကြောင်း ယူကရိန်းလုံခြုံရေး အရာရှိက ပြောကြားသည်။
အဆိုပါ တိုက်ခိုက်မှုများအား လေတပ်စခန်းလေးခုတွင် ယမန်နေ့ တွင် လုပ်ဆောင်ခဲ့ကြောင်း နှင့် ရုရှား စစ်လေယာဉ် ၄၁ စင်းအား ထိမှန်ခဲ့ကြောင်း အမည်မဖော်လိုသောယူကရိန်း အရာရှိကြီးက ပြောသည်။
တိုက်ခိုက်မှုကြောင့်အမေရိကန်ဒေါ်လာခုနစ်ဘီလီယံခန့် ပျက်စီးသွားသည်ဟု ခန့်မှန်းရကြောင်း ယူကရိန်းပြည်တွင်းထောက်လှမ်းရေးအေဂျင်စီ(SBU) က တယ်လီဂရမ် လူမှုကွန်ရက် တွင် ထုတ်ပြန်ပြောကြားသည်။
ရုရှားနိုင်ငံအဓိက လေတပ်စခန်းလေးခုမှ မဟာဗျူဟာမြောက် ပဲ့ထိန်းဒုံးကျည်တပ်တိုက်လေယာဉ် ၃၇ ရာခိုင်နှုန်း ပျက်စီးသွားခဲ့သည်ဟု SBU ကဆိုသည်။
လုံးဝထူးချွန်ပြောင်မြောက်သောရလဒ် အပေါ် နှစ်ထောင်းအားရဖြစ်ရကြောင်း ယူကရိန်းသမ္မတ ဗိုလိုဒီမာဇီလန်စကီး က လည်း တယ်လီဂရမ်တွင်ပြောကြားသည်။
ယင်းတိုက်ခိုက်မှုအတွက် အချိန်တစ်နှစ်ခွဲကြာ အချိန်ယူပြင်ဆင်ခဲ့ကြောင်း ၊ ယင်းမှာ မိမိတို့၏ ခရီးအဝေးဆုံးတိုက်ခိုက်မှုဖြစ်ကြောင်း နှင့် အဆိုပါရလဒ်ကို ယူကရိန်း က မိမိဘာ သာ ဖန်တီးခဲ့ခြင်းဖြစ်ကြောင်း ဇီလန်စကီး က ဆက်လက်ပြောကြားသည်။
ရုရှားလေတပ်စခန်းများကို တိုက်ခိုက်ရန် အတွက် ဒရုန်း ၁၁၇ စီးအား အသုံးပြုခဲ့ကြောင်း ဇီလန်စကီး က ၎င်း၏ ညစဉ်ရုပ်သံ မိန့်ခွန်း၌မှတ်ချက်ပြုသည်။
တစ်ဆက်တည်းမှာပင် ယင်းစစ်ဆင်ရေး၏ ပင်မစင်တာအား ရုရှားထောက်လှမ်းရေးဌာန (FS ဒေသဆိုင်ရာ ရုံးခွဲတစ်ခုအနီးမှာပင် ထူထောင်ခဲ့ကြောင်း နှင့် ယင်းစစ်ဆင်ရေးတွင် ပါဝင်သူများအား စစ်ဆင်ရေး မတိုင်မီတစ်ရက်မှာပင် ရုရှားနိုင်ငံအတွင်းမှ ခေါ်ထုတ်သွားခဲ့ကြောင်း ဇီလန်စကီး က ပြောကြားသည်။
ရုရှားဆိုရှယ်မီဒီယာများတွင် တင်ထားပြီး အစစ်အမှန် ဟုတ်၊မဟုတ် စိစစ်မှုမလုပ်ရသေးသော ဗီဒီယိုနှင့် ဓာတ်ပုံများတွင် ဆိုက်ဘေးရီးယားပြည်နယ် အာကွတ်စ်ခ် ဒေသမှ ဘယ်လာယာလေတပ်စခန်းမှ ဗုံးကြဲလေယာဉ်ကြီးများ မီးလောင်ကျွမ်းနေသည်ကို မြင်တွေ့ရသည်။
ဆရက်ဒနီကျေးရွာအနီးမှ စစ်စခန်းတစ်ခုအား ဒရုန်းတိုက် ခိုက်မှုတစ်ခု ဖြစ်ပေါ်ခဲ့ကြောင်း ဒေသဆိုင်ရာ အုပ်ချုပ်ရေးမှူး အီဂေါကော့ဇက်ဗ် က ပြောကြားခဲ့ပြီး ပစ်မှတ်အတိအကျကို မပြောခဲ့ပေ။
ယင်း ဒရုန်းများကို ထရပ်ကားတစ်စီးမှ ပစ်လွှတ်ခဲ့ကြောင်း ၎င်းက ဆက်လက်ပြောသည်။
ဆရက်ဒနီ ကျေးရွာမှာ ဘီလာယာ လေတပ်စခန်းအနီးတွင် တည်ရှိကြောင်း သိရသည်။
အာကွတ်စ်ခ် ဒေသသည် ယူကရိန်းနှင့် ရှေ့တန်းစစ်မျက်နှာများမှ ကီလိုမီတာပေါင်း ၄၀၀၀ ကျော် အကွာအဝေးတွင် တည်ရှိပြီး ယူကရိန်းတို့၏ ပထမဆုံးအကြိမ် ဒရုန်းတိုက်ခိုက်မှုနှင့် ရင်ဆိုင်ခဲ့ရခြင်းဖြစ်သည်။
.သတင်း-ရဲမင်း
ကိုးကား-Reuters
