#ပြည်တွင်းသတင်း
◼မေလနောက်ဆုံးပတ်အတွင်း တိုင်းနှင့်ပြည်နယ်တချို့မိုးကြီးနိုင်
မနက်ဖြန်(မေ ၂၃ ရက်မှ ၃၀ ရက်) အတွင်းတိုင်းနှင့်ပြည်နယ်တချို့၌ မိုးကြီးနိုင်ကြောင်းမိုးလေဝသနှင့် ဇလဗေဒညွှန်ကြားမှုဦးစီးဌာနကထုတ်ပြန်သည်။
အဆိုပါ ရက်များအတွင်း ကပ္ပလီပင်လယ်ပြင်နှင့် ဘင်္ဂလားပင်လယ်အော် (တောင်ပိုင်း) တို့တွင် လေထုမငြိမ်မသက်မှုများဖြစ်ပေါ်လာနိုင်ခြင်းကြောင့်သော်လည်းကောင်း၊ မုတ်သုံလေအားကောင်းလာနိုင်ခြင်းကြောင့်သော် လည်းကောင်း၊ အပူပျံတက်တိမ်များဖြစ်ထွန်းမှုအားကောင်းခြင်းများကြောင့်သော်လည်းကောင်း မိုးကြီးနိုင်ကြောင်းယင်းထုတ်ပြန်ချက်အရသိရသည်။
စစ်ကိုင်းတိုင်း(အထက်ပိုင်း)၊ ကချင်ပြည်နယ်နှင့်ရှမ်းပြည်နယ်(မြောက်ပိုင်း)တို့တွင် နေရာကျဲကျဲမှ နေရာစိပ်စိပ်နှင့် နေပြည်တော်၊ ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း (အောက်ပိုင်း)၊ ဧရာဝတီတိုင်း၊ တနင်္သာရီတိုင်း၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့်ရှမ်းပြည်နယ်(တောင်ပိုင်းနှင့်အရှေ့ပိုင်း)တို့တွင် နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် နေရာကွက်၍မိုးကြီးမည်ဖြစ်ကြောင်း မိုးဇလကထုတ်ပြန် ထားသည်။
"၂၅ ရက်ကျော်ရင်ဘင်္ဂလားပင်လယ်အော် အရှေ့အလယ်ပိုင်းနဲ့ အရှေ့မြောက်ပိုင်းမှာ လေဖိအားနည်း ရပ်ဝန်း၊ မုန်တိုင်းတစ်လုံးဖြစ်ဖို့ရှိတယ်။ သူကအားပိုကောင်းလာနိုင်တာတော့တွေ့တယ်။ ဆိုင်ကလုန်း activity chart မှာတော့ ၅၀ ရာခိုင်နှုန်းဆိုင်ကလုန်းဖြစ်နိုင်ချေပြတယ်။ အခုလောလောဆယ်တော့ ဘင်္ဂလားပင်လယ်အော်တောင်ပိုင်းမှာဖြစ်တဲ့လေဖိအားနည်းရပ်ဝန်းက မုတ်သုံကိုတွန်းတင်ပေးရုံ လောက်ပဲသက်ရောက်မှုရှိတယ်။ နောက်တစ်လုံးမှမိုးများမယ်ဆိုတော့ ၂၅ ရက်၊၂၆ ရက်နဲ့ ဇွန်လ ပထမ ပတ်အတောအတွင်းမှာတော့ မိုးများမယ့်အနေအထား၊ မိုးသက်လေပြင်းကျမယ့်အနေအထား ရှိပါတယ်" ဟု မိုးလေဝသစောင့်ကြည့်လေ့လာသူဦးဝင်းနိုင်ကစံတော်ချိန်ဒစ်ဂျစ်တယ်သို့ပြောသည်။
မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်းစသည့် သဘာဝဘေး အန္တရာယ်များဖြစ်ပေါ်နိုင်သောကြောင့် သတိပြုနေထိုင်ကြရန် မိုးဇလကအသိပေးနှိုးဆော်ထားသည်။
သတင်း - အင်ကြင်း
ဓာတ်ပုံ - CJ
