မြဝတီမှ ထိုင်းသို့ ခိုးဝင်သည့် တရုတ်နိုင်ငံသား ၅ ဦး ဖမ်းဆီးခံရ

ဘန်ကောက်၊ ဖေဖော်ဝါရီ ၁

မြန်မာနိုင်ငံ၊ မြဝတီမြို့မှ ထိုင်းနိုင်ငံ တာ့ခ် (Tak) ပြည်နယ်အတွင်းသို့ ဇန်နဝါရီ ၃၀ ရက်က တရားမဝင် ခိုးဝင်ခဲ့ သည့် တရုတ်နိုင်ငံသား ၅ ဦး ဖမ်ဆီးခံခဲ့ရကြောင်း The Nation မှ ဖော်ပြခဲ့သည်။

အဆိုပါ တရုတ်နိုင်ငံသားများသည် သောင်ရင်းမြစ် (Moei River)ကို ဖြတ်သန်းပြီး ဒေသစံတော်ချိန် ည ၈ နာရီခွဲ တွင် မဲဆောက် (Mae Sot)သို့ ဝင်ရောက်လာချိန်၌ ရတ်ချမနူ လုံခြုံရေးတပ်ဖွဲ့ (Ratchamanu Taskforce) မှ နယ်စပ်ကင်းအဖွဲ့က ၎င်းတို့ကို တွေ့ရှိခဲ့ခြင်းဖြစ်သည်။

ထိုတရုတ်အမျိုးသား ၅ ဦးမှာ ဟောင်ဝမ်(Huang We- ၂၉ နှစ် ) ၊ ဆွန်ဟောင်(Song Hong-၂၂ နှစ်) ၊ လီကျဲ (Li Jie-၂၁ နှစ်) လီဟောင် (Li Hong-၂၈ နှစ်)နှင့် ယန်ရှင်း (Yang Xoing- ၃၄ နှစ်) တို့ဖြစ်ပြီး ပတ်စ်ပို့များ ကိုင်ဆောင်ထားခြင်း မရှိပေ။

ထိုတရုတ်နိုင်ငံသားများသည် မြ၀တီတွင် အလုပ်လုပ်ခဲ့သူများဖြစ်ပြီး တရုတ်နိုင်ငံကို ပြန်ချင်ကြောင်း စကားပြန်မှ တဆင့် ထိုင်းအာဏာပိုင်များကို ပြောကြားခဲ့သည်။

ထိုတရုတ်နိုင်ငံသားများကို စစ်ဆေးမေးမြန်းရန်အတွက် တရုတ်သံရုံး ဝန်ထမ်းများရှိနေသည့် တာ့ခ်ပြည်နယ် လူဝင်မှုရေးရာရုံးသို့ ခေါ်ဆောင်သွားခဲ့သည်။

မြဝတီမြို့သည် တရုတ်နိုင်ငံသားများ ဖွင့်ထားသည့် ကာစီနိုရုံများနှင့် ကျားဖြန့်ငွေလိမ်ဂိုဏ်းများ အများအပြား ရှိသည့် မြို့ဖြစ်ပြီး တရုတ်နှင့်အိမ်နီးချင်း နိုင်ငံများထံမှ ပြည်သူများကို မှောင်ခိုကူးကာ အတင်းအဓမ္မ အလုပ် စေခိုင်းသည့် မြို့အဖြစ် နာမည်ဆိုးဖြင့် ကျော်ကြားသည်။

ဇန်နဝါရီလ အစောပိုင်းကလည်း တရုတ်သရုပ်ဆောင် ဝမ်ရှင်း (Wang Xing) သည် ထိုင်းနိုင်ငံမှတဆင့် မြဝတီသို့ မှောင်ခိုကူးခံခဲ့ရပြီး ကျားဖြန့်ခြံဝင်းတစ်ခုတွင် ထိန်းသိမ်းခံခဲ့ရသည်။ သို့သော် ရက်ပိုင်းအတွင်း ပြန်လည်ကယ်တင် နိုင်ခဲ့သည်။

၎င်း၏ ဖြစ်စဉ်သည် အလွန်လူသိများသွားခဲ့ပြီး မြန်မာနယ်စပ်ရှိ ကျားဖြန့်စင်တာများတွင် ဖမ်းဆီးခံထားရသည်ဟု .ယူဆရသည့် တရုတ်နိုင်ငံသား ၁၅၀၀ ကို ကယ်တင်ပေးရန် တရုတ်ပြည်တွင်း၌ အွန်လိုင်းမှ အသနားခံစာများ လျှောက်ထားခဲ့ကြသည်။

တရုတ်ခရီးသွားများသည် ထိုင်းခရီးစဉ်များကို ဖျက်သိမ်းမှုများ ရှိနေသဖြင့် ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) သည် တရုတ်ခရီးသွားများကို ထိုင်းသို့ လာရောက်ကြရန်နှင့် ဘေးကင်း လုံခြုံမှုရှိကြောင်း မန်ဒရင်းဘာသာစကားဖြင့် ပြောကြားထားသည့် AI နှင့်ဖန်တီးထားသော ဗွီဒီယိုတစ်ခုကို လူမှုမီဒီယာတွင် တင်ခဲ့သည်။

Source: The Nation

ပုံ - ထိုင်းဘက်ကို တရုတ်နိုင်ငံသားများ ခိုးဝင်လာတဲ့လမ်းကြောင်းကိုတွေ့ရစဉ်

#centralnewsnaypyitaw

တရုတ်၊ မက္ကဆီကိုနဲ့ ကနေဒါသွင်းကုန်တွေကို မနက်ဖြန်ကစပြီး အခွန်တွေကောက်မယ်လို့ ဒေါ်နယ်ထရန့် ကြေညာ

ဝါရှင်တန်၊ ဖေဖော်ဝါရီ ၁

အမေရိကန်သမ္မတ ဒေါ်နယ်ထရန့်ဟာ တရုတ်၊ မက္ကဆီကိုနဲ့ ကနေဒါနိုင်ငံတို့ရဲ့ ကုန်ပစ္စည်းတွေအပေါ် မနက်ဖြန်ကစပြီး အခွန်ကောက်ခံတော့မယ်လို့ ကြေညာလိုက်ပါတယ်။

မက္ကဆီကိုနဲ့ ကနေဒါတို့အပေါ် အခွန် ၂၅ ရာခိုင်နှုန်းနဲ့ တရုတ်နိုင်ငံအပေါ် အခွန် ၁၀ ရာခိုင်နှုန်းကောက်မှာဖြစ်ပြီး ဒီကိစ္စကိုတားဆီးဖို့ နှောင့်နှေးဖို့ သုံးနိုင်ငံစလုံးက ဘာမှလုပ်လို့မရဘူးလို့ ဒေါ်နယ်ထရန့်က ဆိုပါတယ်။

ဖေဖော်ဝါရီ ၁ ရက်ကစပြီး ဒီနိုင်ငံတွေအပေါ် စည်းကြပ်ခွန်တွေကောက်မယ်လို့ ပြီးခဲ့တဲ့ ရက်သတ္တပတ်များစွာကပင် ဒေါ်နယ်ထရန့်က ခြိမ်းခြောက်ထားခဲ့တာဖြစ်ပြီး အမေရိကန်နယ်စပ်မှ အထောက်အထားမဲ့ ရွှေ့ပြောင်းနေထိုင်သူတွေနဲ့ ဖန်တနိုင်းမူးယစ်ဆေးဝါးတွေ ဝင်ရောက်မှုကို အဲဒီနိုင်ငံတွေက ကိုင်တွယ်ဖြေရှင်းချိန်ထိ အရေးယူပိတ်ဆို့မှုတွေ ထားမယ်လို့ ပြောပါတယ်။

ဒီလိုအခွန်ကောက်မှုကြောင့် စားသုံးသူတွေ စရိတ်စက ပိုမိုပေးဆောင်ရမှာကို နားလည်ပြီး ရေတိုကာလမှာတော့ အဆင်မပြေမှုတွေ ဖြစ်နိုင်တယ်လို့ ထရန့်ကဆိုပါတယ်။ အခုလိုသွင်းကုန်တွေအပေါ် အခွန်တိုးကောက်ပြီး လက်တုံ့ပြန်တာဟာ ကမ္ဘာတဝန်းရှိ စီးပွားရေး လုပ်ငန်းတွေအပေါ် အနှောက်အယှက်ဖြစ်နိုင်တယ်လို့ စီးပွားရေး ပညာရှင်တွေက သတိပေးထားပါတယ်။

အမေရိကန်ရဲ့ အခုလို အခွန်ကောက်ဖို့ စီစဉ်နေတဲ့အဆင့်မှာ ဒီသုံးနိုင်ငံစလုံး ဘာအခွင့်အရေးမှ ရှိလာမှာမဟုတ်ဘူးလို့ သတင်းထောက်တွေရဲ့ မေးမြန်းမှုကို ဒေါ်နယ်ထရန့်က အိမ်ဖြူတော်မှာ ဖြေကြားခဲ့ပါတယ်။

ဒေါ်နယ်ထရန့်ဟာ ၂၀၁၈ ခုနှစ်နဲ့ ၂၀၁၉ ခုနှစ်တို့မှာလည်း တရုတ်ကုပစ္စည်းတွေအပေါ် အခွန်တွေ ကောက်ခံခဲ့ပါတယ်။ တရုတ်နိုင်ငံကတော့ အမေရိကန်အစိုးရသစ်နဲ့ တည်ငြိမ်ကောင်းမွန်တဲ့ ဆက်ဆံရေးကို လိုလားကြောင်း ထရန့်ကျမ်းသစ္စာကျိန်ဆိုပြီးနောက် ထုတ်ဖော်ပြောကြားထားပါတယ်။

Ref:Reuters
Photo:Reuters

#သတင်းဟင်းလေးအိုးကြီး

မန်ချက်စတာယူနိုက်တက်အသင်းနည်းပြရူဘင်အာမိုရင်ကစတူအာဘူခါရက်စ်အသင်းကို ၂-၀ နဲ့အနိုင်ရခဲ့ပြီး နောက်တဆင့်ကို‌တက်ရောက်နိုင်ခဲ့တာဟာ ကလပ်အသင်းအတွက်အရမ်းအရေးပါခဲ့ပြီး ဒီပွဲစဉ်မှာ တဂိုးသွင်းတဂိုးဖန်တီးခဲ့တဲ့ ကွင်းလယ်တိုက်စစ်ကစားသမားကော့ဘ်ဘီးမိုင်နူကို ချီးကျူးပြောဆိုခဲ့ပါတယ်။

ဒီဟာကငါ့တို့အတွင်အရမ်းအရေးကြီးတဲ့အရာဖြစ်ပါတယ်။အနိုင်ရလဒ်နဲ့ပတ်သက်ပြီးငါတို့ပျော်ရွင်ပါတယ်။ကျနော့်ကစားသမားတွေကိုကျနော်ကောင်းကောင်းပိုနားလည်လာခဲ့ပြီးကစားသမားတွေကိုနားလည်နိုင်ဖို့အတွက်ငါတို့အချိန်ယူရပါမယ်။ကော်ဘ်ဘီးမိုင်နူအနေနဲ့ခံစစ်ပိုင်းကစားရာမှာပြသနာရှိပေမဲ့သူ့အနေနဲ့နံပါတ် ၁၀နေရာမှာကစားတဲ့အခါမှာတော့ ပယ်နယ်တီဧရိယာထဲမှာဘောလုံးကိုကျွမ်းကျွမ်းကျင်ကျင်ကစားနိုင်ပါတယ်။

ပိုကစားလာရတာနဲ့ပတ်သက်ပြီးသူ့ကိုကြည့်ရတာပျော်ရွင်နေပုံရပါတယ်။သူ့အနေနဲ့နေရာအတော်များများမှာကစားနိုင်ပြီး ဒီနေရာမှာလည်းကစားတာကောင်းပါတယ်။ငါတို့အနေနဲ့အတူတကွလက်တွဲကစားဖို့ကျနော်ထပ်တောင်းဆိုပါတယ်။သူတို့ရဲ့အကောင်းမွန်ဆုံးနေရာအတွက်နားလည်မှုရှိအောင်မလို့ပါလို့ အာမိုရင်ကပြောဆိုခဲ့ပါတယ်။

#သတင်းဟင်းလေးအိုးကြီး

တည်ဆောက်ဆဲ နေရောင်ခြည်စွမ်းအင်သုံး ဓာတ်အားပေးစက်ရုံစီမံကိန်းများ ပြီးစီးပါက စုစုပေါင်း တပ်ဆင်အင်အား (၁၀၂၆)မဂ္ဂါဝပ်ထွက်ရှိမည်

ဖေဖော်ဝါရီ ၁

တည်ဆောက်ဆဲ နေရောင်ခြည်စွမ်းအင်သုံး ဓာတ်အားပေးစက်ရုံစီမံကိန်းများ ပြီးစီးပါက စုစုပေါင်း တပ်ဆင်အင်အား (၁၀၂၆)မဂ္ဂါဝပ်ထွက်ရှိမည်ဟု လျှပ်စစ်နှင့်စွမ်းအင်ဖွံ့ဖြိုးရေးကော်မရှင်ဥက္ကဋ္ဌ၊ ဗိုလ်ချုပ်ကြီး တင်အောင်စန်းက ပြောသည်။ အဆိုပါလုပ်ငန်းညှိနှိုင်းအစည်းအဝေးကို ယမန်နေ့၊ မွန်းလွဲပိုင်းက နေပြည်တော်ရှိ နိုင်ငံတော်စီမံအုပ်ချုပ်ရေးကောင်စီရုံး အစည်းအဝေးခန်းမတွင် ကျင်းပပြုလုပ်ခဲ့ကြောင်း သိရသည်။

ပြည်သူများ၏ နေ့စဉ်လူနေမှုဘဝတိုးတက်မြင့်မားရေးနှင့် ပြည်တွင်း၊ပြည်ပ ရင်းနှီးမြှုပ်နှံမှု ပိုမိုတိုး တက်လာခြင်းဖြင့် အခြေခံအဆောက်အအုံလိုအပ်ချက်ကို ဖြည့်ဆည်းတည်ဆောက်နိုင်ပြီး လျှပ်စစ်နှင့် စွမ်းအင်ကဏ္ဍ (၂) ခုလုံး၏ ဖွံ့ဖြိုးတိုးတက်ရေးကို ဦးစားပေးဆောင်ရွက်နိုင်စေရေးကို ရည်ရွယ်၍ လျှပ်စစ်နှင့်စွမ်းအင်ဖွံ့ဖြိုးရေးကော်မရှင်ကို ဖွဲ့စည်းထားခြင်းဖြစ်ကြောင်း သိရသည်။ လက်ရှိ နိုင်ငံ တော်၏လျှပ်စစ်ဓာတ်အားထုတ်လုပ်မှုတွင် ရေအားလျှပ်စစ်ဓာတ်အားပေးစက်ရုံ (၂၈) ရုံ၊ အပူစွမ်းအင်သုံး ဓာတ်အားပေးစက်ရုံ (၂၇) ရုံနှင့် နေရောင်ခြည်စွမ်းအင်သုံး ဓာတ်အားပေးစက်ရုံ (၈)ရုံ၊ စုစုပေါင်း တပ်ဆင်အင်အား ၆၃၇၁ မဂ္ဂါဝပ်ရှိပြီး အဆိုပါ ရေအားလျှပ်စစ်နှင့် အပူစွမ်းအင်သုံး ဓာတ်အားပေးစက်ရုံများမှ အချို့ဓာတ်အားပေးစက်ရုံ (၁၂)ရုံမှာ ဓာတ်အားလိုင်းများ ဖျက်ဆီးခံရမှုနှင့် သဘာဝဘေးဒဏ်တို့ကြောင့် ပျက်စီးခြင်းသွားရာ လက်ရှိတွင် ဓာတ်အားထုတ်လုပ်မှုမှာ ကျဆင်းလျက်ရှိကြောင်း ဥက္ကဋ္ဌက ရှင်းပြသည်။

လက်ရှိအချိန်တွင် နိုင်ငံတော်၏လျှပ်စစ်ဓာတ်အား လိုအပ်ချက်ပမာဏ ပိုမိုမြင့်မားလျက်ရှိနေကြောင်း၊ ပြည့်ဖြိုးမြဲစွမ်းအင် (Renewable Energy - RE) ဖြင့် လျှပ်စစ်ဓာတ်အားထုတ်လုပ်ခြင်း စီမံကိန်းများကို အမြန်အကောင်အထည်ဖော် ဆောင်ရွက်သွားကြရမည်ဖြစ်ကြောင်း၊ အထက်အကြီးအကဲကလည်း Renewable Energy – RE အလေးထား အကောင်အထည်ဖော်ရန် ညွှန်ကြားထားပြီးဖြစ်ကြောင်း သိရသည်။ တည်ဆောက်ဆဲ နေရောင်ခြည်စွမ်းအင်သုံးဓာတ်အားပေးစက်ရုံစီမံကိန်းကို နေပြည်တော် ပြည်ထောင်စုနယ်မြေတွင် (၄)ခု၊ မန္တလေးတိုင်းဒေသကြီးတွင် (၃)ခု၊ ပဲခူးတိုင်းဒေသကြီးတွင်(၁)ခု၊ ရှမ်းပြည်နယ်တွင် (၁)ခု စုစုပေါင်း တပ်ဆင်အင်အား (၅၃၀) မဂ္ဂါဝပ်ရှိပြီး ဆောက်ရွက်ဆဲ Hybrid (Gas Engine + Solar) စီမံကိန်းကို မန္တလေးတိုင်းဒေသကြီးတွင် (၁)ခုနှင့် မကွေးတိုင်းဒေသကြီးတွင်(၁)ခု စုစုပေါင်းတပ်ဆင်အင်အား (၄၉၆) မဂ္ဂါဝပ်ရှိကြောင်း သိရသည်။

လက်ရှိတည်ဆောက်ဆဲ နေရောင်ခြည်စွမ်းအင်သုံး ဓာတ်အားပေးစက်ရုံစီမံကိန်းများနှင့် Hybrid (Gas Engine + Solar) စီမံကိန်းများတွင် ပြည်တွင်း/ ပြည်ပ ရင်းနှီးမြှုပ်နှံသူများကို မိမိတို့၏လုပ်ငန်းများ အကောင်အထည်ဖော်ရာတွင် ကြုံတွေ့နေရသည့် အခက်အခဲများနှင့် စီမံကိန်းလုပ်ငန်းများ နှောင့်နှေးကြန့်ကြာနေရသည့် အကြောင်းရင်းများကိုလည်း ကုမ္ပဏီတစ်ခုချင်းစီအလိုက် ရှင်းလင်းတင်ပြပေးပြီး ကုမ္ပဏီတို့၏ တင်ပြချက်များကို ဆက်စပ်ဝန်ကြီးဌာနများမှ ဖြေရှင်းနိုင်မည့် နည်းလမ်းများကို အကြံပြုသုံးသပ် တင်ပြပေးစေလိုကြောင်း ဥက္ကဋ္ဌက တိုက်တွန်းပြောကြားခဲ့သည်။

#centralnewsnaypyitaw

ရန်ကုန်မြို့လယ်တွင် ဒုစရိုက်မှုကျူးလွန်ရန်ကြိုးစားနေသော လူငယ်အမျိုးသားတစ်ဦးကို အချိန်မီဟန့်တား ဖမ်းဆီးနိုင်ခဲ့

ဖေဖော်ဝါရီ ၁

ရန်ကုန်မြို့၊ ကျောက်တံတားမြိုနယ်တွင် ဒုစရိုက်မှုကျူးလွန်ရန်ကြိုးစားနေသော လူငယ်အမျိုးသားတစ်ဦးကို အချိန်မီဟန့်တား ဖမ်းဆီးနိုင်ခဲ့ကြောင်း မြို့ခံတစ်ဦးက ပြောသည်။

ဖြစ်စဉ်မှာ ယမန်နေ့ (ဇန်နဝါရီလ ၃၁ ရက်)၊ ညနေပိုင်း ၅ နာရီဝန်းကျင်အချိန်ခန့်က ကျောက်တံတားမြို့နယ်၊ လမ်း ၄ဝ (အလယ်ဘလောက်) တွင် လူအများရှိနေချိန်ဖြစ်ပွားခဲ့ခြင်းဖြစ်ကြောင်း သိရသည်။

“တစ်ယောက်တည်း ဘာမှတော့ မပါသွားလိုက်ဘူး။ သူက ဝင်ပြီးတော့ ခိုးဖို့လုပ်တာပေါ့နော်။ ဒီလို အကြီးစား လည်း မဟုတ်ဘူးပေါ့နော်။ ရရစားစား ရတာယူပြီး ထွက်ပြေးမယ့် ပုံစံမျိုးလေးပေါ့။ အိမ်ရှေ့မှာရပ်ပြီးတော့ ဝင်ပြီးတော့လုဖို့ ချောင်းနေတဲ့အချိန်မှာ သူတို့က မိသွားတာတဲ့။ ဖမ်းလည်းဖမ်းပြီးရော CCTV ကနေ ကြည့်လိုက်တော့ သူ့ပုံစံက အဲဒီလိုမျိုးဖြစ်နေတော့ သူ့ကိုဖမ်းပြီးတော့ အမှုဖွင့်ထားတယ်” ဟု မြို့ခံတစ်ဦးက ပြောသည်။

အဆိုပါပြစ်မှုကျူးလွန်သူအမျိုးသားမှာ အသက်(၂၀)နှစ်ဝန်းကျင်အရွယ်ရှိသူဖြစ်ပြီး ၎င်း၏နောက်ကြောင်း ရာဇဝင် နှင့်ပတ်သက်၍ သေချာစွာသိရခြင်းမရှိသေးကြောင်း ၎င်းက ဆိုသည်။

“တဖြည်းဖြည်းနဲ့ ရဲနေပြီပေါ့။ အကုန်လုံး မနက်ရော၊ ညနေရော စပြီးတော့ လှုပ်ရှားနေပြီပေါ့နော်။ တော်တော်ကို ကြောက်ဖို့ကောင်းနေပြီ။ အရှေ့မှာရပ်ကွက်ရုံးကြီးရှိတာတောင်မှ ဒီကောင်တွေ လုပ်ရဲတာဆိုတော့ ဒီထက်ပိုဆိုးဖို့ပဲ ရှိတာပေါ့။ သူတို့မှာ အကြောက်တရားမရှိတော့ဘူး။ ပြီးရင် ဒီလမ်းကြီးက တအားလူစည်တဲ့ လမ်းကြီးဖြစ်နေတယ်။ ပြီးတော့ သူလုပ်တဲ့အချိန်က ညနေ(၅)နာရီဆိုတော့ ဗလီထဲကနေ ဆင်းတာတွေများတဲ့အချိန်” ဟု ၎င်းက အကြံပြုပြောထားသည်။

ထို့ကြောင့် အဆိုပါပြစ်မှုကျူးလွန်သူအမျိုးသားကို သက်ဆိုင်ရာတာဝန်ရှိသူများက စုံစမ်းစစ်ဆေးမှုများ ဆက်လက်လုပ်ဆောင်နေကြောင်း သိရသည်။

Credit - NP News Agency

#သတင်းဟင်းလေးအိုးကြီး

ပြည်ပပို့ရန် ရည်မှန်းထားမှုကြောင့် ပေါ်ဆန်းဆန်ကို နှစ်ရာသီစိုက်နိုင်စေရန် ပြုပြင်သင့်ဟုဆို

ဖေဖော်ဝါရီ ၁

စိုက်ဧက(၁)သန်းခွဲခန့်သာ စိုက်ပျိုးနိုင်သော ပေါ်ဆန်းကို ပြည်ပတင်ပို့နိုင်ရေးအတွက် အထွက်နှုန်းတိုးရေးကို ဦးစားပေးဆောင်ရွက်ရန် လိုအပ်ကြောင်း ပြည်တွင်းရှိ ဆန်စပါးလုပ်ငန်းရှင်တစ်ဦးက သုံးသပ်ထားသည်။

ပြည်တွင်း၌ နှစ်စဉ်မိုးစပါးစိုက်ဧက (၁၅) သန်းနှင့် နွေစပါး(၂)သန်းခွဲခန့် စိုက်ပျိုးပြီး မိုးစပါးတစ်ရာသီ သာစိုက်ပျိုးနိုင်သည့် ပေါ်ဆန်းဆန်ကို ဧက(၁)သန်းခွဲခန့်သာစိုက်ပျိုးကြောင်း သိရသည်။

‘‘ပေါ်ဆန်းက တစ်ဧကကို တင်း(၆၀)၊ (၇၀)၊ (၈၀) လောက်ပဲ ထွက်တာ။ ကျန်တဲ့ဆင်းသုခတို့ ၊ အထူးဧည့်မထစပါး တွေကျတော့ တင်း(၉၀)၊ (၁၀ဝ)၊(၁၁၀)ထွက်တယ်။ မြန်မာနိုင်ငံမှာပေါ်ဆန်း စိုက်တာက ဧက(၁)သန်းခွဲ လောက်ရှိတယ်။ မြန်မာနိုင်ငံမှာက မိုးစပါး(၁၅)သန်း စိုက်တာဆိုတော့ (၁၀)ရာခိုင်နှုန်းကနေ (၁၅)ရာခိုင် နှုန်းလောက်ရှိတယ်။ ပြည်တွင်းကတော့ ကောင်း ကောင်းလောက်တယ်” ဟု အထက်ပါ ဆန်စပါး လုပ် ငန်းရှင်က ပြောသည်။

ထို့ပြင် မြန်မာနိုင်ငံဆန်စပါးအသင်းချုပ်အနေဖြင့် မြန်မာ့ပေါ်ဆန်းကို ပြည်ပနိုင်ငံများသို့တင်ပို့နိုင်ရေးအတွက် Brand တစ်ခုအနေဖြင့် မြှင့်တင်သွား မည်ဖြစ်ပြီး Geographical indication (GI) မှတ်ပုံ တင်နိုင်ရေးကိုလည်း ဆောင်ရွက်သွားရန်စီစဉ်နေကြောင်း သိရသည်။

ပြည်တွင်းမှထုတ်လုပ်သည့် ဆန်နှင့်ပဲများမှာ ဈေးကွက်ရရှိပြီးဖြစ်ခြင်းကြောင့် ယခုထက်အရည် အသွေးကောင်း မွန်သည့် ဆန်နှင့်ပဲများ တင်ပို့နိုင်ရေးနှင့် ပေါ်ဆန်းမွှေးဆန်ရောင်းအားမြှင့်တင်ရန်လိုကြောင်း နိုင်ငံတော်စီမံ အုပ်ချုပ်ရေး ကောင်စီဥက္ကဋ္ဌ ကလည်း ပြီးခဲ့သည့်ရက်ပိုင်းတွင် အသိပေးပြောဆို ထားဖူးသည်။

လက်ရှိတွင် ပေါ်ဆန်းဆန်ကို ပြည်တွင်းစားသုံး မှုမြင့်မားနေသည့်အတွက် ပြည်ပတင်ပို့နိုင်ရေး ဆောင်ရွက်မည် ဆိုပါက နှစ်ရာသီစိုက်ပျိုးနိုင်သည့် အဆင့်အထိရောက်ရေး ဆောင်ရွက်ရန်နှင့်အထွက် နှုန်းတိုးရေးကိုလည်း ဦးစားပေး ဆောင်ရွက်ရန် အထက်ပါစီးပွာ‌ရေးလုပ်ငန်းရှင်က အကြံပြုပြောကြားသည်။

‘‘ပေါ်ဆန်းကတော့ ဘက်ပေါင်းစုံကနေ လုပ် နေတယ်။ နိုင်ငံတော်အကြီးအကဲကိုလည်း တင်ပြတယ်။ မြန်မာနိုင်ငံကထွက်တဲ့ ဆန်မွှေးကသူပဲရှိတယ်။ လက်တ လောမှာလုပ်လို့မရဘူး။ ဘာလို့လဲဆိုတော့ ပြည်တွင်းမှာလိုအပ်ချက်ကကြီးတော့ ပေါ်ဆန်းက ဆန်ဈေးကြီးတယ်။ ပေါ်ဆန်းက တစ်နှစ်မှာတစ်ရာသီ ပဲစိုက်လို့ရတယ်။ နွေစပါးစိုက်လို့မရဘူး။ နံပါတ်တစ်က နွေစပါးစိုက်လို့ရတဲ့ အနေအထားဖြစ်အောင်မျိုး ကနေစပြီး ပြောင်းရမယ်။ အဲဒါကိုလုပ်နေတယ်။ နောက်တစ်ခုကတော့ များများထွက် အောင်လုပ်ရ မယ်။ ပေါ်ဆန်းက တစ်ဧကကို တင်း(၆၀)၊ (၇၀)၊ (၈၀) လောက်ပဲထွက်တာ။ တင်း (၁၀ဝ) လောက် အထိ ထွက်အောင်လုပ်ရမယ်။ အရည်အသွေးကောင်း အောင်လည်းလုပ်ရမှာပေါ့။ ပြီးရင် GI လိုဟာမျိုးလည်း လုပ်ရမယ်။ ပြီးရင်တော့ မြန်မာ့ဆန်မွှေးဆိုပြီး တန်ဖိုးမြှင့်ထုတ်ကုန်တစ်ခုအနေနဲ့ ဈေးကွက်ဖောက် ရမှာပေါ့” ဟု ၎င်းက ဆက်လက်ပြောသည်။

အဆိုပါ ပေါ်ဆန်းဆန်ကို ဥရောပနိုင်ငံများနှင့် အာဆီယံနိုင်ငံများကို အဓိကဈေးကွက်ဖော်ထုတ် သွားမည်ဖြစ်ပြီး အချိန်ယူပြင်ဆင်နိုင်ရေးကိုလည်း ကြိုးပမ်းသွားမည်ဖြစ်ကြောင်း သိရသည်။

(၂၀၁၁) ခုနှစ်တွင် ဗီယက်နမ်နိုင်ငံ ဟိုချီမင်းမြို့၌ ကျင်းပခဲ့သော အပြည်ပြည်ဆိုင်ရာ ဆန်စပါးညီလာခံတွင် မြန်မာနိုင်ငံမှ ထုတ်လုပ်သည့် ရွှေဘိုပေါ်ဆန်းကို “ကမ္ဘာ့ အကောင်းဆုံးဆန် (World Best Rice)” အဖြစ် ရွေးချယ်ခံခဲ့ရသည်။
ဆန်စပါးအသင်းချုပ်အနေဖြင့် ပြည်ပဆန် တင်ပို့မှုတွင် ပြည်တွင်း၌စားသုံးခြင်းမရှိသည့် ဧည့်မထ ဆန် အုပ်စုများကိုသာ တင်ပို့နေခြင်းဖြစ်ပြီး ယခုအခါ ပေါ်ဆန်း ဆန်ကိုပါ ပြည်ပတင်ပို့နိုင်ရေး ဆောင်ရွက် နေခြင်းဖြစ်သည်။

#centralnewsnaypyitaw

ဗဟိုဘဏ်မှ သွင်းကုန်လုပ်ငန်းရှင်များအတွက် ထိုင်းဘတ် ၅ သန်းနှင့် တရုတ်ယွမ် ၁၀ သန်း ထပ်မံထုတ်ရောင်း

ဖေဖော်ဝါရီ ၁

နိုင်ငံခြားငွေဈေးကွက်အတွင်း သွင်းကုန်လုပ်ငန်းရှင်များအတွက် ထိုင်းဘတ် ၅ သန်း ထုတ်ရောင်းပေးခဲ့သလို တရုတ်ယွမ် ၁၀ သန်းကိုလည်း ထပ်မံရောင်းချပေးမည်ဖြစ်ကြောင်း ယမန်နေ့တွင် မြန်မာနိုင်ငံတော်ဗဟိုဘဏ်မှ ထုတ်ပြန်ထားသည်။

ယခုထပ်မံထုတ်ရောင်းပေးသည့် ထိုင်းဘတ် ၅ သန်းနှင့် တရုတ်ယွမ် ၁၀ သန်းအပါအဝင် ၂၀၂၅ ခုနှစ် ဇန်နဝါရီလအတွင်း ဗဟိုဘဏ်မှ စက်သုံးဆီလုပ်ငန်းရှင်များအတွက် ဒေါ်လာ ၄၅ သန်း သီးသန့်ထုတ်ရောင်းပေးမှုအပါအဝင် စုစုပေါင်းဒေါ်လာ ၁၇၃ သန်းကျော်၊ ထိုင်းဘတ် ၁၄ သန်းနီးပါးနှင့် တရုတ်ယွမ် ၁၅ သန်းကျော်အထိ ထုတ်ရောင်းပေးခဲ့ခြင်းဖြစ်သည်။

ပြီးခဲ့သည့် ၂၀၂၄ ခုနှစ် အောက်တိုဘာလမှစ၍ တစ်ဒေါ်လာ ၅,၀၀၀ အောက် ပြန်လည်ကျဆင်းပြီး တစ်ဒေါ်လာ ကျပ် ၄,၅၀၀ ဝန်းကျင်ဖြင့် တည်ငြိမ်နေသော ဒေါ်လာဈေးနှုန်းသည် ၂၀၂၅ ခုနှစ်အစ ဇန်နဝါရီလအလယ်တွင် တစ်ဒေါ်လာ ကျပ် ၄,၈၀၀ အထိ ပြန်လည်မြင့်တက်လာခဲ့သည်။

သို့သော် သွင်းကုန်လုပ်ငန်းရှင်များအတွက် အဓိကလိုအပ်သည့် ဒေါ်လာ၊ ထိုင်းဘတ်နှင့် တရုတ်ယွမ်များကို ဗဟိုဘဏ်မှ ဆက်တိုက်ထုတ်ရောင်းပေးသောကြောင့် ယနေ့တွင် နိုင်ငံခြားငွေဈေးကွက်၌ တစ်ဒေါ်လာ ၄,၅၆၀ ကျပ်၊ ထိုင်းဘတ် တစ်ဘတ် ၁၃၅ ကျပ်၊ တရုတ်ယွမ် တစ်ယွမ် ၆၂၉ ကျပ်သာဖြစ်ပေါ်ခဲ့ပြီး ဈေးနှုန်းများ ပြန်လည်တည်ငြိမ်လာခဲ့သည်။

ပြီးခဲ့သည့် ဒီဇင်ဘာလတွင်လည်း ဒေါ်လာ ၁၄၃ သန်းကျော်၊ ထိုင်းဘတ် ၃၂၁ သန်းကျော်နှင့် တရုတ်ယွမ် ၁၁ သန်းနီးပါးအထိ ထုတ်ရောင်းပေးထားသလို ၂၀၂၄ ခုနှစ် ဩဂုတ်လ ၁ ရက်မှ နိုဝင်ဘာလ ၂၉ ရက်အထိ လေးလအတွင်း ဒေါ်လာ ၃၃၅ သန်းကျော်၊ ထိုင်းဘတ် ၁ ဒသမ ၂၇၄ ဘီလျံကျော်နှင့် တရုတ်ယွမ် ၅၆ သန်းခန့်အထိ ထုတ်ရောင်းပေးထားသည်။ ထို့ပြင် ယခုဘဏ္ဍာနှစ် ခုနစ်လအတွင်း စက်သုံးဆီ၊ စားသုံးဆီနှင့် သွင်းကုန်လုပ်ငန်းရှင်များအတွက် ဒေါ်လာတစ်ဘီလျံ သီးသန့်ထုတ်ရောင်းပေးထားသည်။

#သတင်းဟင်းလေးအိုးကြီး

အက်လန်တာယူနိုက်တက်ထံ အယ်လ်မီရွန် ပြန်လည်ပြောင်းရွှေ့

ဖေဖော်ဝါရီ ၁

နယူးကာဆယ်အသင်း တောင်ပံကစားသမား အယ်လ်မီရွန်ဟာ အသင်းဟောင်း မေဂျာလိဂ်ကလပ် အက်လန်တာ ယူနိုက်တက်အသင်းထံ ပေါင် ၈ သန်းနဲ့ အပြီးသတ် ပြောင်းရွှေ့ခဲ့ပါတယ်။

နယူးကာဆယ်အသင်းဟာ ၂၀၁၉ ခုနှစ်က အယ်လ်မီရွန်ကို ကလပ်စံချိန်တင် ပြောင်းရွှေ့ကြေး ပေါင်သန်း ၂၀ နဲ့ အက်လန်တာယူနိုက်တက် အသင်းကနေ ခေါ်ယူခဲ့တာပါ။

အသက် ၃၀ နှစ်အရွယ်ရှိ အယ်လ်မီရွန်ဟာ နယူးကာဆယ်အသင်းမှာ ရှိခဲ့တဲ့အချိန်အတွင်း ပွဲပေါင်း ၂၂၃ ပွဲ ပါဝင်ကစားခဲ့ပြီး သွင်းဂိုး ၃၀ သွင်းယူခဲ့ပါတယ်။

အယ်လ်မီရွန်ဟာ ပြီးခဲ့တဲ့ ဆောက်သမ်တန်အသင်းနဲ့ ပရီးမီးယားလိဂ်ပွဲစဉ်မှာ နယူးကာဆယ်အသင်းအတွက် လူစားလဲ ဝင်ရောက်ကစားခဲ့ပြီး ပွဲအပြီးမှာ အသင်းပရိသတ်တွေကို နှုတ်ဆက်မှုပြုလုပ်ခဲ့တာပါ။

အယ်လ်မီရွန်ဟာ ၂၀၂၂-၂၃ ရာသီက နယူးကာဆယ်အသင်း ကာရာဘောင်းဖလား ဗိုလ်လုပွဲ ရောက်ရှိတာနဲ့ ပရီးမီးယားလိဂ်ပြိုင်ပွဲမှာ အဆင့် ၄ နေရာနဲ့ ရာသီအဆုံးသတ်ခဲ့တာမှာ အဓိကအခန်းကဏ္ဍကနေ ပါဝင်ခဲ့ပါတယ်။

နယူးကာဆယ်အသင်းနည်းပြ အက်ဒီဟိုဝီက သူတို့ အတူတူရှိခဲ့တဲ့ အချိန်အတွင်းမှာ အသင်းအတွက် အယ်လ်မီရွန် ပေးခဲ့တဲ့ အရာအားလုံးအတွက် အသင်းကိုယ်စား ကျေးဇူးတင်တယ်လို့ ပြောခဲ့ပါတယ်။

အယ်လ်မီရွန်ကတော့ သူ့ရဲ့နှလုံးသားထဲမှာ အထူးနေရာ တစ်ခုအဖြစ် အမြဲတမ်းရှိနေတဲ့ အက်လန်တာ ယူနိုက်တက်အသင်းထံ ပြန်လာရလို့ ပျော်ရွှင်ပြီး ပျော်ရွှင်စရာ အခိုက်အတန့်တွေကို ထပ်ဖန်တီးပေးနိုင်ဖို့ မျှော်လင့်တယ်လို့ ပြောခဲ့တာပါ။

အယ်လ်မီရွန်ဟာ အက်လန်တာယူနိုက်တက်အသင်းမှာ ပထမဆုံးအကြိမ် ကစားခဲ့တုန်းက ပြိုင်ပွဲစုံပွဲပေါင်း ၇၀ ပါဝင်ကာ သွင်းဂိုး ၂၂ ဂိုးသွင်းပြီး ၂၀၁၈ ခုနှစ်က မေဂျာလိဂ်ဖလားကို ရယူနိုင်ခဲ့ပါတယ်။

၂၀၂၅ ခုနှစ် မေဂျာလိဂ် ရာသီသစ်အတွက် ပြင်ဆင်မှုတွေ ပြုလုပ်နေတဲ့ အက်လန်တာယူနိုက်တက်အသင်းဟာ ဖေဖော်ဝါရီ ၂၂ ရက်မှာ မေဂျာလိဂ်အဖွင့်ပွဲစဉ်အဖြစ် မွန်ထရီရယ်လ်အသင်းနဲ့ ယှဉ်ပြိုင်ရမှာဖြစ်ပါတယ်။

Source: ESPN

ပုံ - အယ်လ်မီရွန်ကို တွေ့ရစဉ်

#ဘောလုံးသတင်းစုံ

ရီးရဲလ်မက်ဒရစ်အသင်းဂိုးသမားတီဘိုကော်တွိုက်စ်က သူ့ရဲ့အသင်းအနေနဲ့ရှေ့‌ဆက်တွေ့မဲ့ဘယ်အသင်းကိုမဆိုမကြောက်ဘူးလို့သူတို့အသင်းအနေနဲ့ချန်ပီယံလိဂ်ပလေးအော့ဖ်အဆင့်ကစားရမဲ့အဖြေကိုစောင့်ဆိုင်းနေစဉ်ကာလမှာ အတည်ပြု‌ပြောဆိုခဲ့ပါတယ်။

သူတို့အသင်းအနေနဲ့ကတော့ ၁၆သင်းရှုံးထွက်အဆင့်ကိုတက်လှမ်းလာမဲ့မန်စီးတီး သို့မဟုတ် ဆဲလ်တက်အသင်းနဲ့ကစားရမှာဖြစ်ပါတယ်။

ရီးရဲလ်မက်ဒရစ်အသင်းအနေနဲ့ဘရက်စ်အသင်းကို ၃-၀ နဲ့အနိုင်ရခဲ့တာကြောင့်ရမှတ် ၁၅ မှတ်ရယူန်ုင်ခဲ့ကာအဆင့် ၁၁ နေရာမှာရပ်တည်နေပါတယ်။ဒီဟာကတော့သူတို့အသင်းအနေနဲ့ပလေးအော့ဖ်အဆင့်ကျော်ဖြတ်ခဲ့မယ်ဆိုရင်တော့ဘဘိုင်ယန်လေဗာကူဆင်အသင်းသို့မဟုတ် အက်သလက်တီကိုမက်ဒရစ်အသင်းနဲ့တွေ့ဆုံရဖို့ရှိနေပါတယ်။

ကျနော်ပြောခဲ့ဖူးပါတယ်။ငါတို့ထိပ်ဆုံး ၈သင်းနေရာလွဲချော်မှာမဟုတ်ဘူးဆိုတာ။အရင်ပွဲတွေတုန်းကတော့ပလေးအော့ဖ်အဆင့်ကစားရသလိုဖြစ်ခဲ့ပေမဲ့ငါတို့ပြိုင်ဘက်ကဘယ်သူဖြစ်မလဲဆိုတာငါတို့တဖြေးဖြေးစောင့်ကြည့်ရပါမယ်။ဒါပေမဲ့ငါတို့ဘယ်သူ့မှမကြောက်ပါဘူးလို့ကော်တွိုက်စ်ကပြောဆိုခဲ့ပါတယ်။

မန်စီးတီးအသင်းနဲ့တွေ့ဆုံနိုင်ချေရှိတာနဲ့ပတ်သက်ပြီး ငါတို့ပြီးခဲ့နှစ်ရှုံးထွက်အဆင့်မှာလည်းသူတို့ယှဉ်ပြိုင်ဖူးခဲ့ပြီးပါပြီ။ပြီးခဲ့တဲ့ ၂ နှစ် ၊၃ နှစ်ကရောပါပဲ့။တကယ်မင်းအနေနဲ့ချန်ပီယံဖြစ်ချင်တယ်ဆိုရင်တော့မင်းအနေနဲ့အကောင်းဆုံးအသင်းတွေကိုအနိုင်ရယူရပါမယ်လို့ကော်တွိုက်စ်ကပြောဆိုခဲ့ပါတယ်။
ရီးရဲလ်မက်ဒရစ်အသင်းမှာတော့ပြီးခဲ့တဲ့ ၃ ရာသီတာကာလပတ်လုံးချန်ပီယံလိဂ်ရှုံးထွက်အဆင့်မှာတွေ့ဆုံဖူးခဲ့တဲ့မှတ်တမ်းရှိခဲ့ပြီး သူတို့အသင်းအနေနဲ့ ၂၀၂၂ နဲ့ ၂၀၂၄ ခုနှစ်တွေမှာအဂ်လန်အသင်းကိုအုပ်စုကနေထွင်ခွာစေခဲ့ကာ အဲဒီနှစ်တွေမှာတော့ချန်ပီယံရယူနိုင်ခဲ့ပါတယ်။

#ဘောလုံးသတင်းစုံ

နစက လေးနှစ်ပြည့် နောက်ဆက်တွဲအခြေအနေ ကန်နဲ့ ဥရောပသံရုံးတွေ ထုတ်ပြန်

ဖေဖော်ဝါရီ ၁

မြန်မာနိုင်ငံမှာ ပြီးခဲ့တဲ့လေးနှစ်အတွင်း လူသားချင်းစာနာမှုဆိုင်ရာ အကူအညီလိုအပ်ချက် ၂၀ ရာခိုင်နှုန်းတိုးလာတယ်လို့ မြန်မာနိုင်ငံ ရေးအပြောင်းအလဲ လေးနှစ်ပြည့် နောက်ဆက်တွဲဖြစ်စဉ်များအပေါ် သြစတြေးလျ၊ ကနေဒါ၊ ဥရောပသမဂ္ဂ၊ ကိုရီးယားသမ္မတနိုင်ငံ၊ နယူးဇီလန်၊ နော်ဝေး၊ ဆွစ်ဇာလန်၊ ယူကေနဲ့ အမေရိကန်တို့ရဲ့ ပူးတွဲကြေညာချက်တရပ်မှာ ဖော်ပြထားပါတယ်။

၂၀၂၅ ခုနှစ်တွင် လူသားချင်းစာနာမှုဆိုင်ရာအကူအညီလိုအပ်ချက်များဟာ နိုင်ငံရေးအပြောင်းအလဲမဖြစ်ခင်အချိန်ကထက် အဆ ၂၀ ပိုမိုတိုးမြင့်လာခဲ့ပါကာ နိုင်ငံလူဦးရေရဲ့ သုံးပုံတပုံ သို့မဟုတ် ၁၉.၉ သန်းကျော်မှာ လူသားချင်းစာနာမှုဆိုင်ရာ အခြေခံအထောက်အပံ့များကို လိုအပ်လျက်ရှိပြီး ခန့်မှန်းခြေ ၁၅.၂ သန်းမျှသော ပြည်သူများမှာစားနပ်ရိက္ခာထောက်ပံ့မှုကို လိုအပ်လျက်ရှိကာ တားဆီးနိုင်သောရောဂါများ ဖြစ်ပွားမှုနှုန်းမှာလည်း တိုးမြင့်လျက်ရှိနေတယ်လို့ဆိုပါတယ်။

နိုင်ငံရေးအပြောင်းအလဲ ဖြစ်ပြီးနောက်ပိုင်းဖမ်းဆီးခံရတဲ့ ဒေါ်အောင်ဆန်းစုကြည်နဲ့ ဦး၀င်းမြင့်တို့ကိုလွှတ်ပေးရန်တောင်းဆိုကြောင်း ၊နစကအစိုးရရဲ့စစ်ဖက် နဲ့ အရပ်ဖက် ခွဲခြားခြင်းမရှိသော လေကြောင်းတိုက်ခိုက်မှုများ၊မြန်မာနိုင်ငံမှာလက်ရှိကြုံတွေ့နေရတဲ့ နိုင်ငံရေး၊ စီးပွားရေး၊ လူမှုရေး၊ လူ့အခွင့်အရေးနဲ့လူသားချင်း စာနာ ထောက်ထားမှု ဆိုင်ရာ အကျပ်အတည်းများ အားလုံးအတွက် တာဝန်ယူမှုတာဝန်ခံမှု ရှိရန် လိုအပ်ကြောင်းနဲ့ ယင်းကြိုးပမ်းမှုတွင် မြန်မာနိုင်ငံအတွက် လွတ်လပ်သော စုံစမ်းစစ်ဆေးရေး ယန္တရားရဲ့ အဓိက အခန်းကဏ္ဍကို EU မှ အလေးပေးကြောင်း ကြေငြာချက်မှာဖော်ပြထားပါတယ်။

လေကြောင်းတိုက်ခိုက်မှုများ ကြောင့်အရပ်သားပြည်သူများကို အသက်ဆုံးရှုံးစေပြီးကျောင်းများ၊ ဈေးများ၊ ဝတ်ပြုရာနေရာများနဲ့ ဆေးရုံ၊ဆေးခန်းများကို ပျက်စီးစေခဲ့ရာ အဆိုပါတိုက်ခိုက်မှုများက၂၀၂၁ ခုနှစ်ကထက် ၂၅ ဆနီးပါးတိုးမြင့်လာရာ တရက်လျှင်လေကြောင်းတိုက်ခိုက်မှု ပျမ်းမျှ သုံး ကြိမ်ရှိကြောင်း၊ပဋိပက္ခဖြစ်ပွားခြင်းမရှိတဲ့ ဒေသများတွင်လေကြောင်းတိုက်ခိုက်မှုများ မြင့်မားလာကြောင်း ပူးတွဲထုတ်ပြန်ချက်မှာထပ်လောင်းဖော်ပြထားပါတယ်။

ဒါကြောင့် မြန်မာမှာအကြမ်းဖက်မှုတွေအဆုံးသတ်ရန်၊ နဲ့ စစ်မှန်ပြီး အားလုံးပါဝင်တဲ့ တွေ့ဆုံဆွေးနွေးမှုများပြုလုပ်ရန် လက်ရှိအစိုးရကိုအလေးအနက် တိုက်တွန်းတောင်းဆိုကြောင်းနဲ့ အားလုံးပါဝင်တဲ့တွေ့ဆုံဆွေးနွေးရေးက မြန်မာပြည်သူများရဲ့ဆန္ဒကို ထင်ဟပ်စေမယ့်ငြိမ်းချမ်းသော ဒီမိုကရေစီပြောင်းလဲမှုဖြစ်စဉ်တိုင်းအတွက် မရှိမဖြစ်လိုအပ်တဲ့ပထမဆုံးသော ခြေလှမ်းများဖြစ်တယ်လို့ ဖော်ပြထားပါတယ်။

ဥရောပသမဂ္ဂအနေနဲ့လည်း မြန်မာ့အရေးကို အာဆီယံနိုင်ငံများနဲ့တွေ့ဆုံဆွေးနွေးရန် နိုင်ငံတကာအသိုင်းအဝိုင်းကိုဖိတ်ခေါ်မှုများပြုလုပ်ထားကြောင်းနဲ့ ကလေးသူငယ်များအပါအဝင် အတင်းအကြပ် တပ်သားသစ်စုဆောင်းခြင်းကို တားဆီးကာကွယ် ပေးတဲ့လှုပ်ရှားမှုများ အပါအဝင် အထောက်အကူပြုမယ့်လူသားချင်း စာနာ ထောက်ထားမှု ဆိုင်ရာနဲ့ ဖွံ့ဖြိုးရေး လုပ်ငန်းများကို ဆက်လက်ရန်ပုံငွေ ထောက်ပံ့ သွားမယ်လို့ဆိုထားပါတယ်။

မြန်မာနိုင်ငံအရေးကိစ္စကြောင့် နောက်ဆက်တွဲဖြစ်ပေါ်လာတဲ့ ဒုက္ခသည်အကျပ်အတည်းကို ဖြေရှင်းရာမှာ အာဆီယံဥက္ကဌရဲ့ အထူးကိုယ်စားလှယ်အပါအဝင် အာဆီယံအဖွဲ့အစည်းရဲ့ ပဓာနကျတဲ့ အခန်းကဏ္ဍနဲ့ ဘုံသဘောတူညီချက် ငါးရပ်အပေါ် မိမိတို့၏ အားပေးထောက်ခံပြီး အာဆီယံနဲ့ ကုလသမဂ္ဂ အထူးကိုယ်စားလှယ်တွေအကြား ပူးပေါင်းဆောင်ရွက်မှုကို ကြိုဆိုတယ်လို့ ထုတ်ပြန်ချက်မှာ ဖော်ပြထားပါတယ်။

ဖော်ပြချက်များကအမေရိကန်သံရုံးနဲ့ ဥရောပသမဂ္ဂအဖွဲ့အစည်းအနေနဲ့ မြန်မာနိုင်ငံရဲ့ စစ်တပ်အာဏာသိမ်းမှု၄နှစ်ပြည့် အထိမ်းအမှတ်ကြေငြာချက်တွေကို ယနေ့ ၂၀၂၅ခုနှစ် ဖေဖော်ဝါရီ၁ရက်မှာ သူတို့ရဲ့ လူမှုကွန်ယက်စာမျက်နှာတွေ ကတဆင့် ထုတ်ပြန်လာတာဖြစ်ပါတယ်။

Photo:CJ

Credit - VOM News Agency

#သတင်းဟင်းလေးအိုးကြီး