ရှမ်းပြည်တောင်ပိုင်းမှာ ၁၀ ရက်အတွင်း လိုင်စင်မဲ့ယာဉ် အစီးရေ ၁၅၀၀ ကျော် ဖမ်းဆီးခံရ
ဇွန် ၉၊ ၂၀၂၅
ZY(VOM)
ရှမ်းပြည်နယ်တောင်ပိုင်းဒေသမှာ ပြီးခဲ့တဲ့ မေလ ၃၁ရက်ကနေ ဒီကနေ့ ဇွန်လ ၉ရက်၊ မနက်ပိုင်းအချိန်ထိ ၁၀ရက်တာကာလအတွင်း လိုင်စင်မဲ့ကား၊ ဆိုင်ကယ် အစီးရေ ၁၅၀၀ကျော် ဖမ်းဆီးခံထားရတယ်လို့ ယာဉ်ထိန်းသတင်းရင်းမြစ်တွေထံကနေ သိရပါတယ်။
တောင်ကြီးအပါအဝင် ရှမ်းပြည်နယ်တောင်ပိုင်းက မြို့တွေမှာ စီမံချက်ကြောင့်ဟုဆိုကာ လိုင်စင်မဲ့ ကား၊ ဆိုင်ကယ်တွေ မေလ ၃၁ရက်က စတင်ပြီး မြို့အဝင်အထွက် အပြင် မြို့တွင်းက လမ်းဆုံလမ်းခွ၊ လမ်းမကြီးတွေမှာ လိုက်လံဖမ်းဆီးခဲ့ရာ ကားအစီးရေ ၅၅၀ကျော်၊ ဆိုင်ကယ် အစီးရေ ၉၅၀ကျော်ဖမ်းမိခဲ့တယ်လို့ ဆိုပါတယ်။
"အရင်လို ညှိပြီး ပြန်ထုတ်ပေးလို့ မရတော့ဘူး။ အခုက ဖမ်းပြီးတာနဲ့ တစ်ခါတည်း စာရင်းစစ်ချုပ်ရုံးကို ပို့ရတာ။ အရောင်းပြခန်းတွေပါ လိုက်စစ်ပေမယ့် တစ်စီးမှတော့ မဖမ်းမိဘူး။ သတင်းကြိုရလို့ ရှောင်ထားကြတာ ထင်တယ်။ လမ်းမတွေမှာတော့ စစ်ဆေးမှုတွေ ဆက်တိုက်ပြုလုပ်မှာပါ။ အိမ်ခြံဝန်းထဲအထိ လိုက်ဖမ်းတယ်ဆိုတာကတော့ သတင်းအမှားပါ"လို့ သတင်းရင်းမြစ်တယောက်က VOMကို ပြောပါတယ်။
တောင်ကြီး၊ ညောင်ရွှေ၊ ကလော၊ အောင်ပန်း၊ ပင်းတယ၊ ရွာငံ ၊ ရွှေညောင်၊ လွိုင်လင်၊ ပင်လုံ၊ နမ့်စန်၊ ပင်လောင်းမြို့တို့မှာ လိုင်စင်မဲ့ယာဉ်စစ်ဆေးဖမ်းဆီးမှုတွေ ဆက်တိုက်ပြုလုပ်နေတာကြောင့် အသွားအလာနည်းနေတယ်လို့ သိရပါတယ်။
"အခုလည်း ချယ်ရီကွင်းလမ်းထိပ်နားမှာ ဖမ်းနေတယ်။ ဖမ်းခံထားရတဲ့ ကား၊ ဆိုင်ကယ်တွေလည်း တွေ့ခဲ့တယ်။ မြို့တွင်းကော၊ လမ်းမကြီးတွေမှာကော တိတ်ဆိတ်ခြောက်ကပ်နေတာပဲ။ တချို့ကတော့ မထွက်လို့ရပေမယ့် တချို့ကြတော့လည်း ကလေးကျောင်းကြိုကျောင်းပို့၊ အလုပ်သွားရတာတွေရှိတော့ အတော်လေးဒုက္ခရောက်နေကြတယ်"လို့ တောင်ကြီးဒေသခံတယောက်က VOMကို ပြောပါတယ်။
ဒါ့အပြင် အခုလိုလိုင်စင်မဲ့ယာဉ်တွေ ဖမ်းဆီးနေမှုကြောင့် လိုင်စင်မဲ့ယာဉ်တွေကို အားထားပြီး တနိုင်တပိုင်ဈေးရောင်းချနေကြရသူတွေ အခက်တွေ့နေရသလို မြို့တွေမှာ စျေးရောင်းနေကြတဲ့ စျေးသည်တွေကလည်း စျေးဝယ်သူတွေ နည်းပါးနေတဲ့အတွက် ရောင်းအားထက်ဝက်နီးပါးကျဆင်းလာနေတယ်လို့လည်း သိရပါတယ်။
ဓာတ်ပုံ-gg
