◼ တူရကီ တိုက်လေယာဉ် ၄၈ စီး ဝယ်ယူရန် အင်ဒိုနီးရှားသဘောတူ
တူရကီနိုင်ငံမှ KAAN တိုက်လေယာဉ် ၄၈ စီး ဝယ်ယူမည့်ကန်ထရိုက်စာချုပ်ကို လက်မှတ်ရေးထိုးလိုက်ကြောင်း အင်ဒိုနီးရှားကာကွယ်ရေး ဝန်ကြီးဌာန က ပြောကြားသည်။
ယင်းမှာ ၎င်းတို့၏ စစ်လက်နက်ပစ္စည်းများ ခေတ်မီရန် ရည်ရွယ်ထားသော အရှေ့တောင်အာရှနိုင်ငံမှ နောက်ဆုံး ထွက်ပေါ်လာသော ဝယ်ယူမှုဖြစ်သည်။
လေတပ်ကို အဆင့်မြှင့်တင်ရန်ဂျကာတာက ပြင်သစ်နိုင်ငံလုပ် ရာဖေးလ်တိုက်လေယာဉ် ၄၂ စီးကို ၂၀၂၂ ခုနှစ် က အမေရိကန်ဒေါ်လာ ၈ ဒသမ ၁ ဘီလီယံဖြင့် မှာယူခဲ့သည်။
ထို့ပြင် တရုတ်နိုင်ငံလုပ် J-10 တိုက်လေယာဉ်များ ဝယ်ယူရန် ဂျကာတာက စဉ်းစားနေသလို အမေရိကန်လုပ် F-15EX တိုက်လေယာဉ်များ ဝယ်ယူရန်လည်း ဆက်လက်ဆွေးနွေးနေသည်။
အစ္စတန်ဘူလ်မြို့၌ ကျင်းပနေသည့် နိုင်ငံတကာကာကွယ်ရေးလုပ်ငန်းပြပွဲ အတွင်း အင်ဒိုနီးရှားနှင့် တူရကီတို့က အကောင်အထည်ဖော်ရေးကန်ထရိုက်စာချုပ် ချုပ်ဆိုခဲ့ကြသည်ဟု ကာကွယ်ရေးဝန်ကြီးဌာန ပြောရေးဆိုခွင့်ရှိသူ ဖရီဂါဝီနက်စ်အင်ခရီဝမ် က ထုတ်ပြန်ပြောကြားသည်။
သို့ရာတွင် စာချုပ်တန်ဖိုးနှင့် ပေးပို့မည့်အချိန်စသော အသေးစိတ်များကို ၎င်းက ပြောကြားခြင်းမရှိပေ။
KAAN တိုက်လေယာဉ် သည် တူရကီနိုင်ငံ၏ ပထမဆုံးအမျိုးသားတိုက်လေယာဉ် ဖြစ်ကာ ၎င်းတို့၏ ပထမဆုံးပျံသန်းမှုများအား ပြီးခဲ့သည့်နှစ် ဖေဖော်ဝါရီလက အောင်မြင်ခဲ့သော်လည်း ၂၀၂၈ ခုနှစ်မတိုင်မီအထိ ဆက်တိုက် ထုတ်လုပ်မည်ဟု မျှော်လင့်မထားကြပေ။
အဆိုပါ တိုက်လေယာဉ်များမှာ ပဥ္စမမျိုးဆက် တိုက်လေယာဉ်များဖြစ်ကြောင်း တူရကီ ကာကွယ်ရေးဝန်ကြီးဌာနက ပြောကြားပြီး ၎င်းတို့အား ဂျင်နရယ်အီလက်ထရစ်ကုမ္ပဏီထုတ် F-110 အင်ဂျင်များ တပ်ဆင်ထားကြောင်း သိရသည်။
ယင်းအင်ဂျင်များကို လော့ဟိဒ်မာတင်ကုမ္ပဏီထုတ် F-16 တိုက်လေယာဉ်များတွင်လည်း အသုံးပြုထားသည်။
နှစ်နိုင်ငံကြား စာချုပ် လက်မှတ်ရေးထိုးခြင်းအား အင်ဒိုနီးရှားကာကွယ်ရေးဝန်ကြီး ဆာဖရီ ရှမ်ဆိုဒင် ၏ ရှေ့မှောက်တွင် လုပ်ဆောင်ခဲ့ခြင်းဖြစ်ကြောင်း နှင့် နှစ်နိုင်ငံကြား ပူးတွဲနည်းပညာဖွံ့ဖြိုးမှုဆောင်ရွက်ရေး နှင့် အင်ဒိုနီးရှား၏ ကာကွယ်ရေးစက်မှုလုပ်ငန်း အား တိုးချဲ့ရေးတို့ကို ကန်ထရိုက်စာချုပ်က ထပ်မံအတည်ပြုခဲ့ကြောင်း ပြောခွင့်ရသူ ဖရီဂါ က ပြောကြားသည်။
ထို့ပြင် အစ္စတန်ဘူလ် ကာကွယ်ရေးပြပွဲမှာပင် Milgem Istif အတန်းအစား ဖရီးဂိတ်စစ်သင်္ဘောနှစ်စီး ကို ဝယ်ယူရန် တူရကီ TAIS သင်္ဘောကျင်းနှင့် အင်ဒိုနီးရှားက လက်မှတ်ရေးထိုးခဲ့သည်ဟု ကာကွယ်ရေးဝန်ကြီး ဆာဖရီက ယမန်နေ့ညတွင် ပြောကြားသည်။
ဖရီးဂိတ်သင်္ဘောဝယ်ယူခြင်းနှင်ပတ်သက်၍ အသေးစိတ်သိရှိရန် ရိုက်တာသတင်းဌာန၏ မေးမြန်းမှုများအား ကာကွယ်ရေးဝန်ကြီးဌာနက ချက်ခြင်း မတုံ့ပြန်ခဲ့ကြောင်း သတင်းက ဖော်ပြသည်။
သတင်း-ရဲမင်း
ကိုးကား- Reuters
#နိုင်ငံတကာသတင်း
