Part-2
သူငယ်ချင်း မောင်သာနိုး
မန်းတက္ကသိုလ်ကလောင်ရှင်အသင်းက ၁၉၅၈ ခုနှစ်မှာ တင်မိုးရဲ့ “ဖလ်မီး အိမ်’ ကဗျာစာအုပ် စထုတ်တော့ စာပေဗိမာန်ဆုရခဲ့ပါတယ်။ ထင်ရှားတဲ့ ကဗျာ ဆရာကြီးတွေကို ကျော်ဖြတ်ပြီး တက္ကသိုလ်ကျောင်းသားတစ်ယောက်အဖြစ်နဲ့ ဆုရတာဖြစ်လို့ လှုပ်လှုပ်ရှားရှားဖြစ်ခဲ့ပါတယ်။ နောက်နှစ်တွေမှာလည်း တင်မိုးပြီးတော့ ကြည်အောင်၊ မောင်စွမ်းရည်၊ ကိုလေး(အင်းဝဂုဏ်ရည်)၊ ဘုတလင်ချစ်လေးတို့ အပြင် ကလေးကဗျာဆုဘက်ကလည်း မောင်သန်းဌေး၊ မောင်မျိုးမြင့် စတဲ့ ကျောင်း သားတွေပါ ဆက်ပြီး စာပေဆုတွေရကြလို့ စာပေလောကတစ်ခုလုံးပါ လှုပ်လှုပ် ရှားရှား ဖြစ်ခဲ့ပါတယ်။
ကိုသာနိုးနဲ့ တင်မိုးတို့က လူထုဂျာနယ်မှာ ကလောင်သွေးလာခဲ့ကြတာက အတူတူလို့ ဆိုနိုင်ပါတယ်။ ဒါပေမဲ့ ကိုသာနိုးက ၁၉၅ဝ ပြည့်နှစ် လူထုဂျာနယ် စာပေပြိုင်ပွဲ ဆောင်းပါးကဏ္ဍမှာ ပါဝင်ယှဉ်ပြိုင်တော့ ဒုတိယဆု ရခဲ့ပါတယ်။ ဆောင်းပါးခေါင်းစီးက “ကျောင်းများ၌ မာစ်စာပေ သင်သင့်သည်”တဲ့။ ကိုသာနိုးက ၁၀ တန်းကျောင်းသားပါ။ ပထမရသူက ဝက်စလီ ဟိုက်စကူးက ကျောင်းသားကြီး တစ်ဦးပါ။ နောက်တစ်နှစ် ၁ဝ တန်းအောင်တော့ ကိုသာနိုးက လူထုသတင်းစာမှာ ညအယ်ဒီတာဝင်လုပ်သတဲ့။ လူထုဒေါ်အမာအတွက် ရေဒီယိုတွေက နိုင်ငံခြား သတင်းတွေ လိုက်ကူးပေးရတယ်။ နိုင်ငံခြားသတင်းတွေကိုလည်း ဘာသာပြန်ပေး ရပါတယ်။ ဆန်းထွန်း (မန်းတက္ကသိုလ်)ကလည်း လူထုမှာ အယ်ဒီတာလုပ်ဆဲ ဖြစ်ပါတယ်။ ကိုသာနိုးက မောင်သိင်္ဂါ ကလောင်အမည်နဲ့ ကဗျာတွေ၊ စာတွေရေးနေချိန်မှာ တင်မိုးက ကိုရင်လေးဘဝနဲ့ မန္တလေးမှာနေရင်း ကန်မြဲ နန်းမြင့်နွယ် ကလောင်အမည်နဲ့ ကဗျာတွေအများကြီး ရေးခဲ့ပါတယ်။ အဲဒီကာလမှာ လူထုအယ်ဒီတာက သူရ(ရှမ်းပြည်)တဲ့။
တက္ကသိုလ်ရောက်ကြတော့ နိုးတို့၊ မိုးတို့ ဆုံမိကြပြီး မောင်သိင်္ဂါက မောင် သာနိုးဖြစ်လာပြီး ကန်မြဲနန်းမြင့်နွယ်က တင်မိုးဖြစ်လာခဲ့ပါတယ်။ တင်မိုးနဲ့ တွေ့ တဲ့ အခါ ကြည်လင်လည်း ကြည်အောင်ဖြစ်လာပြီး မောင်ဝင်းဖေ(မြင်းခြံ)လည်း မောင် စွမ်းရည် ဖြစ်လာခဲ့ပါတယ်။
တင်မိုးက အင်္ဂလိပ်စာဖတ်ရာမှာရော၊ ရေးရာမှာရော အလွန်အားနည်း ပါတယ်။ ဒါပေမဲ့ အင်္ဂလိပ်က မြန်မာလို၊ မြန်မာက အင်္ဂလိပ်လို ဘာသာပြန်ဆို ဖို့ကိုတော့ သူများကို အမြဲတိုက်တွန်းပါတယ်။ အထူးသဖြင့် . ကိုသာနိုးကိုပဲတိုက်တွန်းတာပါ။ တခြားလည်း မရှိပါဘူး။ ကျွန်တော်တို့ တက္ကသိုလ်ရောက်စနှစ် မှာပဲ မြန်မာစာဌာနက ဆရာဦးမောင်မောင်တင်က သူ့တပည့် မောင်သာနိုးအကြောင်း ကို ဆောင်းပါးရေးပါတယ်။ မောင်သာနိုးဟာ သီပေါမင်းနဲ့အတူ ပါတော်မူတဲ့ တိုင်တားမင်းကြီးရဲ့ မြေးဖြစ်ကြောင်း၊ ကျောက်ဆောက်မြို့စားမျိုးဖြစ်လို့ သူ့နာမည်မှာ ကျောက်ဆောက်သာနိုးဖြစ်ကြောင်း၊ တက္ကသိုလ်ကျောင်းသားအဖြစ် တရားဝင် မှတ်ပုံတင်နာမည်မှာ ကျောက်ဆောက်သာနိုးဖြစ်ကြောင်း၊ သူဟာ ပါဠိနဲ့ အင်္ဂလိပ်စာ ထူးချွန်ကြောင်း စသည်ဖြင့် ရေးပါတယ်။ နိုင်ငံရေးနဲ့ထောင်ကျဖူးတဲ့ တပည့် ကျောင်းသားအကြောင်းကို ဆရာကိုယ်တိုင်က ရေးတာပါ။ ဒီလိုရေးရဲဖို့ မလွယ်ပါ။ ဆရာဦးမောင်မောင်တင်က မန္တလေးဇာတိဖြစ်တဲ့အပြင် သူကိုယ်တိုင်ကလည်း မှူးမျိုး မတ်မျိုးတွေထဲကဖြစ်ပါတယ်။ စာတော်တဲ့ ကျောင်းသားတွေကိုလည်း အားပေးတတ် ပါတယ်။ တင်မိုးတို့၊ မောင်သိန်းနိုင်တို့ကို သူ့အိမ်ပေါ်ခေါ်တင်ထားပြီး ကျောင်း စရိတ်ရအောင် ကျူရှင်ဆရာလုပ်ဖို့ အလွတ်ပညာသင်ကျောင်းကြီးတွေနဲ့ ဆက်သွယ် ပေးခဲ့ပါတယ်။
#ဆက်ရန်ရှိ
