ဆိုင်းငံ့ခံထားရတဲ့ တောင်ကိုရီးယားသမ္မတကို လစာတိုးပေးမှု ပြည်သူတွေ ဝေဖန်နေ
ဆိုးလ်၊ ဇန်နဝါရီ ၁၃
တောင်ကိုရီးယား စစ်အုပ်ချုပ်ရေး ကြေညာခဲ့တာကြောင့် စွပ်စွဲပြစ်တင်ပြီး တာဝန်ကနေဆိုင်းငံ့ထံထားရတဲ့ တောင်ကိုရီးယားသမ္မတ ယွန်းဆွတ်ခ်ယိုးလ်ရဲ့ နှစ်စဉ်လစာကို တိုးပေးမယ်လို့ တောင်ကိုရီးယား အစိုးရက ပြောပါတယ်။
သမ္မတယွန်းရဲ့လစာကို အစိုးရအရာရှိတွေအတွက် စံနှုန်းသတ်မှတ်ချက်တွေနဲ့အညီ ၃ ရာခိုင်နှုန်းတိုးမှာဖြစ်ပြီး ဝမ် ၂၆၂ ဒသမ ၆ သန်း သိုမဟုတ် ဒေါ်လာ ၁၇၉၀၀၀ ရရှိလာမှာဖြစ်ပါတယ်။ ဒီလိုလစာတိုးမြှင့်ပေးတဲ့အပေါ် တောင်ကိုရီးယားပြည်သူတွေကြားမှာတော့ ဝေဖန်မှုတွေမြင့်တက်နေပါတယ်။
သမ္မတယွန်းကို လစာ ၃ ရာခိုင်နှုန်းတိုးပေးလိုက်တဲ့နှုန်းဟာ တောင်ကိုရီးယား အခြေခံလုပ်ခလစာနှုန်းရဲ့ နှစ်ဆနီးပါးရှိတယ်လို့ ဝေဖန်သူတွေက ထောက်ပြကြပါတယ်။ ဒါပေမယ့်လည်း သူဟာ ရာထူးကနေ ရပ်ဆိုင်းထားခံရပေမယ့် သူ့အမှုကို ဖွဲ့စည်းပုံအခြေခံဥပဒေခုံရုံးက အတည်မပြုခင်ထိ ရာထူးကတော့ ဆက်လက်ရှိနေဆဲဖြစ်ပါတယ်။
ဒီဇင်ဘာလမှ စွပ်စွဲပြစ်တင်ခံရပြီးနောက် ပုန်ကန်မှု၊ အာဏာအလွဲသုံးစားမှုတို့နဲ့ စုံစမ်းစစ်ဆေးခံနေရတဲ့ သမ္မတယွန်းဆွတ်ခ်ယိုးလ်ဟာ သူ့ကို ဖမ်းဆီးဖို့ ကြိုးပမ်းမှုတွေကိုလည်း ငြင်းဆန်ခဲ့တာကြောင့် တောင်ကိုရီးယားမှာ နိုင်ငံရေးအကြပ်ရိုက်မှု ပိုမိုဆိုးရွားလာနေပါတယ်။
သူ့ကို ၀ရမ်းနဲ့အတူ ဖမ်းဆီးဖို့ကြိုးပမ်းတဲ့အဖွဲ့ကို သမ္မတရဲ့လုံခြုံရေးအဖွဲ့ တားဆီးခဲ့တာကြောင့် ဖမ်းဆီးမှုကို ရပ်ဆိုင်းခဲ့ရပါတယ်။ ဒီဖမ်းဆီးမှုဟာ တရားမဝင်ဘူးလို့ သမ္မတရဲ့တရားရေးအဖွဲ့ကလည်း ဆိုပါတယ်။ ဖမ်း၀ရမ်းဟာ ဇန်နဝါရီ ၇ ရက် ညသန်းခေါင်းမှာ ကုန်ဆုံးခဲ့ပေမယ့် ဒေသခံတရားရုံးက သက်တမ်းတိုးထားတာကြောင့် နောက်ကြိမ် ဖမ်းဆီးမယ့်အရေးနဲ့ ရင်ဆိုင်ရနိုင်ပါတယ်။
Ref:BBC
Photo:CDN
#centralnewsnaypyitaw
