ကမ္ဘာ့ကျန်းမာရေးအဖွဲ့ကနေ နုတ်ထွက်ဖို့အပါအဝင် အမိန့်များစွာကို ဒေါ်နယ်ထရန့် လက်မှတ်ထိုး
ဝါရှင်တန်၊ ဇန်နဝါရီ ၂၁
အမေရိကန်သမ္မတဖြစ်လာပြီးနောက် နာရီပိုင်းအတွင်းမှာပဲ ဒေါ်နယ်ထရန့်ဟာ အမိန့်များစွာကို လက်မှတ်ရေးထိုးထုတ်ပြန်နေပြီး ကမ္ဘာ့ကျန်းမာရေးအဖွဲ့ကနေ နုတ်ထွက်မယ့်လုပ်ငန်းစဉ် စတင်ဖို့ အမိန့်ရပ်ကိုလည်း လက်မှတ်ထိုးလိုက်ပါတယ်။
ဒီကိစ္စကလည်း ကိစ္စကြီးတခုပဲလို့ အိမ်ဖြူတော်ကို တကျော့ပြန်ရောက်လာတဲ့ ထရန့်ကပြောပါတယ်။ ဒါဟာ အမေရိကန်အနေနဲ့ ကမ္ဘာ့ကျန်းမာရေးအဖွဲ့ကနေ ဒုတိယအကြိမ်မြောက် နုတ်ထွက်ဖို့ကြိုးပမ်းမှုလည်း ဖြစ်ပြီး သူ့ပထမအကြိမ် သမ္မတသက်တမ်းအတွင်း ကိုဗစ်ကပ်ရောဂါအပေါ် ကမ္ဘာ့ကျန်းမာရေးအဖွဲ့ရဲ့ ကိုင်တွယ်မှုကြောင့် နုတ်ထွက်ဖို့ စီစဉ်ခဲ့ပါတယ်။
နောက်ပိုင်းမှာတော့ ဂျိုးဘိုင်ဒင်တက်လာပြီးနောက် ဒီဆုံးဖြတ်ချက်ကို ပြောင်းလဲခဲ့ပါတယ်။ ဒါအပြင် ပါရီရာသီဥတုပြောင်းလဲဆိုင်ရာ သဘောတူညီချက်ကနေလည်း နုတ်ထွက်မယ်လို့ ထရန့်က ကတိပြုလိုက်ပြန်ပါတယ်။ ထရန့်လက်ထက် ၂၀၁၇ ခုနှစ်ကလည်း အလားတူလုပ်ဆောင်ခဲ့ပေမယ့် ဂျိုးဘိုင်ဒင်လက်ထက်မှာ ပြောင်းပြန်ဆုံးဖြတ်ခဲ့ပါတယ်။
ရာသီဥတုပြောင်းလဲမှုဆိုင်ရာစည်းမျဉ်းတွေကို ပြောင်းပြန်လှန်ကာ ရေနဲ့နဲ့ သဘာ၀ဓါတ်ငွေ့ တိုးထုတ်မယ့် အမျိုးသားစွမ်းအင် အရေးပေါ်အခြေအနေကိုလည်း အိမ်ဖြူတော်က ကြေညာခဲ့ပါတယ်။
ဒါအပြင် ဒေါ်နယ်ထရန့်ဟာ တစ်တော့ကို ရောင်းချဖို့နဲ့ ဒါမှမဟုတ်ရင် အမေရိကန်မှာ တားမြစ်ပိတ်ပင်မယ့် ဥပေဒနဲ့ပတ်သက်ပြီး ၇၅ ရက် ဆိုင်းငံ့တဲ့ အမိန့်တရပ်ကိုလည်း လက်မှတ်ရေးထိုးခဲ့ပြန်ပါတယ်။
လူဝင်မှုကြီးကြပ်ရေးဆိုင်ရာ အမိန့်အနေနဲ့ကတော့ တရားမဝင်ရွှေ့ပြောင်းနေထိုင်သူတွေကို အစုလိုက်အပြုံလိုက် နှင်ထုတ်မယ့် အစီအမံတွေပါဝင်နေပြီး တောင်ပိုင်းနယ်စပ်ကို အရေးပေါ်အခြေအနေ ကြေညာလိုက်ပါတယ်။ ဘိုင်ဒင်အစိုးရလက်ထက် လူဝင်မှုကြီးကြပ်ရေးတွေကို ပြင်ဆင်မှုအဖြစ် ခှိုလှုံခွင့်တောင်းသူတွေ နယ်စပ်မှာ ရက်ချိန်းယူရတဲ့ CBP One အက်ပလီကေးရှင်းကိုလည်း ဖျက်သိမ်းလိုက်ပါတယ်။
သူ လက်မှတ်ရေးထိုး ထုတ်ပြန်တဲ့အမိန့်တွေထဲမှာ ၂၀၂၁ ခုနှစ် ဇန်နဝါရီ ၆ ရက်တုန်းက အမေရိကန်လွှတ်တော် အဆောက်အဦမှာ ဖြစ်ခဲ့တဲ့အဓိကရုဏ်းနဲ့ဆက်နွှယ်နေသူ ၁၆၀၀ လောက်ကိုလည်း ထရမ့်က လွတ်ငြိမ်းခွင့် ပေးလိုက်ပါတယ်။
ဒါအပြင် Doge လို့ခေါ်တဲ့ အစိုးရစွမ်းဆောင်ရည်ဌာနကိုလည်း ဖွဲ့စည်းဖို့ အမိန့်နဲ့အတည်ပြုလိုက်ပြီး ဒီဌာနကိုတော့ ဘီလျံနာ သူဌေး အီလွန်မက်စ်က ဦးဆောင်သွားမှာဖြစ်ပါတယ်။
မိမိတို့အနေနဲ့ အရှုံးနဲ့ဘယ်တော့မှ ရင်ဆိုင်ရမှာမဟုတ်ဘဲ အမေရိကန်ဟာ အချုပ်အခြာအာဏာပိုင်နိုင်ငံတနိုင်ငံအနေနဲ့ အနာဂတ်က မိမိတို့လက်ထဲမှာရှိပြီး အမေရိကန်ရဲ့ ရွှေခေတ်အစုပြုတော့မယ်လို့ ဒေါ်နယ်ထရန့်ကပြောပါတယ်။
Ref:BBC
Photo:Getty Images
#centralnewsnaypyitaw
