သရုပ်ဆောင်တွေရဲ့ လှူဒါန်းမှုဟာ အကယ်ဒမီကြောင့် မဟုတ်ဘူးလို့ ရုပ်ရှင်အစည်းအရုံး ဒုဥက္ကဋ္ဌ ပြော
ဖေဖော်ဝါရီ ၃
လက်ရှိ သရုပ်ဆောင်တွေရဲ့ လှူဒါန်းမှုဟာ အကယ်ဒမီကြောင့် မဟုတ်ဘူးလို့ မြန်မာနိုင်ငံ ရုပ်ရှင်အစည်းအရုံး ဒုတိယဥက္ကဋ္ဌ ဦးအေးကြူလေးက ပြောပါတယ်။
လက်ရှိမှာ တချို့သော မီဒီယာတွေဟာ “ရုပ်ရှင်ထူးချွန်ဆုပေးကာနီးတွင် ရုပ်ရှင်သရုပ်ဆောင်များ ရုပ်ရှင်အစည်းအရုံးသို့ အပြိုင်အဆိုင်လှူဒါန်းကြ” ဆိုတဲ့ ခေါင်းစဉ်နဲ့ ပရိသတ်အထင်မှားစရာ၊ အထင်သေးစရာ သတင်းဆိုးတွေကို ဖော်ပြလျက်ရှိတယ်လို့ မြန်မာနိုင်ငံ ရုပ်ရှင်အစည်းအရုံး က ထုတ်ပြန် အသိပေးထားပါတယ်။
ဒီအကြောင်းအရာနဲ့ ပတ်သက်လို့ ဦးအေးကြူလေးက “လှူတာက ဆန်၊ ဆီဝေတဲ့ကိစ္စ လှူတာလေ။ အကယ်ဒမီပေးပွဲနဲ့ နည်းနည်းနီးတဲ့အခါကျတော့ လူတွေက အကယ်ဒမီကြောင့် လှူတယ်ဆိုပြီး ပြောနေကြတာ။ တကယ်က လုပ်လို့မှမရတာ။ လှူလည်း သူ့ဘာသာသူ လှူတာပဲရှိတာပဲ။ ကျွန်တော်တို့ဒီဘက်က ဘုတ်အဖွဲ့က ၂၀ ကျော်ရှိတယ်။ အဲဒီ ၂၀ ကျော်မဲနဲ့ သွားတာလေ။ အဲဒီလိုဆိုတော့ ဘယ်သူရမယ်ဆိုတာ ဘုတ်အဖွဲ့ဝင်တွေတောင် မသိဘူး။ သပ်သပ်စီဖြစ်နေတာပေါ့။ အဲဒီတော့ သူတို့ ဒီလိုပြောလိုက်တဲ့အတွက် ရုပ်ရှင်အစည်းအရုံးကို နောက်ပိုင်း လှူမယ့်သူတွေက ဘာပဲဖြစ်ဖြစ် တွန့်သွားတာပေါ့။ အဲဒီအတွက်တော့ မကောင်းဘူး” လို့ ပြောပါတယ်။
ရုပ်ရှင်လောကသားတွေကို ဆန်၊ဆီ၊ ကြက်သွန်နီ၊ ပဲ၊ ငါးသေတ္တာ အစရှိတဲ့ စားသောက်ကုန်တွေကို ဖြန့်ချိ လှူဒါန်းတဲ့အလှူမှာ ထုတ်လုပ်သူတွေ၊ သရုပ်ဆောင်တွေနဲ့ စေတနာရှင်တွေက ရုပ်ရှင်အစည်းအရုံးမှတဆင့် ကူညီ လှူဒါန်းပေးခြင်းဖြစ်ပြီး လက်ရှိ လှူဒါန်းမှုဟာ ရုပ်ရှင်ထူးချွန်ဆုပေးပွဲ အချိန်နဲ့ တိုက်ဆိုင်သွားခြင်းမျှသာဖြစ်တယ်လို့ ထုတ်ပြန်ချက်မှာ ဖော်ပြထားတာပါ။
“မြန်မာနိုင်ငံ ရုပ်ရှင်အစည်းအရုံး ဆိုတာကလည်း ပိုက်ဆံ သီးခြား ရှိတာမှမဟုတ်တာ။ အလှူငွေလေးနဲ့ ရပ်တည်ပြီးတော့ ဆန်၊ ဆီဝေတာ အခုဆို ၁၆ ကြိမ်တောင် ရှိနေပြီ။ အဲဒီလို တခါဝေဖို့ဆိုရင် အခုအချိန်ဆိုရင် ကုန်ကျစရိတ်က သိန်း ၈၀၀ ၊ ၁၀၀၀ ကုန်တာလေ။ အဲဒီလို သုံးလ တခါ ဝေနိုင်ဖို့ဆိုတာ ရေရှည်ကျတော့ တော်တော်ခက်တာ။ မနည်းရုန်းရတာ။ အခုလို အလှူလေးတွေ လာတာနဲ့ဆိုတော့ ရုပ်ရှင်အစည်းအရုံးက စိုက်ရတာ နည်းသွားတဲ့အခါကျတော့ တော်တော်သက်သာတာပေါ့။ အဲဒါမျိုးလေးတွေက နောက်ပိုင်း ကြားထဲမှာ အပိတ်အပင်တွေ ရှိလာလို့ရှိရင် လျော့သွားမှာပေါ့။ အဲဒီအတွက်က ဆုတ်ယုတ်မှုတွေ ဖြစ်လာနိုင်တယ်” လို့ ဦးအေးကြူလေးက ပြောပါတယ်။
မြန်မာနိုင်ငံ ရုပ်ရှင်အစည်းအရုံးဟာ အစိုးရမဟုတ်တဲ့ လူမှုရေးအဖွဲ့အစည်းတခုမျှသာဖြစ်ပြီး ရုပ်ရှင်ဖခင်ကြီးတွေ ဦးဆောင် ဖွဲ့စည်းခဲ့တာဟာ ၂၀၂၆ ခုနှစ်၊ မတ်လ ၈ ရက်နေ့မှာ သက်တမ်း (၈၀) ပြည့်မြောက်တော့မှာ ဖြစ်တယ်လို့ ထုတ်ပြန်ချက်မှာ ရေးသားထားပါတယ်။
အစည်းအရုံး ရေရှည်ရပ်တည်နိုင်ဖို့အတွက် နိုင်ငံတော်အစိုးရ၊ ပြန်ကြားရေးဝန်ကြီးဌာန၊ ရန်ကုန်တိုင်းအစိုးရ၊ ဆန်နှင့် ဆီကုန်သည်ကြီးများအသင်းနဲ့ စေတနာရှင်ပုဂ္ဂိုလ်တွေ၊ ရုပ်ရှင်ရုံပိုင်ရှင်တွေ၊ ထုတ်လုပ်သူတွေ၊ သရုပ်ဆောင်တွေရဲ့ ပံ့ပိုးမှုမှ ရရှိတာဖြစ်တယ်လို့ ဆိုပါတယ်။
ရုပ်ရှင်အစည်းအရုံးဟာ အာဏာပိုင်အဖွဲ့အစည်း မဟုတ်တဲ့အတွက် အာဏာလည်းမရှိ၊ လုပ်ပိုင်ခွင့်လည်း နည်းပါးတာကြောင့် ရုပ်ရှင်ထူးချွန်ဆုတွေကိုလည်း မိမိစိတ်၊ မိမိသဘောတခုတည်းနဲ့ ဆုံးဖြတ်ပြီး ပေးဆောင်ခြင်းမျိုးလည်း လုပ်ခွင့်မရှိဘူးလို့ ဆိုပါတယ်။
ဒါကြောင့် တချို့သော မီဒီယာတွေအနေနဲ့ ရုပ်ရှင်အစည်းအရုံးရဲ့ လှူဒါန်းကူညီရေးနဲ့ စည်းရုံးရေးကို ကူညီသောအားဖြင့် သတင်းဆိုး၊ သတင်းမှားတွေကို ဖော်ပြခြင်းမပြုကြဖို့ မြန်မာနိုင်ငံရုပ်ရှင်အစည်းအရုံးက မေတ္တာရပ်ခံထားပါတယ်။
Photo:CJ
Credit - VOM News Agency
#သတင်းဟင်းလေးအိုးကြီး
