ဝန်ကြီးဌာနများ ယခုဘဏ္ဍာနှစ် သုံးစွဲရမည့် အသုံးစရိတ်များ ထပ်မံလျှော့ချကာ ပိုလျှံငွေများကို ရာဂီမုန်တိုင်း နောက်ဆက်တွဲလုပ်ငန်းတွင် အမြန်ဆုံးဖြည့်ဆည်း ဆောင်ရွက်သွားမည်ဟု SAC ဒုဥက္ကဋ္ဌက မှာကြား
◾️ ယခုပြုပြင်ပြီး ခန့်မှန်းခြေ၏ ရငွေပိုင်းတွင် ကျပ်ဘီလျံ ၄,၀၀၀ ကျော် တိုးမြှင့်ရရှိအောင် လျာထား
နိုဝင်ဘာ ၂၁
ဝန်ကြီးဌာနများအနေဖြင့် ယခုဘဏ္ဍာနှစ်အတွင်း သုံးစွဲရမည့်စရိတ်များအပေါ် စိစစ်ပြီး အသုံးစရိတ်များ ထပ်မံလျှော့ချကာ ပိုလျှံငွေများကို ရာဂီမုန်တိုင်း နောက်ဆက်တွဲ လုပ်ငန်းများတွင် အမြန်ဆုံး ဖြည့်ဆည်း ဆောင်ရွက်သွားမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ (SAC) ဒုတိယဥက္ကဋ္ဌ၊ ဒုတိယဗိုလ်ချုပ်မှူးကြီးစိုးဝင်းက ယနေ့ ပြုလုပ်သည့် ၂ဝ၂၄-၂၀၂၅ ဘဏ္ဍာရေးနှစ်၊ ပြည်ထောင်စု၏ ဖြည့်စွက်ခွင့်ပြုငွေစာရင်းများ တင်ပြခြင်းဆိုင်ရာ ညှိနှိုင်းအစည်းအဝေးတွင် ပြောကြားသည်။
ယခင်နှစ်တွင် ဝန်ကြီးဌာနများက မသုံးနိုင်သည့်ပိုလျှံငွေများ ပြန်လည်အပ်နှံသည်ကို တွေ့ရှိရကြောင်း၊ ဝန်ကြီးဌာနများအနေဖြင့် ကျန်ရှိသည့် ဘဏ္ဍာနှစ်လေးလနှင့် ယခုဘဏ္ဍာနှစ်အတွင်း လုပ်ငန်းများပြီးစီးအောင် သုံးစွဲရမည့်အသုံးစရိတ်နှင့် လုပ်ငန်းပြီးစီးမှုအပေါ် စိစစ်ဆွေးနွေးပေးရန်ဖြစ်ကြောင်း SAC ဒုဥက္ကဋ္ဌက ပြောကြားသည်။
ထိုသို့ စိစစ်ရာမှ အသုံးစရိတ်များ ထပ်မံလျော့ချနိုင်မည်ဖြစ်ပြီး ရရှိလာသည့်ပိုလျှံငွေများကို ရာဂီမုန်တိုင်း နောက်ဆက်တွဲ လုပ်ငန်းများတွင် အမြန်ဆုံးဖြည့်ဆည်း ဆောင်ရွက်နိုင်မည်ဖြစ်ကာ နိုင်ငံတော်ဝန်ကြီးချုပ် သတ်မှတ်ထားသည့် မတ်လ ၁၅ ရက် မတိုင်မီပြီးစီးအောင် ပိုမိုဆောင်ရွက်နိုင်မည်ဖြစ်ကြောင်း SAC ဒုဥက္ကဋ္ဌက ပြောကြားသည်။
သက်ဆိုင်ရာဝန်ကြီးဌာနများနှင့် အဖွဲ့အစည်းများကလည်း မလိုအပ်သည့် အသုံးစရိတ်များ မသုံးစွဲမိစေရေး စိစစ်ရန်လိုပြီး ၂၀၂၄-၂၀၂၅ ဘဏ္ဍာရေးနှစ် မူလခန့်မှန်းခြေနှင့် ပြုပြင်ပြီးခန့်မှန်းခြေကို နှိုင်းယှဉ်ကြည့်မည်ဆိုပါက မူလခန့်မှန်းခြေ ရငွေပိုင်းတွင် ကျပ်ဘီလျံ ၃၁,၀၀၀ ကျော်ဖြစ်ပြီး သုံးငွေပိုင်းတွင် ကျပ်ဘီလျံ ၃၉,၀၀၀ ကျော်ဖြစ်ကြောင်း၊ ပြုပြင်ပြီး ခန့်မှန်းခြေကို ကြည့်မည်ဆိုပါက ရငွေပိုင်းတွင် ကျပ်ဘီလျံ ၃၅,၀၀၀ ကျော်ဖြစ်ပြီး သုံးငွေပိုင်းတွင် ကျပ်ဘီလျံ ၄၁,၀၀၀ ကျော် ဖြစ်ကြောင်း SAC ဒုဥက္ကဋ္ဌက ပြောကြားသည်။
ယခုတွက်ချက်ပြီးသည့် GDP မှာ ကျပ်ဘီလျံ ၁၅၅,၅၄၃ ဒသမ ၅၃၄ ဖြစ်သည့်အတွက် မူလခန့်မှန်းခြေတွင် လိုငွေ၏ GDP အချိုးအရ ၅ ဒသမ ၁၇ ရာခိုင်နှုန်းဖြစ်ပြီး ပြုပြင်ပြီး ခန့်မှန်းခြေ၏ GDP နှင့် လိုငွေအချိုးမှာ ၃ ဒသမ ၉၁ ရာခိုင်နှုန်းဖြစ်သည်ကို တွေ့ရကြောင်း SAC ဒုဥက္ကဋ္ဌက ပြောကြားသည်။
Credit - Mynmar News Network
#သတင်းဟင်းလေးအိုးကြီး
