ဒီစာအုပ်လေး မဖတ်ခင်မှာ “ Into the wild ” ဆိုတဲ့ ရုပ်ရှင်လေးကို စကြည့်ဖြစ်ခဲ့တယ် ။ စာအုပ်လေးကို ဖတ်ပြီးသွားချိန်မှာတော့ သဘာဝတရားကို ချစ်တတ်တဲ့ ကိုယ့်အတွက်တော့ စိမ်းလန်းစိုပြေနေတဲ့ သဘာဝ တရားကြီးထဲကို ဆွဲခေါ်သွားသလို ခံစားခဲ့ရတယ် ။ ရုပ်ရှင်အနေနဲ့တော့ ကြည့်ဖူးခဲ့တာကြောင့် ပိုပြီး ပုံရိပ်တွေ ပြန်ပေါ်လာခဲ့တယ် ။
ဒီစာအုပ်လေးဟာ ခရစ်စတိုဖာ ဂျွန်ဆင် မက်ကန်းဒလက်စ် ဆိုတဲ့ လူငယ်လေး တစ်ဦးရဲ့ အတ္ထုပ္ပတ္တိ ၀တ္ထု ဆိုပါတော့ ။ ခရစ် မက်ကန်းဒလက်စ် မိဘအသိုင်းအဝိုင်း တောင့်တင်းတယ် ။ ချမ်းသာတယ် ။ သူက ပညာတော်တယ် ။ ထူးချွန်စွာ ဘွဲ့ရထားတယ် ။ ခိုင်မာတဲ့ အနာဂတ်တစ်ခုရှိတယ် ။ ဒါပေမဲ့ သူဟာ အားလုံးကို စွန့်လွှတ်ခဲ့တယ် ။ ပိုင်ဆိုင်သမျှ ပိုက်ဆံတွေ အားလုံးကို လှူတယ် ။ မော်တော်ကား အပါအ၀င် ပိုင်ဆိုင်သမျှ အရာအားလုံးကို စွန့်လွှတ်ခဲ့တယ် ။ အဲလက်စ် ဆိုတဲ့ ဘ၀သစ်တစ်ခုကို ဖန်တီးပြီး မြို့ပြရဲ့ မွန်းကျပ်မှုတွေ ၊ ရှုပ်ထွေးပွေလီမှုတွေ အကုန် ထားခဲ့တယ်။ အိမ်က ထွက်လာချိန် တစ်နှစ်ကျော်အတွင်းမှာ အမျိုးမျိုးသော စွန့်စားခန်းတွေ ဖွင့်ခဲ့တယ် ။ နောက်ဆုံးမှာ အလက်စကာပြည်နယ်ထဲ ကားကြုံတားစီးပြီး မက်ကင်းလေးတောင် မြောက်ဘက် လူသူနေထိုင်ခြင်း မရှိတဲ့ ကန္တာရ တောကြီးထဲ တစ်ယောက်တည်း ၀င်သွားခဲ့တယ် ။ ဘယ်လို စွန့်စားခန်းတွေနဲ့ ဘယ်လို ဆက်ဖြစ်မလဲဆိုတာတော့ စာအုပ်လေးထဲမှာ ဆက်ပြီး ဖတ်ရှုကြည့်ပါဦးနော် ။ ဇာတ်သိမ်းကို သိပ်ပြီး ယူကြုံးမရဖြစ်မိတယ် ။ သူ့ကို ပိုပြီး ပျော်ရွှင်စေချင်တာတော့ အမှန်ပဲ ။ ရုပ်ရှင်ကိုလည်း ကြည့်ကြည့်ဖို့အတွက် Recommend ပေးချင်ပါတယ် ။
ဒီစာအုပ်ကို ရေးသားသူ Jon Krakeuer ဟာ စာရေးဆရာ တစ်ဖြစ်လည်း တောင်တက်သမား တစ်ဦးဖြစ်ပြီး သူဟာ မက်ကန်းဒလက်စ် မိသားစုအကူအညီ၊ မက်ကန်းဒလက်စ် စွန့်စားခန်း ခရီးစဉ်အတွင်း ခင်မင်ခဲ့တဲ့ မိတ်ဆွေတွေဆီ ပို့ခဲ့တဲ့ စာတွေ ပိုစ့်စကဒ်တွေ၊ မက်ကန်းဒလက်စ် ရဲ့ မှတ်စုတွေ အကူအညီနဲ့ ဒီစာအုပ်ကို ရေးဖွဲ့ခဲ့တယ်။
မက်ကန်းဒလက်စ် ဟာ စာဖတ်လည်း အလွန်ဝါသနာပါတယ် ။ သူ တောင်တက်ခရီးစဉ်တွေမှာ စာအုပ်တွေ အမြဲယူသွားတယ် ။ သူ နှစ်သက်တဲ့ စာပိုဒ်လေးတွေကို high light လုပ်ထားခဲ့တယ် ။
ဒီစာအုပ်ထဲမှာ မက်ကန်းဒလက်စ် အပြင် သူ့အရင် တစ်ကိုယ်တော် စွန့်စားသွားလာခဲ့သူတွေ အကြောင်းအရာတွေလည်း ပါတယ် ။ သူတို့တွေဟာ ရူးနေကြတာ မဟုတ်ဘူး ။ အဲဒီလို စွန့်စားသွားလာတာဟာ အသက်အန္တရာယ် ရှိမှန်းလည်း သိတယ် ။ သူတို့တွေဟာ သဘာ၀တရားကြီးနဲ့ တစ်သားတည်း ဖြစ်ချင်လို့ကို သွားလာခဲ့ကြတာပါ ။ ရိုဇယ်လင်နီ၊ ဝေါတာမန်း၊ မက်ကန်း၊ အက်ဗရက်ရူးစ် အစရှိသည်တို့ပေါ့။
မက်ကန်းဒလက်စ် ဟာ ဘာလို့ မိသားစုတွေ၊ ပိုင်ဆိုင်မှုတွေ၊ အနာဂတ်တွေ အကုန်စွန့်လွှတ်ပြီး ခုလို စွန့်စားခန်း ဖွင့်ခဲ့လဲဆိုတာ အမေရိကန် တက္ကသိုလ်တွေအားလုံးလိုလိုရဲ့ Book Club တွေထဲမှာ ဆွေးနွေးစရာ ဘာသာရပ် တစ်ခု ဖြစ်ခဲ့တယ် ။ ဒီစာအုပ်ဟာလည်း အမေရိကန်ကို ကျော်လွန်ပြီး ကမ္ဘာအနှံ့ အရောင်းရဆုံး စာရင်း၀င်ခဲ့တယ်လေ ။ မက်ကန်းဒလက်စ် ရဲ့ ဘ၀ နဲ့ သူ့ရင်ခုန်ဖွယ် စွန့်စားခန်း တစ်ခုလုံးအကြောင်း ပြည့်ပြည့်စုံစုံ နဲ့ ခံစားချင်ရင်တော့ စာအုပ်တစ်အုပ်လုံး ဖတ်ကြည့်မှကို ဖြစ်မယ်။
၀မ်းနည်းစရာ နောက်တစ်ချက်က စာအုပ်ကို မြန်မာဘာသာ ပြန်ဆိုခဲ့တဲ့ ဆရာရာပြည့်ဟာ ဒီစာအုပ်မထွက်ခင် အောက်တိုဘာထဲမှာပဲ ရုတ်တရက် ကွယ်လွန်ခဲ့တယ် ။ ဒီစာအုပ်ဟာ ဆရာ ရာပြည့် အဆုံးထိ ဘာသာပြန်ဆို ပြီးခဲ့တဲ့ နောက်ဆုံးလက်ရာလည်း ဖြစ်ခဲ့ပါတယ် ။
#ကန္တာရခရီးသည် #ရာပြည့်
