စက်သုံးဆီဈေးနှုန်းများ အနည်းငယ်မြင့်တက်လာချိန် ဗဟိုဘဏ်မှ စက်သုံးဆီလုပ်ငန်းရှင်များအတွက် ဒေါ်လာ ၂၅ သန်း ရောင်းချပေးမည်
ဇန်နဝါရီ ၁၄
စက်သုံးဆီဈေးနှုန်းများ အနည်းငယ်မြင့်တက်လာချိန် ဗဟိုဘဏ်မှ စက်သုံးဆီလုပ်ငန်းရှင်များအတွက် ဒေါ်လာ ၂၅ သန်း ရောင်းချပေးမည်ဖြစ်ပြီး သွင်းကုန်လုပ်ငန်းရှင်များအတွက်လည်း ဒေါ်လာ ၄ သန်းနီးပါး ထပ်မံထုတ်ရောင်းပေးခဲ့ကြောင်း မြန်မာနိုင်ငံတော်ဗဟိုဘဏ်က ထုတ်ပြန်ထားသည့် စာရင်းများအရ သိရသည်။
ဇန်နဝါရီလ ၁၀ ရက်မှစတင်ပြီး ဓာတ်ဆီ ၉၂ တစ်လီတာ ကျပ် ၃၀၇၅ ကျပ်၊ ဓာတ်ဆီ ၉၅ တစ်လီတာ ၃၁၆၀ ကျပ်၊ ရိုးရိုးဒီဇယ် တစ်လီတာ ၂၇၁၀ ကျပ်နှင့် ပရီမီယံဒီဇယ် တစ်လီတာ ၃၃၄၀ ကျပ်သို့ ရောက်ရှိလာပြီး ဓာတ်ဆီ ၉၂ တစ်လီတာ ကျပ် ၉၀ ကျပ်၊ ဓာတ်ဆီ ၉၅ တစ်လီတာ ၆၅ ကျပ်၊ ရိုးရိုးဒီဇယ် တစ်လီတာ ၉၅ ကျပ်နှင့် ပရီမီယံဒီဇယ် တစ်လီတာ ၁၁၅ ကျပ်ဖြင့် ဈေးနှုန်းအသီးသီးမြင့်တက်ခဲ့သည်။
ထို့ကြောင့် ဗဟိုဘဏ်မှ ဇန်နဝါရီလ ၁၃ ရက်တွင် စက်သုံးဆီလုပ်ငန်းရှင်များအတွက် ဒေါ်လာ ၂၅ သန်း ရောင်းချပေးမည်ဖြစ်ကြောင်း အသိပေးကြေညာခဲ့သည်။
ဇန်နဝါရီလ ၁၁ ရက်ကလည်း သွင်းကုန်လုပ်ငန်းရှင်များအတွက် ဒေါ်လာ ၃ ဒသမ ၉၄၃ သန်း ထုတ်ရောင်းပေးခဲ့သလို ဇန်နဝါရီလ ၁၃ ရက်တွင်လည်း တရုတ်ယွမ် ၆၀၀,၀၀၀ ထုတ်ရောင်းပေးခဲ့သည်။
ဗဟိုဘဏ်အနေဖြင့် စက်သုံးဆီလုပ်ငန်းရှင်များနှင့် သွင်းကုန်လုပ်ငန်းရှင်များအတွက် ယခုထပ်မံထုတ်ရောင်းပေးမှုအပါအဝင် ဇန်နဝါရီလ ၂ ရက်မှ ၁၃ ရက်အထိ နှစ်ပတ်အတွင်း စုစုပေါင်း ဒေါ်လာ ၈၃ ဒသမ ၅၅၇ သန်း၊ ထိုင်းဘတ် ၅ ဒသမ ၃၂၉ သန်းနှင့် တရုတ်ယွမ် ၂ ဒသမ ၅၁၄ သန်း ထုတ်ရောင်းပေးထားသည်။
နှစ်သစ်ကူးရုံးပိတ်ရက်များကြောင့် သွင်းကုန်တင်သွင်းမှုများပြီး နိုင်ငံခြားငွေလိုအပ်ချက် မြင့်မားလေ့ရှိသည့် ဒီဇင်ဘာလအတွင်းမှာလည်း ဗဟိုဘဏ်မှ ဒေါ်လာ၊ ထိုင်းဘတ်နှင့် တရုတ်ယွမ်များကို အလုံးအရင်းဖြင့် ထုတ်ရောင်းပေးခဲ့သည်။ ဒီဇင်ဘာလအတွင်း ဒေါ်လာ ၁၄၃ ဒသမ ၂၅၀ သန်း၊ ထိုင်းဘတ် ၃၂၁ ဒသမ ၈၇၁ သန်းနှင့် တရုတ်ယွမ် ၁၀ ဒသမ ၉၇၈ သန်းအထိ ထုတ်ရောင်းပေးထားသည်။
ထို့ပြင် ဗဟိုဘဏ်အနေဖြင့် ပြီးခဲ့သည့် ဩဂုတ်လ ၁ ရက်မှ နိုဝင်ဘာလ ၂၉ ရက်အထိ လေးလအတွင်း ဒေါ်လာ ၃၃၅ သန်းကျော်၊ ထိုင်းဘတ် ၁ ဒသမ ၂၇၄ ဘီလျံကျော်နှင့် တရုတ်ယွမ် ၅၆ သန်းခန့်အထိ ထုတ်ရောင်းပေးထားပြီးဖြစ်သည့်အပြင် ယခုဘဏ္ဍာနှစ် ခုနစ်လအတွင်း စက်သုံးဆီ၊ စားသုံးဆီနှင့် သွင်းကုန်လုပ်ငန်းရှင်များအတွက် ဒေါ်လာတစ်ဘီလျံလည်း သီးသန့်ထုတ်ရောင်းပေးထားသည်။
Credit - Myanmar Transparency News Agency
#သတင်းဟင်းလေးအိုးကြီး
