အသင်းလိုဂိုမှာ ကြယ်တစ်လုံးတိုးသွားတဲ့ အင်တာမီလန်
ကမ္ဘာ့ဖလားချန်ပီယံ နိုင်ငံလက်ရွေးစင်အသင်းများ၏ လိုဂိုများတွင် ချန်ပီယံဆုဖလားရရှိမှုအပေါ်အခြေခံ၍ လိုဂိုအပေါ်၌ ကြယ်ပွင့်များထားရှိသကဲ့သို့ စီးရီးအေချန်ပီယံအသင်းတချို့၏ လိုဂိုများတွင်လည်း ကြယ်ပွင့်များကို တွေ့ရမည်ဖြစ်သည်။သို့သော် ပြည်တွင်းအမှတ်ပေးချန်ပီယံဆုမှာ ကမ္ဘာ့ဖလားချန်ပီယံဆုကဲ့သို့ (၄)နှစ်မှတစ်ကြိမ် ချီးမြှင့်ခြင်းမဟုတ်ဘဲ နှစ်တိုင်းချီးမြှင့်နေသလို၊ အသင်းတစ်သင်းတည်းက အကြိမ်ကြိမ်ဆွတ်ခူးခြင်းများလည်းရှိရာ အချို့အသင်းများ၏ချန်ပီယံဆုအရေအတွက်မှာ ဆယ်ဂဏန်းဖြစ်နေသည်။ချန်ပီယံဆု ဆယ်ခုပြည့်လျှင် လိုဂိုတွင် ကြယ်တစ်လုံးတပ်ဆင်ခွင့်ရှိပြီး ယခု ချန်ပီယံဆု(၂၀)ကြိမ်မြောက် ဆွတ်ခူးခဲ့သော အင်တာမီလန်အသင်းက လိုဂိုတွင် ကြယ်(၂)လုံးတပ်ဆင်ခွင့် ရသွားခဲ့ပြီဖြစ်သည်။အင်တာမီလန်အသင်းသည် မီလန်ဒါဘီတွင် (၂-၁)ဂိုးဖြင့် အနိုင်ယူပြီးနောက် ဒုတိယနေရာမှ အေစီမီလန်ကို လက်ကျန်ပွဲ(၅)ပွဲကျန်နေချိန်တွင် (၁၇)မှတ်အထိဖြတ်ပြီး ချန်ပီယံဆုကိုအကြိမ်(၂၀)မြောက် ဆွတ်ခူးရရှိခြင်းဖြစ်သည်။ မူလက အင်တာမီလန်နှင့် အေစီမီလန်၏ စီးရီးအေ အောင်မြင်မှုမှာ ချန်ပီယံ(၁၉) ကြိမ်၊ ဒုတိယ(၁၆)ကြိမ်ဖြင့် တူညီနေပြီး ယခုရာသီ၌ အင်တာမီလန်အသင်းက မြို့ခံပြိုင်ဘက်အသင်းကို ချန်ပီယံဆုတစ်ကြိမ်အသာရခဲ့ခြင်းဖြစ်သည်။
