ပြည်တွင်းရွှေဈေး ၅၈ သိန်းကျော်အထိ ထပ်မံစံချိန်တင် မြင့်တက်
ပြည်တွင်းရွှေဈေးဟာ ဒီကနေ့ မေ ၂၉ ရက်၊ နေ့လယ်ပိုင်းမှာ ၅၈ သိန်းကျော်အထိ ထပ်မံ စံချိန်တင် မြင့်တက်လာတယ်လို့ ဈေးကွက်အတွင်းက သိရပါတယ်။
မနေ့ မေ ၂၈ ရက်၊ နေ့လယ်ပိုင်းအထိ ကျပ် ၅၃ သိန်းကျော်ဝန်းကျင်မှာ ရှိနေခဲ့တဲ့ ပြည်တွင်းရွှေဈေးဟာ နာရီပိုင်းအတွင်း ကျပ် နှစ်သိန်း ခုန်တက်ခဲ့ကာ ကျပ် ၅၅ သိန်းကျော်ကို ရောက်ရှိခဲ့တာ ဖြစ်ပြီး ဒီကနေ့ မေ ၂၉ ရက်၊ နေ့လယ်မှာတော့ ကျပ် ၅၆ သိန်းကျော်အထိ ရောက်ရှိလာကာ မိနစ်ပိုင်းအတွင်း ကျပ် ၅၈ သိန်းကျော်ဝန်းကျင် ဈေးတန်းကို ရောက်ရှိနေတယ်လို့ သိရပါတယ်။
“ရွှေဈေးကွက်ကတော့ ဈေးတွေတက်ပြီး ဈေးကွက် ပျက်နေတယ်လို့ ပြောရမှာပေါ့။ ကြိုက်ရောင်း၊ ကြိုက်ဝယ်ဖြစ်နေပြီးတော့ ဈေးကွက်လည်း မရှိတော့ပါဘူး။ အခုလို ဈေးတွေ ခုန်တက်နေတာကတော့ လူတွေကြောက်လန့်ပြီးတော့ လိုက်ဝယ်နေတာလည်း ပါမှာပေါ့။ ပြီးတော့ ငွေကြေး ဖောင်းပွမှုကြောင့်ရော၊ ဒေါ်လာဈေးတက်တာကြောင့်ရော ပါမှာပေါ့” လို့ ရွှေလုပ်ငန်းရှင်တယောက်က ပြောပါတယ်။
လက်ရှိ ဈေးကွက် အနေအထားအရ ရွှေထုတ်လုပ်ရေး လုပ်ငန်းအများစုဟာ အတုံးအခဲ ရောင်းဝယ်မှုတွေ ရပ်နားထားကြသလို စျေးကွက်မှာလည်း အရောင်းအဝယ် ငြိမ်သက်နေတယ်လို့ သိရပါတယ်။
“အခုက ဝယ်ရ၊ ရောင်းရတာ တော်တော်ခက်တယ်။ အန္တရာယ်လည်းရှိတယ်။ အဖမ်းအဆီးတွေလည်း ဖြစ်လာနိုင်တာကိုး။ အရင်တခေါက်ကလည်း လုပ်ငန်းရှင်တွေ ခေါ်ယူစစ်ဆေး မေးမြန်းတာတွေလည်း ရှိခဲ့တာဆိုတော့လေ။ အဲဒီတုန်းကတော့ ပြန်လွှတ်လိုက်ပေမယ့် ဒီတခေါက်မှာလည်း ထပ်ပြီး အဖမ်းခံရမှာ ကြောက်နေကြတယ်။ ရှောင်နေကြတဲ့သူတွေလည်း ရှိတယ်။ ဒီတခေါက် ဈေးတက်တာလည်း ကြမ်းတာကိုး” လို့ လုပ်ငန်းရှင်တယောက်က ပြောပါတယ်။
အခုလို ရွှေ၊ ငွေဈေးတွေ စံချိန်တင် မြင့်တက်နေမှုနဲ့ ပတ်သက်လို့ ပြီးခဲ့တဲ့ မေလ ဒုတိယပတ်က ဗဟိုဘဏ်ဥက္ကဋ္ဌ ဒေါ်သန်းသန်းဆွေနဲ့အတူ ပြည်ထဲရေးဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ဒုဝန်ကြီးတွေ အရေးပေါ် အစည်းအဝေးတခု ပြုလုပ်ခဲ့ကြတယ်လို့ သိရပါတယ်။
အဲဒီအစည်းအဝေးမှာ ရွှေဈေး၊ ငွေဈေး ကစားပြီး ဈေးနှုန်းမတည်မငြိမ်ဖြစ်အောင် ဆောင်ရွက်သူတွေကို ဥပဒေနဲ့အညီ ကြီးကြပ်အရေးယူသွားမှာဖြစ်တယ်လို့ ဗဟိုဘဏ်ဥက္ကဋ္ဌက ပြောဆိုထားပါတယ်။
ဆက်လက်ပြီးတော့လည်း သူက “ရွှေဈေးကွက်မှာ စနစ်တကျရောင်းဝယ်နိုင်ဖို့၊ စံချိန်စံညွှန်းနဲ့ အခြေခံဈေးနှုန်း သတ်မှတ်နိုင်ဖို့တွေအပြင် တရားဝင်ဆောင်ရွက်နိုင်တဲ့ ဈေးကွက်တခု ဖော်ဆောင်နိုင်ဖို့ကိုလည်း ဆောင်ရွက်နေပါတယ်” လို့ ပြောကြားခဲ့ပါသေးတယ်။
ရန်ကုန်ရွှေအသင်းရဲ့ မေလ ၂၉ ရက်နေ့ ဈေးနှုန်းထုတ်ပြန်ချက်မှာတော့ အခေါက်ရွှေ တကျပ်သားကို ကျပ် ၃၉ သိန်းကျော်သာ ရှိပေမယ့် ပြင်ပဈေးကွက်မှတော့ ဈေးတွေ ဆက်တိုက် မြင့်တက်နေတာ ဖြစ်ပါတယ်။
