ရေနံချောင်းသဘာဝဓာတ်ငွေ့ဖြန့်ဖြူးရေးစခန်းအတွက်လိုအပ်သည့်လျှပ်စစ်ဓာတ်အားကို နေရောင်ခြည်စွမ်းအင်မှရယူမှုစတင်
————————————-
ရေနံချောင်းသဘာဝဓာတ်ငွေ့ဖြန့်ဖြူးရေးစခန်းအတွက် လိုအပ်တဲ့ လျှပ်စစ်ဓာတ်အားကို နေရာင်ခြည်စွမ်းအင်မှရယူတဲ့စနစ်ဟာ ဒီဇင်ဘာ၂၅ရက်ကစတင်လည်ပတ်ပြီဖြစ်တယ်လို့ အရှေ့တောင်အာရှသဘာဝဓာတ်ငွေ့ပိုက်လိုင်းကုမ္ပဏီလီမိတက်(SEAGP)က ထုတ်ပြန်ထားပါတယ်။
စမ်းသပ်ခဲ့တဲ့ရလဒ်တွေနဲ့ လက်တွေ့ရလဒ်တွေအရ လက်ရှိကာလဟာ ဆောင်းရာသီဖြစ်ပြီး နေ့တာတိုပေမယ့် တစ်နေ့တာ နေရောင်ခြည်စွမ်းအင်ကရရှိတဲ့ လျှပ်စစ်ဓာတ်အားထုတ်လုပ်မှုဟာ စခန်းရဲ့တစ်နေ့တာ လျှပ်စစ်ဓာတ်အားလိုအပ်ချက်ကို ဖြည့်ဆည်းပေးနိုင်သလို ရေနံချောင်းသဘာဝဓာတ်ငွေ့စခန်းရဲ့ ကာဗွန်ဒိုင်အောက်ဆိုဒ်ထုတ်လွှတ်မှုဟာ သုညပန်းတိုင်ကို ရောက်ရှိပြီဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
၂၀၂၄ခုနှစ်အတွင်း ရေနံချောင်းသဘာဝဓာတ်ငွေ့ဖြန့်ဖြူးရေးစခန်းမှာ လျှပ်စစ်ဓာတ်အားပြတ်တောက်မှု ၂၈၃ ကြိမ်အထိ ကြုံတွေ့ခဲ့ရပြီး ဗို့အား အတက်အကျဖြစ်မှုလည်း လွန်ကဲကာ စက်ပစ္စည်းကိရိယာတွေ လည်ပတ်ခြမှုအပေါ် ကြီးမားတဲ့ အကျိုးသက်ရောက်မှုတွေရှိခဲ့တယ်လို့ ဆိုပါတယ်။
အခု နေရောင်ခြည်စွမ်းအင်သုံးလျှပ်စစ်စနစ်ဟာ အမြင့်ဆုံးစွမ်းအင် 170kW အထိရရှိပြီး ဘက်ထရီမှာလျှပ်စစ်စွမ်းအင်သိုလှောင်မှုက 480kWh ဖြစ်တယ်လို့ သိရပါတယ်။
လက်ရှိလျှပ်စစ်ဓာတ်အားခနှုန်းထားတွေအရ လျှပ်စစ်မီတာခသက်သာမှု တစ်ခုတည်းနဲ့ပဲ နေရောင်ခြည်စွမ်းအင်သုံးလျှပ်စစ်စနစ်အတွက် ကုန်ကျစရိတ်အားလုံးကို လေးနှစ်အတွင်း အကျေပြန်လည်ရရှိနိုင်ပြီး နှစ်စဉ် ကာဗွန်ဒိုင်အောက်ဆိုဒ်ဓာတ်ငွေ့ထုတ်လွှတ်မှု ၃၇၄ တန်ခန့်ကိုလည်း လျှော့ချနိုင်မှာဖြစ်တယ်လို့ ထုတ်ပြန်ထားပါတယ်။
