ထန်းသီးမုန့် မွှေးမွှေးလေး အိမ်မှာလုပ်စားကြရအောင်
ထန်းသီးရဲ့အခွံများ ဓါးဖြင့်ခွာပါ။ ထန်းသီးအနှစ်ရဖို့ ခွာထားတဲ့ ထန်းသီးခွံကို ဇကာလေးနဲ့ ခြစ်ပြီးတိုက်ချပေးပါ။ ရေလေးစွတ်လိုက် ဇကာလေးနဲ့ ခြစ်ချလိုက် လုပ်ပေးရပါမယ်။ ဇကာအောက်မှာ ထန်းသီးအနှစ်ခံဖို့ ဇလုံအသင့်ရှိပါစေ။
ပြီးပြီဆို ရလာတဲ့ထန်းသီးအနှစ်တွေကို အမှုန်တွေဖယ်ရှားသန့်စင်ဖို့ ခြစ်ထားတဲ့ အနှစ်တွေကို အဝတ်သန့်သန့်လေးထဲသို့ ထည့်ပြီး အောက်က ဇလုံထဲသို့ ညှစ်ချပေးပါ။ ဒါမှ အမှုန်များအဖတ်များ အဝတ်စတွင် ကျန်ခဲ့ပြီး သန့်ရှင်းသော ထန်းသီးအနှစ်လေးရပါမယ်။ Readymade ထန်းသီးအနှစ်ထုပ်များလည်း Ocean / Citymart တို့မှာဝယ်လို့ရနေပါပြီ။
အုန်းနို့တစ်ဗူး ရေအနည်းငယ် ဆားအနည်းငယ် သကြား ရောပြီး မီးအေးအေးဖြင့်အပူပေးပြီး အရည်ဖြစ်အောင် ကြိုပေးပါ။ ဆူရင် မီးပြန်ပိတ်ပြီး အအေးခံပေးထားပါ။
အုန်းနို့ရည်ရပြီဆိုရင် ထန်းသီးအနှစ်ထဲသို့ အအေးခံထားတဲ့ အုန်းနို့ရည် အနည်းငယ်ရောလိုက် မွှေလိုက် အရည်ထပ်ရောလိုက် မွှေလိုက်လုပ်ပေးရပါမယ်။ မပျစ်မကျဲအနေထားရပြီဆို အုန်းနို့ရည်ရောခြင်းရပ်လိုက်ပါ။
အုန်းရည်ရောထားတဲ့ထန်းသီးအနှစ်ကို ပလပ်စတစ်အကြည်ဖြင့် အပေါ်မှ လေမဝင်အောင် ပတ်ပတ်လည် အုပ်ပြီး ၄နာရီလောက် နှပ်ထားပေးပါ ( ရေခဲသေတ္တာထဲထည့်စရာမလိုပါ )
၄နာရီပြည့်ပြီဆို baking powder နည်းနည်း ထည့်ပြီး 3မိနစ်ခန့် နှံ့စပ်အောင် မွှေပေးရမယ်
နောက်ဆုံးမှာ ပေါင်းမယ့်အိုးထဲ နှစ်သက်တဲ့ ပုံစံခွက် ဖြင့် ထန်းသီးမုန့်အနှစ်ကို ထည့်ပြီး နာရီဝက်ခန့်ပေါင်းပေးရပါ။ သန့်ရှင်းတဲ့ ကိုယ်တိုင်လုပ် ထန်းသီးမုန့်လေးရပါပြီ။
#ထန်းသီးမုန့်
