CNF ခေါင်းဆောင်နှင့် လက်နက်များ မီဇိုရမ်ရဲတပ်ဖွဲ့က ဖမ်းဆီးရမိ
ဇန်နဝါရီ ၁၇
အိန္ဒိယနိုင်ငံ၏ မီဇိုရမ် (Mizoram) ပြည်နယ် ရဲတပ်ဖွဲ့သည် ထောက်လှမ်းရေး အေဂျင်စီတစ်ခုနှင့်အတူ ပူးပေါင်း ပြုလုပ်သည့် အကြီးစား စစ်ဆင်ရေးတစ်ခုအတွင်း ချင်းအမျိုးသားတပ်ဦး(CNF)မှ ခေါင်းဆောင်တချို့ကို လက်နက် ခဲယမ်းများနှင့် ဖမ်းဆီးရမိခဲ့သည်ဟု India Today သတင်းဝက်ဘ်ဆိုက်တွင် ဖော်ပြခဲ့သည်။
မီဇိုရမ်ပြည်နယ်၊ မာမစ်ခရိုင် (Mamit District) အနောက် ဖာအီလန် ရဲစခန်း (West Phaileng Police Station) ၏ တရားစီရင်ပိုင်ခွင့် အောက်တွင်ရှိသည့် ဆေသာ (Saithah) ကျေးရွာ၏ အစွန်အဖျားဒေသများတွင် များပြား သည့် လက်နက်များနှင့် ခဲယမ်းများကို သိမ်းဆည်းရမိခဲ့သည်။
ထိုစစ်ဆင်ရေးသည် မီဇိုရမ်ပြည်နယ်တွင် လက်နက်ခဲယမ်း အများဆုံး တွေ့ရှိခဲ့သည့် စစ်ဆင်ရေးများထဲ၌ တစ်ခု အပါအဝင်ဖြစ်ခဲ့ပြီး ဒေသတွင်း တရားမဝင် လက်နက်မှောင်ခိုကူးသူများကို သတိပေးချက်တစ်ခု ဖြစ်ခဲ့သည်။
ထိုလက်နက်ခဲယမ်းများကို ဖမ်းဆီးရမိမှုကြောင့် ဒေသတွင်း ငြိမ်းချမ်းရေးနှင့် လုံခြုံရေးအတွက် ကြီးမားသည့် ခြိမ်းခြောက်မှုအား လျော့ပါးသွားစေကြောင်းလည်း မီဇိုရမ်ပြည်နယ်ရဲတပ်ဖွဲ့က ပြောကြားခဲ့သည်။
စစ်ဆင်ရေးအတွင်း သိမ်းဆည်းရမိခဲ့သည့် လက်နက်ခဲယမ်းများအနက် AK-47 ရိုင်ဖယ် ၆ လက်၊ AK ကျည်ဆံ အတောင့် ၁၀၀၅၀၊ ကျည်ကဒ် ၁၃ ခုတို့ ပါဝင်ကြောင်း တာဝန်ရှိသူများက ပြောကြားခဲ့သည်။
ထိုလက်နက်များ သိမ်းဆည်းရမိမှုနှင့်ပတ်သက်ပြီး သံသယရှိသူ ၅ ဦးကိုလည်း ဖမ်းဆီးနိုင်ခဲ့သည်။
ဖမ်းဆီးရမိသူများအနက် မြန်မာနိုင်ငံတွင် အခြေစိုက်သည့် လက်နက်ကိုင်အဖွဲ့ဖြစ်သော ချင်းအမျိုးသားတပ်ဦး (CNF) ၏ ခေါင်းဆောင်တစ်ဦးလည်း ပါဝင်ခဲ့သည်။
ထိုကဲ့သို့ လူသိများသည့် လက်နက်ကိုင် ခေါင်းဆောင်တစ်ဦးကို ဖမ်းဆီးရမိမှုကြောင့် မီဇိုရမ်ပြည်နယ်တွင် သောင်းကျန်းသူ တန်ပြန်စစ်ဆင်ရေးများအတွင်း ကြီးမားသည့် အောင်မြင်မှုတစ်ခုဖြစ်သည်။
ကနဦး စုံစမ်းစစ်ဆေးမှုအရ ထိုလက်နက်ခဲယမ်းများသည် မြန်မာနိုင်ငံမှ CNF နှင့် ဘင်္ဂလားဒေ့ရှ်၏ စစ်တကောင်း တောင်ကြားလမ်းများတွင် လှုပ်ရှားနေသည့် စည်းလုံးသော ပြည်သူ့ဒီမိုကရက်တစ်တပ်ဦး (UPDF-P)တို့အကြား ရောင်းဝယ်မှုများ ပြုလုပ်ရန် စီစဉ်ထားသည့် လက်နက်ခဲယမ်းများဖြစ်ကြောင်း တာဝန်ရှိသူများက ပြောကြားခဲ့ သည်။
ထိုစစ်ဆင်ရေးအရ နိုင်ငံဖြတ်ကျော် တရားမဝင် လက်နက်များ ရောင်းဝယ်မှုများသည် ဒေသတွင် တည်ငြိမ်မှုကို ဆက်လက် ခြိမ်းခြောက်နေကြောင်း ပြသရာရောက်ခဲ့သည်။
မီဇိုရမ်ရဲတပ်ဖွဲ့သည် ယခုအမှုကို အနောက်ဖာအီလန်ရဲစခန်းကို လွှဲပြောင်းပေးခဲ့ပြီး နောက်ထပ် လက်နက်မှောင်ခို ကွန်ရက်ကို ဖျက်ဆီးရန် စုံစမ်းစစ်ဆေးမှုများ ပြုလုပ်နေကြောင်း သိရသည်။
Source: India Today
ပုံ - မီဇိုရမ်ရဲတပ်ဖွဲ့က ဖမ်းမိခဲ့တဲ့ လက်နက်ခဲယမ်းများကို တွေ့ရစဉ်
#centralnewsnaypyitaw
