စစ်ကိုင်းတိုင်းနှင့် မန္တလေးတိုင်းတို့တွင် မူးယစ်မှောင်ခိုဂိုဏ်းအဖွဲ့အား ငွေကျပ်(၂၇)ဘီလီယံကျော်တန်ဖိုးရှိ မူးယစ်ဆေးဝါးများနှင့်အတူဖမ်းမိ
နိုဝင်ဘာ ၂၁
စစ်ကိုင်းတိုင်းနှင့် မန္တလေးတိုင်းတို့တွင် မူးယစ်မှောင်ခိုဂိုဏ်းအဖွဲ့ဝင်(၂၁)ဦးအား ငွေကျပ်(၂၇) ဘီလီယံကျော်တန်ဖိုးရှိ မူးယစ်ဆေးဝါးများနှင့်အတူ နိုဝင်ဘာ ၅ ရက်က ဖော်ထုတ်ဖမ်းဆီးရမိခဲ့ကြောင်း ရဲတပ်ဖွဲ့ထံမှသိရသည်။
လုံခြုံရေးအဖွဲ့ဝင်များပါဝင်သော ပူးပေါင်းအဖွဲ့သည် နိုဝင်ဘာ ၅ ရက်နံနက် ၅ နာရီက စစ်ကိုင်းတိုင်း၊ ကလေးမြို့နယ်၊ ကျီကုန်းကျေးရွာလမ်းဆုံတွင် ကလေးဝဘက်မှ ကလေးဘက်သို့ စိန်လွင်မောင်းကာ ချစ်စန်းကို လိုက်လာသည့် FUSO ၁၂ ဘီးကားကိုရှာဖွေစစ်ဆေးရာ ကုန်ပစ္စည်းများဖြင့် ဖုံးအုပ်သယ်ဆောင်လာသည့် မူးယစ်ဆေးဝါးများကို ဖမ်းဆီးရမိခဲ့ကြောင်း သိရသည်။
စစ်ဆေးချက်အရ ယင်း မူးယစ်ဆေးဝါးများအား မန္တလေးမြို့မှ ကလေးမြို့သို့တင်ပို့ရောင်းချခဲ့သည့် မြင့်နိုင်ဦး(ခ)မောင်စိုးနှင့် ဇော်ဝင်းထွန်း(ခ) နိုင်ဝင်းထွန်း(ခ)နားကားတို့အား မန္တလေးတိုင်း၊ ချမ်းမြသာစည်မြို့နယ်၊ ဘရန်မွန်း(ခ)ဇော်တန်နှင့် ရန်နိုင်တို့အား မဟာအောင်မြေမြို့နယ်တို့၌ ထပ်မံဖမ်းဆီးရမိခဲ့သည်။
ထို့ပြင် မူးယစ်ဆေးဝါးများအား ကလေးမြို့တွင် လက်ခံသိုလှောင်၍ မြန်မာ-အိန္ဒိယနယ်စပ်သို့ တင်ပို့ရောင်းချသူများဖြစ်သည့် လားထန်ပွီးယယာ၊ သောက်နယ်လွယ်(ခ)ပုသောက်တို့အား နိုဝင်ဘာ ၅ ရက်တွင် ကလေးမြို့နှင့် မန္တလေးမြို့မှ ကလေးမြို့သို့ မူးယစ်ဆေးဝါးများတင်ပို့ခဲ့သည့် ဝင်းဌေးအောင်အား ပြည်ကြီးတံခွန်မြို့နယ်၊ မူးယစ်ဆေးဝါးများအား လက်ခံသိုလှောင်ထားသည့် လှမိုး(ခ)ဆန်းလွင်အား ကလေးမြို့တွင် နိုဝင်ဘာ ၆ ရက်က မူးယစ်ဆေးဝါးများနှင့်အတူ ထပ်မံဖမ်းဆီးရမိခဲ့ကြောင်း သိရသည်။
ထို့အတူ မူးယစ်ဆေးဝါးများအား မန္တလေးမြို့တွင်တစ်ဆင့်ပြန်လည်ရောင်းချသူ ရော်ကျိန်ရန်(ခ)အားဟွိုက်၊ မူးယစ်ဆေးဝါးသယ်ဆောင်ရောင်းဝယ်ရာတွင် ငွေကြေးလွှဲပြောင်းလက်ခံဆောင်ရွက်ပေးသူ မအားမိန်၊ လက်ခံသိုလှောင် ဖြန့်ဖြူးပို့ဆောင်ပေးသူ ရဲဇော်အောင်(ခ)အားဖတို့အား ချမ်းမြသာစည်မြို့နယ်တွင် ထပ်မံဖမ်း ဆီးရမိခဲ့ကြောင်း သိရသည်။
ထို့ကြောင့် စစ်ကိုင်းတိုင်းနှင့် မန္တလေးတိုင်းတို့တွင် မူးယစ်မှောင်ခိုဂိုဏ်းအဖွဲ့ဝင်(၂၁)ဦးအား ငွေကျပ်(၂၇ ဒသမ ၅)ဘီလီယံကျော်တန်ဖိုးရှိ ဘိန်း ဖြူ(၁၅၀ ဒသမ ၀၃)ကီလို၊ စိတ်ကြွဆေးပြား(၅ ဒသမ ၅၁)သန်း၊ အိုက်စ်(မက်သ်အဖက်တမင်း) ၄၁၂ ကီလိုနှင့် ထိန်းချုပ်ဓာတုပစ္စည်းကဖင်း ၃ တန်တို့နှင့်အတူ ဖမ်းဆီးရမိခဲ့ကြောင်း သိရသည်။
စစ်ဆေးချက်များအရ ယင်း မူးယစ်ဆေးဝါးများအား ရှမ်းပြည်နယ်(တောင်ပိုင်း)မှ မန္တလေးမြို့သို့ သယ်ဆောင်၍ကလေးမြို့တွင်သိုလှောင်ကာ မြန်မာ-အိန္ဒိယနယ်စပ်၌ တစ်ဘက်နိုင်ငံမှ မူးယစ်ဆေးဝါးသယ်ဆောင်ရောင်းဝယ်သူများနှင့် ချိတ်ဆက်ရောင်းဝယ်ခြင်းဖြစ်ကြောင်း ဖော်ထုတ်သိရှိခဲ့ရသဖြင့် ၎င်းတို့အား ဥပဒေအရအမှုဖွင့်ပြီး ငွေကြေးအကျိုးအမြတ်များ၊ ပိုင်ဆိုင်မှုများကို ပြည်သူ့ဘဏ္ဍာအဖြစ်သိမ်းဆည်းနိုင်ရန် ငွေကြေးခဝါချမှုတိုက်ဖျက်ရေးဥပဒေဖြင့်လည်း ဆက်လက်အရေးယူနိုင်ရေးအတွက် ဆောင်ရွက်လျက်ရှိကြောင်း သိရသည်။
Credit - MMG News Agency
#သတင်းဟင်းလေးအိုးကြီး
