(၄)နှစ်တာကာလအတွင်း YBS ယာဉ်မတော်တဆမှုကြောင့် လူ (၁၃၀)ကျော် သေဆုံးခဲ့
ဒီဇင်ဘာ ၂၄
(၄)နှစ်တာကာလအတွင်း YBS ယာဉ်မတော်တဆမှုကြောင့် လူ(၁၃၀)ကျော် သေဆုံးခဲ့ကြောင်း ရန်ကုန်တိုင်းဒေသကြီးပုဂ္ဂလိက သယ်ယူပို့ဆောင်ရေးကြီးကြပ်မှုကော်မတီ (YRTC) ၏ အချက်အလက်များအရ သိရသည်။
(၂၀၂၁) ခုနှစ်မှ (၂၀၂၄) ခုနှစ်အတွင်း YBS ယာဉ်မတော်တဆမှုပေါင်း (၂၉၁)ကြိမ်ဖြစ်ပွားခဲ့ရာ သေဆုံးသူဦးရေ (၁၃၂)ဦးနှင့် ဒဏ်ရာရရှိသူဦးရေ (၄၁၂)ဦးရှိခဲ့ပြီး (၂၀၂၂)ခုနှစ်တွင် ယာဉ်မတော်တဆမှု (၈၈)ကြိမ်ဖြင့် လူ(၃၈)ဦး အများဆုံးသေဆုံးခဲ့ကြောင်း သိရသည်။
ထို့ပြင် ယခုနှစ် (၂၀၂၄)ခုနှစ်၊ ဇန်နဝါရီလမှ ဒီဇင်ဘာလ ၁၅ ရက်အထိ YBS ယာဉ်မတော်တဆမှုအကြိမ်ရေ (၇၀)ခန့်ဖြစ်ပွားခဲ့ပြီး သေဆုံးသူ(၃၆)ဦး နှင့် ဒဏ်ရာရရှိသူ (၁၃၆)ဦး ရှိခဲ့ကြောင်း သိရသည်။
“နောက် တစ်ခုက စက်ဘီးစီးတဲ့လူနဲ့တိုက်မိလို့။ အဲဒါက ၂၀၂၃ မှာ ဒဏ်ရာရတဲ့လူ (၃)ဦးရှိတယ်။ ဒီနှစ်ထဲမှာ (၉)ဦးရှိတယ်။ ၂၀၂၃ မှာ သေဆုံးတာ (၃)ဦး ဒီနှစ်ထဲမှာ (၁၀)ဦးတောင်ရှိပါတယ်။ (၇)ယောက်တောင်များတာတွေ့ရှိရပါတယ်။ အဲဒါဘာဖြစ်လို့လဲဆိုရင် အရင်တုန်းက စက်ဘီးအသုံးပြုတဲ့လူနည်းပါတယ်။ အခုဆိုရင် Delivery တွေကော၊ စက်ဘီးစီးတဲ့လူတွေကို ပိုများလာတာတွေ့ရှိရပါတယ်။ ၂၀၂၄ မှာဆိုရင် ဒီလောက်များတာတွေ့ရှိရပါတယ်။ အဲဒါကြောင့် စက်ဘီးစီးနင်းတဲ့လူ လက်ယာဘက်ကပ်ပြီးစီးဖို့ လိုအပ်ပါတယ်” ဟု ဦးလျန်ကျင့်မာန်က အကြံပြုပြောသည်။
အဆိုပါ YBS ယာဉ်မတော်တဆမှုဖြစ်စဉ်များမှာ လမ်းဖြတ်ကူးသူအားတိုက်မိမှု၊ ယာဉ်ပေါ်မှ ပြုတ်ကျမှု စက်ဘီးစီးနင်းသူနှင့် တိုက်မိမှု၊ ဆိုက်ကားစီးနင်းသူနှင့်တိုက်မိမှု၊ မော်တော်ဆိုင်ကယ်စီးနင်းသူနှင့် တိုက်မိမှု၊ ဘေးတွဲဆိုင်ကယ်စီးနင်းသူနှင့်တိုက်မိမှု၊ Taxi ယာဉ်နှင့်တိုက်မိမှုတို့ဖြစ်ကြောင်း သိရသည်။
ထို့ပြင် ကိုယ်ပိုင်ယာဉ်ငယ်နှင့် တိုက်မိမှု၊ Light Truck ယာဉ်နှင့်တိုက်မိမှု၊ Truck ယာဉ်နှင့်တိုက်မိမှု၊ YBS ယာဉ်နှင့်တိုက်မိမှု၊ ဓာတ်တိုင်အားတိုက်မိမှု၊ ယာဉ်ပေါ်တွင် သေဆုံး၊ ဒဏ်ရာရရှိမှုနှင့် ယာဉ်တိမ်းမှောက်မှုတို့ဖြစ်ကြောင်း သိရသည်။
၂၀၂၄ ခုနှစ်၊ ဇန်နဝါရီလမှ နိုဝင်ဘာလအထိ စည်းကမ်းဖောက်ဖျက်သည့် YBS ယာဉ်မောင်းများကို မှတ်သားဖမ်းဆီးသည့်အမှုပေါင်း (၅၁၄၈၆)မှုအပြင် Yangon Bus Operator (YBO) က ဖမ်းဆီးသည့်အမှုပေါင်း (၅၃၁၈)မှု ရှိကြောင်း သိရသည်။
#centralnewsnaypyitaw
