ကျောင်းမှာ ရန်ဖြစ်ကြသူများ
ငယ်ငယ်က ကျောင်းမှာရန်ဖြစ်တော့မယ်ဆိုရင် ကျောင်းဆင်းတဲ့ အထိစောင့်ပြီး တစ်ယောက်နဲ့ တစ်ယောက်ချကြတာမျိုးတွေကြုံဖူးကြမယ်ထင်ပါတယ်။
ကျွန်တော်တို့ နယ်ဘက်မှာဆိုရင်တော့ ကျောင်းဆင်းပြီးဆိုတာနဲ့ လယ်ကွင်းထဲမှာ သူငယ်ချင်းတွေ အုပ်လိုက်နဲ့ မကျေနပ်တဲ့ ကောင်ကို ချိန်းပြီး ထိုးကြတာများပါတယ်။ တစ်ခါတစ်လေ သူငယ်ချင်းတွေမရှိရင် အများနဲ့ တစ်ယောက်ကို ထမင်းချိုင့်နဲ့ ကြုံးလာတာမျိုးတွေလည်းရှိတာပေါ့။
အခုကြည့်နေတဲ့ One High School Heroes ဆိုတဲ့ Korea Drama/ Action Series ကလည်း ကျွန်တော်တို့ ကျောင်းတုန်းက အဖြစ်တွေနဲ့ တော်တော်လေးသွားဆင်ပါတယ်။
ကျွန်တော်တို့တုန်းက အတန်းတွေက A,B,C ခွဲထားတော့ ကျွန်တော်က အတန်းဆို အမြဲတမ်း B ခန်းပဲနေဖြစ်တာများပါတယ်။ B ခန်းမှာဆိုရင် ယောင်္ကျားလေးရော မိန်းကလေးရော အကုန်လုံးက ဇိုးတွေများပါတယ်။ တစ်ခုခုဖြစ်လာရင် ကြုံးမယ်ဆိုတဲ့ ငဆိုးတွေကြီးစုထားတဲ့ အခန်းလို့ပြောရင်ပိုမှန်မယ်။ A ခန်းကတော့ လူတော်တွေကြီး စုထားတဲ့ အခန်းတွေပေါ့။ အားနေ စာအုပ်နဲ့ မျက်နှာမခွာတဲ့ သူတွေစုထားတဲ့ အခန်းပါ။ C ခန်းက ကျတော့ ငပြောင်တွေများပါတယ်။
ဒီလိုနဲ့ A ခန်းထဲက ကောင်နဲ့ B ခန်းက ကောင် ထမင်းစားနားချိန်မှာ ကျူရှင်ကိစ္စ စကားများရာကနေ နောက်ဆုံး လယ်ကွင်းထဲချိန်းပြီး ထိုးရမယ့် အခြေနေတွေဖြစ်လာခဲ့ပါတယ်။ အဲ့တုန်းက မှတ်မှတ်ရရ ကျွန်တော်က အနောက်ကနေ ပြောင်းဖူးရိုးတွေနဲ့ အရှေ့ကောင်တွေကို ပစ်ပေါက်တာပါ။ နောက်တော့ ရန်ဖြစ်တာရတာတွေကို ကြည့်ရတာ တဖြည်းဖြည်းကြိုက်လာပါတယ်။ ဒီကောင်တွေချနေတာကို ကြည့်ရင် တော်တော်လေးပျော်ဖို့ကောင်းတယ်ခံစားရလို့ပါ။
One High School Heroes ကလည်း စာဂျပိုး ကောင်ကို ကျောင်းထဲက Fighter တွေက သွားရှုပ်လိုက်လို့ စာဂျပိုးက စီနီယာတွေအထိတက်ချတဲ့အပြင် ကျောင်းမှာ အနိုင်ကျင့်တဲ့သူတွေမှန်သမျှကိုပါ တက်ကြုံးတဲ့ ဇာတ်လမ်းမျိုးဖြစ်ပါတယ်။
ပေါ့ပေါ့ပါးပါးကျောင်းသား ဇာတ်ကားဆိုပေမယ့် မိဘတွေရဲ့ Pressure အောက်မှာနေရတဲ့ ကောင်တွေဆိုရင် ဒီဇာတ်ကားပေးတဲ့ ခံစားချက်ကို ကောင်းကောင်းကြီး သဘောပေါက်မှာပါ။
Fight တာတွေကတော့ ကျောင်းမှာချကြတဲ့ သာမန် ချနေကြ အကွက်တွေဆိုပေမယ့် လူငယ်ထိန်းသိမ်းရေးစခန်းကရောက်လာတဲ့ Yuk Jun Seo (Lee Gwi Jae) ဆိုတဲ့ ဦးထုတ်နဲ့ ဘဲ အထာကိုတော့ တော်တော်သဘောကျတာပါ။
ဇာတ်လမ်းကတော့ ရန်ဖြစ်တာတွေကို အဓိက ဦးစားပေးထားတာဆိုတော့ ကြည့်ရတာမဆိုးဘူးလို့ မြင်မိပါတယ်။ ဒါပေမယ့် ဇာတ်ကောင်အားနည်းမှုတွေ၊ Season 2 အတွက် ဇာတ်လမ်းအဆက်တွေ၊ ဇာတ်သိမ်းပိုင်းအားရမှုမရှိတာလေးတွေမျိုးတွေရှိပါတယ်။
ပြောရရင်တော့ ကျောင်းသား Action ဇာတ်ကားတွေက တော်တော်လေးကောင်းလို့ One High School Heroes ဆိုတဲ့ ဇာတ်ကားကိုလည်း မကြည့်ရသေးရင်ကြည့်ဖို့ အကြံပေးပါတယ်။
