ရီးရဲလ်မက်ဒရစ်ဥက္ကဌအဖြစ် ဖလော်ရင်တီနိုပီရက်ဇ် ထပ်မံ ရွေးချယ်ခံရပြီးနောက် ရီးရဲလ်မက်ဒရစ်နည်းပြအဖြစ် မော်ရင်ဟို ခန့်အပ်ခံလာရတော့မည်
=====================
ဖလော်ရင်တီနိုပီရက်ဇ်မှာ ရီးရဲလ်မက်ဒရစ်ဥက္ကဌအဖြစ် ၂၀၃၀ ခုနှစ်အထိ တာဝန်ထမ်းဆောင်ရန် ရွေးချယ်ခြင်းခံလာရပြီးနောက် ဂျိုဆေးမော်ရင်ဟိုဟာ ရီးရဲလ်မက်ဒရစ်နည်းပြအဖြစ် အတည်ပြု ခန့်အပ်ခြင်းခံလာရတော့မှာ ဖြစ်ပါတယ်။
အသက် ၆၃ နှစ်ရှိ မော်ရင်ဟိုဟာ ပြီးခဲ့တဲ့လကတည်းက ပီရက်ဇ်သာ ဥက္ကဌအဖြစ် ရွေးချယ်ခြင်းခံလာရပါက ရီးရဲလ်မက်ဒရစ်အား ၃ နှစ်စာချုပ်ဖြင့် ကိုင်တွယ်ရန် စာချုပ်တွင် လက်မှတ်ရေးထိုးထားပြီး ဖြစ်ပါတယ်။
အသက် ၇၉ နှစ်ရှိ ပီရက်ဇ်ဟာ တနင်္ဂနွေနေ့ ရွေးကောက်ပွဲတွင် မဲ ၆၅ ရာခိုင်နှုန်း ရရှိပြီးနောက် နောက်ထပ် သက်တမ်းတစ်ခု ထပ်မံ ဦးဆောင်လာဦးမှာ ဖြစ်ပါတယ်။
ပီရက်ဇ်က "ရွေးကောက်ပွဲတွေမှာ ကျွန်တော်တို့ အနိုင်ရခဲ့တယ်။ ဆုဖလားတွေ ဆက်လက်ရယူဖို့ ဆက်လုပ်သွားမယ်။ ကျွန်တော် ဒီမှာ ရှိနေတုန်းပါ။ ပြီးတော့ ရီးရဲလ်မက်ဒရစ်ကို ကာကွယ်ဖို့ ရှိနေတာပါ။ ရီးရဲလ်မက်ဒရစ် ဆုဖလားတွေ ရယူနိုင်ဖို့ ကျွန်တော်တို့ ဆက်အလုပ်လုပ်သွားမယ်။ ၁၆ ကြိမ်မြောက် ဥရောပဖလားရယူနိုင်တဲ့အထိ တိုက်ပွဲဝင်သွားမယ်။ ကမ္ဘာ့အကောင်းဆုံးကွင်းဖြစ်တဲ့ ဆန်တီယာဂိုဘာနေဗျူးကွင်းသို့ ဂုဏ်ယူစရာတွေ ဆက်လက်ယူဆောင်လာပါမယ်။ ကမ္ဘာ့အကောင်းဆုံးကစားသမားတွေ ပိုင်ဆိုင်ရလို့ ဂုဏ်ယူတယ်။ ကမ္ဘာ့အကောင်းဆုံးနည်းပြတွေထဲက တစ်ဦးဖြစ်တဲ့ ဂျိုဆေးမော်ရင်ဟိုကို ဂုဏ်ယူစွာ ကြိုဆိုခွင့်ရလို့ ဂုဏ်ယူတယ်"လို့ ပြောကြားသွားပါတယ်။
ရီးရဲလ်မက်ဒရစ်ကို ကလပ်အဖွဲ့ဝင်များက ပိုင်ဆိုင်တာ ဖြစ်ပြီး အဖွဲ့ဝင်များကပင် ဥက္ကဌကို ရွေးချယ်တင်မြှောက်ပါတယ်။ ပီရက်ဇ်ဟာ နှစ်ပေါင်း ၂၀ အတွင်းတွင် ပထမဆုံးအကြိမ်အဖြစ် စိန်ခေါ်သူ အန်းနရစ်ရီကွယ်မီးနှင့် ရင်ဆိုင်ခဲ့ရတာပါ။
ပီရက်ဇ်ဟာ မဲ ၂၁၇၄၁ ရရှိခဲ့ပြီး ရီကွယ်မီးက မဲ ၁၁၈၁၄ ရရှိခဲ့ပါတယ်။
မော်ရင်ဟိုဟာ ဘင်ဖီကာနည်းပြရာထူးမှ ထွက်ခွာကာ ရီးရဲလ်မက်ဒရစ်နည်းပြရာထူးကို ရယူလာပါမယ်။
သူဟာ ၂၀၁၀ မှ ၂၀၁၃ ခုနှစ်အထိ ရီးရဲလ်မက်ဒရစ်ကို ကိုင်တွယ်ခဲ့ဖူးပြီး လာလီဂါ၊ ကိုပါဒယ်ရေးနှင့် စပိန်စူပါဖလားတို့ ရယူပေးခဲ့ဖူးပါတယ်။
