#ယနေ့ထုတ်သတင်းစာ_သတင်း
◼ မလေးရှားတွင် အထောက်အထားမဲ့ ရွှေ့ပြောင်းနေထိုင်သူ ၇၀၀ ကျော် ဖမ်းဆီးခံရ
မလေးရှားနိုင်ငံ ကွာလာလမ်ပူမြို့ Bukit Bintang တွင် အထောက်အထားမဲ့ ရွှေ့ပြောင်းနေထိုင်သူ ၇၇ဝ ကို လူဝင်မှု ကြီးကြပ်ရေးဌာန (JIM) ကဖမ်းဆီးခဲ့ရာ မြန်မာနိုင်ငံသား ၂၃၅ ဦးပါဝင်ကြောင်း မလေးရှားလူဝင်မှုကြီးကြပ်ရေးဌာန၏ ထုတ်ပြန်ချက်အရ သိရသည်။
အော်ပရာစီ Belanja ဟုအမည်ပေးထားသည့် အရာရှိ ၁ဝ၆ ဦး ပါဝင်သည့် စစ်ဆင်ရေးကို စက်တင်ဘာ ၂ ရက်ည ၇ နာရီခွဲမှစ၍ နှစ်နာရီကြာ ပြုလုပ်ခဲ့ခြင်းဖြစ်ပြီး ထိုစစ်ဆင်ရေးတွင် နိုင်ငံခြားသား ၁၆ဝဝ နှင့် ဒေသခံ ၈၄၅ ဦး အပါအဝင် စုစုပေါင်း ၂၄၄၅ ဦးကို စစ်ဆေးခဲ့ပြီး ထိုသူများအနက် အသက်(၂၁) နှစ်မှ (၆၅)နှစ် အကြားရှိရွှေ့ပြောင်းနေထိုင်သူ ၇၇ဝ ဦးမှာ လူဝင်မှုကြီးကြပ်ရေးဆိုင်ရာပြစ်မှုများ ကျူးလွန်ထားသည်ဟု စစ်ဆေး တွေ့ရှိရကြောင်း၊ ဖမ်းဆီးခံရသူများထဲမှ ဘင်္ဂလားဒေ့ရှ်နိုင်ငံသား ၃၇၇ ဦး၊ မြန်မာနိုင်ငံသား ၂၃၅ ဦး၊ နီပေါနိုင်ငံသား ၇၂ ဦး၊ အိန္ဒိယနိုင်ငံသား ၅၈ ဦး၊ အင်ဒိုနီးရှားနိုင်ငံသား ၁၉ ဦးနှင့်အခြားနိုင်ငံသားအချို့ ပါဝင်ကြောင်း သိရသည်။
၎င်းတို့ကို JIM ဌာနချုပ်ရှိရုံးများသို့ ပို့ဆောင်ကာ စစ်ဆေး မေးမြန်းမှုများ ပြုလုပ်ပြီးနောက် ဘီရာနန်း (Beranang) နှင့် လန်းဂန်း (Lenggeng) ရှိ ထိန်းသိမ်းရေးစခန်း များသို့ လွှဲပြောင်းပေးမည် ဖြစ်ကာ ၁၉၅၉/၆၃ လူဝင်မှုကြီးကြပ်ရေး အက်ဥပဒေပုဒ်မ - ၆(၃)၊ ပုဒ်မ - ၁၅ (၄) နှင့် နည်းဥပဒေ ၃၉(ခ) တို့အရ စုံစမ်းစစ်ဆေးလျက်ရှိကြောင်း သိရသည်။
