ပြည်တွင်းရွှေဈေး ၇၈ နီးပါးအထိ ပြန်လည် မြင့်တက်လာ
စက်တင်ဘာ ၂ - ၂၀၂၅
SS (VOM)
ကမ္ဘာ့ရွှေဈေး ပြန်လည် မြင့်တက်လာမှုနဲ့အတူ ပြည်တွင်း ရွှေဈေးနှုန်းတွေ လိုက်ပါ မြင့်တက်လျက်ရှိတာမှာ ဒီကနေ့ စက်တင်ဘာ ၂ ရက်၊ မနက်ပိုင်းမှာတော့ အခေါက်ရွှေ တကျပ်သား ၇၈ နီးပါးဝန်းကျင်နဲ့ ဈေးဖွင့်လာတာ တွေ့ရပါတယ်။
ပြည်တွင်းရွှေဈေးဟာ ပြီးခဲ့တဲ့ ဩဂုတ်လ ၁၉ ရက်၊ နေ့လယ်ပိုင်းကစပြီး အကျဘက်ကို သုံးရက်တာ ရောက်ရှိခဲ့ပေမယ့် ဩဂုတ် ၂၃ ရက်၊ မနက်ပိုင်းကစလို့ ဆက်တိုက်ဆိုသလို ဈေးနှုန်း ပြန်လည် မြင့်တက်လာတာမှာ လက်ရှိမှာတော့ ခုနစ်ဆယ့်ခုနစ်သိန်း ရှစ်သောင်းဝန်းကျင်ကို ရောက်ရှိနေတယ်လို့ ဈေးကွက်အတွင်းက စုံစမ်း သိရှိရပါတယ်။
“အဓိက ကတော့ ကမ္ဘာ့ဈေးတက်လို့ ပြည်တွင်းဈေးလည်း ပြန်တက်လာတာပါ။ လက်ရှိ ဒေါ်လာဈေးကတော့ အကျဘက်မှာ ငြိမ်နေတယ်ပြောရမယ်။ ကျရင်လည်း ၂၀၊ ၃၀။ တက်ရင်လည်း အဲဒီ နှုန်းထားအတိုင်းပဲ ဆိုတော့ အတက်အကျမကြမ်းဘူး။ ငြိမ်နေတယ်ပဲပြောရမယ်။ ကမ္ဘာ့ရွှေစျေးကတော့ တရိပ်ရိပ်နဲ့ ပြန်တက်လာနေတာ အခုဆို ပြီးခဲ့တဲ့ ဧပြီလက စံချိန်တင်ထားတဲ့ သမိုင်းတလျှောက် အမြင့်ဆုံး စျေးတန်းဖြစ်ခဲ့တဲ့ တအောင်စ ဒေါ်လာ ၃၅၀၀ နှုန်းထားကို ကျော်သွားပြီ” လို့ ရွှေကုန်သည် တယောက်က ပြောပါတယ်။
ကမ္ဘာ့ရွှေဈေးဟာ ပြီးခဲ့တဲ့ ဩဂုတ်လ ၂၃ ရက်နေ့ကစပြီး တအောင်စ ၃၃၇၁ ဒေါ်လာဝန်းကျင်နဲ့ အတက်ဘက်ကို ပြန်လည် ရောက်ရှိလာတာဖြစ်ပြီး တောက်လျှောက် မြင့်တက်လာတာမှာ လက်ရှိ အချိန်မှာတော့ စံချိန်တင် အမြင့်ဆုံးဈေး တအောင်စ ၃၅၀၈ ဒေါ်လာဝန်းကျင်ကို ရောက်ရှိနေပါတယ်။
“ကမ္ဘာ့ဈေးက ပြီးခဲ့တဲ့ တပတ်တာ ဈေးကွက် အနေအထားအရ ဒေါ်လာ ၁၀၀ နီးပါးလောက် တက်အားကောင်းခဲ့တယ်။ လက်ရှိ ကာလကတော့ အရောင်းတွေ ဂရုစိုက်ရမယ့် အနေအထားပါ။ ကမ္ဘာ့ဈေး ၃၅၀၀ အထက်ဆို ၃၅၁၀ လည်း ဖြစ်နိုင်သလို ၃၅၂၀ လည်း ဖြစ်သွားနိုင်ပါတယ်။ အကယ်၍ ပြန်ဆင်းရင်တောင် လက်ရှိ အများဆုံး ၃၄၆၅-၆၀-၅၀ ကြားလောက်ပဲ မှန်းလို့ရပါဦးမယ်” လို့ ဈေးကွက် ကျွမ်းကျင်သူ တယောက်က ပြောပါတယ်။
နှစ်စဉ် စက်တင်ဘာလဟာ ကမ္ဘာ့ရွှေဈေး ကျလေ့ရှိတဲ့ လတလ ဖြစ်ပေမယ့် ပြီးခဲ့တဲ့ ဩဂုတ်လအတွင်း တက်အား ကောင်းခဲ့တာကြောင့် လက်ရှိ စက်တင်ဘာလအတွင်းကိုတော့ ဈေးဆက်တက်နိုင်ခြေ ရှိ၊ မရှိ စောင့်ကြည့်ရမယ့် အနေအထားဖြစ်ပြီး မမြင်ဖူးသေးတဲ့ ဈေးတန်းတွေကိုလည်း မြင်တွေ့ရနိုင်ခြေ ရှိနေတယ်လို့ သူက ပြောပါတယ်။
လက်ရှိ ကမ္ဘာ့ရွှေဈေးနှုန်း မြင့်တက်နေတာဟာ ဒေါ်လာဈေးတန်ဖိုး ချနေတဲ့အတွက် ကမ္ဘာ့ရွှေ စတော့ ဈေးကွက်ဆီ ပြောင်းလဲ ရင်းနှီးမြှုပ်နှံနေကြတာကြောင့် ဖြစ်တယ်လို့ ဈေးကွက် ကျွမ်းကျင်သူတွေက သုံးသပ်ထားပါတယ်။
ဒါအပြင် လက်ရှိမှာ ရန်ကုန်တိုင်း ရွှေအသင်း (YGEA) ရဲ့ ရွှေရည်ညွှန်းဈေးလည်း မြင့်တက်နေတာ တွေ့ရပြီး အခေါက်ရွှေ တကျပ်သား ငါးဆယ့်ကိုးသိန်း သုံးသောင်းကျပ် ဝန်းကျင်ကို ရောက်ရှိနေပါတယ်။
YGEA ရည်ညွှန်းဈေးဟာ ပြီးခဲ့တဲ့ ဩဂုတ်လ ၂၆ ရက်နေ့မှစတင်ကာ အခေါက်ရွှေ တကျပ်သား ၅၉ သိန်းဝန်းကို ပြောင်းလဲ မြင့်တက်လာတာဖြစ်ပြီး ဒီကနေ့ စက်တင်ဘာ ၂ ရက်အထိ ရှစ်ရက်တာ ကာလအတွင်း ကျပ် လေးသောင်းဝန်းကျင် မြင့်တက်လာတာ ဖြစ်ပါတယ်။
Photo - CJ
