ခရမ်းသီးပုဇွန်ခြောက်နှပ်...။
ခရမ်းသီးနှပ်ရင် အနှစ်များများနဲ့ပိုကြိုက်တယ်။
ခရမ်းသီးကို ကိုယ်ကြိုက်တဲ့အနေအထားလေးတွေလှီးပြီး ရေဇလုံတခုထဲမှာ ဆား ထမင်းစားဇွန်းတဇွန်းလောက်နဲ့ ရေတွေထည့်ပြီး လှီးပြီးသားခရမ်းသီးတွေထည့်ပါ။
ရှစ်မိနစ်လောက်စိမ်ပြီးရင် ရေဆေးချပြီး ရေစစ်ထားပါ။
ကြက်သွန်ဖြူ ငါးမွှာလောက်နဲ့ ကြက်သွန်နီအကြီး လေးလုံးလောက် ငရုပ်သီးအရောင်တင်မုန့် ငပိစိမ်းစား အနည်းငယ် တို့ကိုရောထောင်းထားပါ။
ပုဇွန်ခြောက်ကိုရေဆေးပြီး မညှက်တညှက်ထောင်းထားပါ။
ဆီပူအောင်တည်ပြီး နနွင်းမှုန့်လေးထည့် ကြက်သွန်ထောင်းထားတာတွေထည့်ပြီးဆီသတ်ပါ။
ထောင်းထားတဲ့ပုဇွန်ခြောက်လေးတွေထည့်ပြီး မွှေပါ။
ဆီသတ်တဲ့အနံ့က မွှေးမွှေးလေးဖြစ်လာပြီဆို ရေစစ်ထားတဲ့ခရမ်းသီးတွေထည့်ပါ။
ဆီသတ်ထားတဲ့အနှစ်တွေနဲ့ ခရမ်းသီးလေးတွေကို သမနှံ့သွားအောင်မွှေပေးပါ။
အရသာအတွက်ပါ တခါတည်းထည့်ပါ။
ပြီးရင် ရေကိုအများကြီးမထည့်ပဲ ခရမ်းသီး မမြုတ်တမြုတ်လေးပဲထည့်ပြီး အဖုံးလေးပိတ်ပြီးတည်ထားပါ။
ရေမခမ်းမနူးသေးခင် တအားကြီးမမွှေပစ်ပါနဲ့ ဇွန်းဖျားလေးနဲ့အသာလေးထိုးပြီး အိုးလေးကိုလှည့် လှည့်ပေးပြီးရေခမ်းဆီပြန်တဲ့အထိ စိတ်ရှည်ရှည်လေးနှပ်ရင် အလုံးလေးမပျက် အိအိလေးနဲ့စားကောင်းလှပါတယ်...။😋
