#ဝက်ချဉ်ပေါင်
ဝက်သားနဲ့ချဥ်ပေါင် တစ်ခွက်ချက်
ငပိရည်စပ်စပ်မွှေးမွှေးလေးဖျော်
အသီးအရွက်ပြုတ်ချိုချိုလေးတွေ အတို့လုပ်
အရည်သောက်ပါမှ ဆိုရင်တော့... ပဲဟင်းချိုကျဲကျဲလေး ဒါမှမဟုတ် ဘူးသီးဟင်းခါးလေးပါ ချက်
ဂွယ်ရှယ် နော် 😋😋
ဟင်းချက်နည်းရေးပေးလိုက်ပါတယ်
ဝက်သားသုံးထပ်သား / ပေါင်သား ၂၅ကျပ်သား
ချဉ်ပေါင်ရွက် ၂စည်း
( မျှစ်ထည့်ချင်ရင် အနည်းငယ်ထည့်လို့ရပါတယ်)
ကြက်သွန်နီ ကြီးကြီး ၁လုံး
ကြက်သွန်ဖြူအကြီး ၄မွှာ
ဂျင်းလက် ၁ဆစ်ခန့်
ငရုတ်သီးခွဲကြမ်းမှုန့် လဘက်ရည်ဇွန်း ၂ဇွန်း
ငရုတ်သီးအရောင်တင်မှုန့် ။ ။ ၂ဇွန်း
နနွင်း အနည်းငယ်
မျှင်ငပိ လဘက်ရည်ဇွန်း ၁ဇွန်းခန့်
ဆီ အကြမ်းပန်းကန်လုံး တစ်ဝက်ခန့်
အချိုမှုန့် ဆား နှစ်သက်သလိုချိန်ဆထည့်ပါ
ဝက်သုံးထပ်သား/ ပေါင်သားကို အနေတော်အရွယ်တုံး အချိုမှုန့် ဆား နနွင်းတို့နဲ့နယ်ထားပါ
ချွေထားတဲ့ ချဉ်ပေါင်ရွက်ကို ဒယ်အိုးထဲထည့် အဖုံးအုပ်ပြီး မီးဖိုပေါ်ခဏတည်ပါ (ရေမထည့်ပါဘူး) အရွက်နွမ်းလာရင် ဇွန်းနဲ့ကြေအောင်မွှေပြီး မီးဖိုပေါ်ကချထားပါ
ကြက်သွန်ဖြူ နီ ဂျင်းတို့ကို နုတ်နုတ်စင်းထားပါ
ဆီအိုးတည်ပါ ကြက်သွန်ဖြူနီဂျင်းဆီသတ်ပါ နနွင်းမှုန့်ထည့်ပါ
ကြက်သွန်အနည်းငယ်ခြောက်ပြီးဝါရောင်သန်းလာရင် ငရုတ်သီးမှုန့်ထည့်ပါ ခဏမွှေပေးပါ
အရသာနယ်ထားတဲ့အသားထည့်ပါ
အသားအနည်းငယ်ကျစ်သွားတဲ့ထိ အထက်အောက်မွှေပေးနေပါ အသားကျစ်သွားပြီဆို ရေနွေးထည့် အဖုံးအုပ်ပြီးအသားနူးအောင်ချက်ပေးပါ အရမ်းမနူးပါစေနဲ့နော်
အသားနူးသွားမှ မျှင်ငပိ ချဉ်ပေါင် မျှစ်တို့ထည့်ပါ
ရေကို အပျစ်အကျဲ ကိုယ်လိုအပ်သလောက်ချိန်ပြီး အနည်းငယ်ထပ်ထည့်ပါ
အပေါ့အငန်အရသာမြည်း လိုသလိုဖြည့်ထည့်ပြီး
ပွက်ပွက်ဆူအောင် တည်ပေးလိုက်ရင် ထမင်းမြိန်စေတဲ့ ဝက်ချဉ်ပေါင်ဟင်းတစ်ခွက်ရပါပြီရှင်
