ချက်ဝန်ကြီးချုပ်ဟောင်း ဘာဘစ် မဲဆွယ်စည်းရုံးပွဲမှာ ချိုင်းထောက်နဲ့ အရိုက်ခံရ
ပရက်ဂ်၊ စက်တင်ဘာ-၂-၂၀၂၅
မျိုးဆက်(VOM)
ချက်အတိုက်အခံခေါင်းဆောင်နဲ့ ဝန်ကြီးချုပ်ဟောင်း အန်ဒရေး ဘာဘစ်ဟာ မဲဆွယ်စည်းရုံးပွဲတခုမှာ ခေါင်းကို ချိုင်းထောက်နဲ့ အချက်ပေါင်းများ အရိုက်ခံခဲ့ရတယ်လို့ တာဝန်ရှိသူတွေက ပြောပါတယ်။
သူ့ကို ဆေးစစ်မှုခံယူဖို့ ဆေးရုံပို့ခံရပြီး ခဏအကြာမှာပဲ ဆေးရုံက ဆင်းခွင့်ပေးလိုက်ပါတယ်။ ဒီဖြစ်စဉ်နဲ့ ပတ်သက်ပြီး အမျိုးသမီးတယောက်ကိုလည်း ဆေးရုံမှာ ကုသမှုပေးခဲ့ပါတယ်။ ရိုက်နှက်သူကို ရဲတပ်ဖွဲ့က ဖမ်းဆီးထားပြီး သူ့ရဲ့ ရည်ရွယ်ချက်က ဘာလဲဆိုတာတော့ မရှင်းလင်းသေးပါဘူး။
ဘာဘစ်ကို ဒီလိုတိုက်ခိုက်မှုနဲ့ပတ်သက်ပြီး သူ့ရဲ့ အေအင်န်အိုပါတီက ပြင်းပြင်းထန်ထန် ရှုတ်ချခဲ့ပြီး သူ့ပါတီကတော့ လူမှုမီဒီယာပေါ်မှာ မုန်းတီးရေးလှုံ့ဆော်မှုတွေ လုပ်တဲ့အတွက် အစိုးရကို အပြစ်တင်ခဲ့ပါတယ် ။ ဒီဖြစ်စဉ်ဟာ မြို့တော် ပရက်ဂ်မြို့ကနေ ကီလိုမီတာ ၃၇၆ အကွာ အရှေ့ဘက်က ဒိုဘရာမြို့မှာ ကျင်းပတဲ့ ဟောပြောပွဲတခုမှာ ဖြစ်ပွားခဲ့တာပါ။
ပါတီခေါင်းဆောင်ရဲ့ ခေါင်းကို အကြိမ်ကြိမ် ရိုက်နှက်ခံရတယ်လို့ ဟောပြောပွဲမှာ ဘာဘစ်နဲ့အတူရှိနေခဲ့တဲ့ လွှတ်တော်အမတ် အလက်ရှ် ဂျူချယ်လ်ကာက ပြောပါတယ်။ သူ့ကို ကားနဲ့ ဆေးရုံပို့ခဲ့ပြီး CT ရိုက်ပြီးတဲ့နောက် ဆရာဝန်တွေက ဆေးရုံက ဆင်းခွင့်ပေးခဲ့ပါတယ်။
ချက်ရဲတပ်ဖွဲ့ရဲ့ ထုတ်ပြန်ချက်မှာတော့ သံသယရှိသူကို ဟောပြောပွဲမှာရှိတဲ့ တပ်ဖွဲ့ဝင်တွေက တိုက်ခိုက်မှုဖြစ်ပြီးချက်ချင်း ဖမ်းဆီးလိုက်တယ်လို့ ဖော်ပြထားပါတယ်။ ဒီကိစ္စကို လိုအပ်ရင် ကျယ်ကျယ်ပြန့်ပြန့် စုံစမ်းစစ်ဆေးမယ်လို့ ဆိုပါတယ်။
ဘာဘစ်ဟာ ၂၀၁၇ ခုနှစ်ကနေ ၂၀၂၁ ခုနှစ်အထိ ချက်နိုင်ငံရဲ့ ဝန်ကြီးချုပ်အဖြစ် တာဝန်ထမ်းဆောင်ခဲ့သူပါ။
ဒီတိုက်ခိုက်မှုကို "လုပ်ပိုင်ခွင့် အာဏာရနေတဲ့ပါတီတွေက ဖြန့်ဝေနေတဲ့ အမုန်းတရား ကြောင့်လို့ ဘာဘစ်ရဲ့ လက်ထောက်ဖြစ်သူ အလီနာ ရှီလာရိုဗာက ဆိုပါတယ်။
ဝန်ကြီးချုပ် ပီတာ ဖီအာလာကတော့ ဘာဘစ်မြန်မြန်သက်သာပျောက်ကင်းပါစေလို့ ဆုတောင်းပေးခဲ့ပါတယ်။ ချက်နိုင်ငံသားတွေဟာ အောက်တိုဘာလ ၃ ရက်နဲ့ ၄ ရက်နေ့တွေမှာ အထွေထွေရွေးကောက်ပွဲ မဲပေးရမှာဖြစ်ပါတယ်။
Ref:BBC
