"နေကြတ်ခြင်းနှင့် လကြတ်ခြင်းဖြစ်ပေါ်မည့် စက်တင်ဘာလ"
ယနေ့မှာတော့ ဩဂုတ်လ ကို ကျော်လွန်ပြီးလို့ စက်တင်ဘာလ ၁ ရက်နေ့သို့ကူးပြောင်းပြီး "ဘာလေးဘာ"လို့လူသိများတဲ့ နှစ်တစ်နှစ်တာရဲ့ နောက်ဆုံးလေးလ ဖြစ်တဲ့ စက်တင်ဘာ၊အောက်တိုဘာ၊နိုဝင်ဘာ၊ဒီဇင်ဘာလ ဆိုတဲ့ အချိန်ကာလ အပိုင်းအခြားထဲကိုစတင်ဝင်ရောက်လာခဲ့ ပြီပဲဖြစ်ပါတယ်။
စက်တင်ဘာလထဲမှာတော့ အာကာသနဲ့ နက္ခတ်တာရာ လေ့လာစရာ ဖြစ်စဉ်တွေများစွာဖြစ်ပေါ်မှာဖြစ်ပါတယ်။မိုးနှောင်းကာလ အပိုင်းအခြားရောက်လာပြီဖြစ်တာကြောင့် ညဘက်မိုးကောင်းကင် အခြေအနေများဟာလည်းအရင်လတွေတုန်းကထက် အနည်းငယ်ကြည်ကြည်လင်လင်ဖြစ်ပေါ်လာမှာလည်းဖြစ်ပါတယ်။
စက်တင်ဘာလ ထဲမှာကိုပဲ နေကြတ်လကြတ်ခြင်းဖြစ်စဉ်များ၊ ဆောင်းဦးနေတူညတူ ရက်များဖြစ်ပေါ်မှာဖြစ်တာကြောင့်စိတ်ဝင်စားစရာ လတစ်လဖြစ်တယ်လို့ဆိုရမှာပါ။
လာမယ့် စက်တင်ဘာလ ၇ရက်နေ့မှာတော့ လအပြည့်ကြတ်ခြင်းဖြစ်စဉ်ဖြစ်ပေါ်မှာဖြစ်ပြီး ဒီဖြစ်စဉ်ကိုတော့ ကျွန်တော်တို့ မြန်မာနိုင်ငံ အပါအဝင် ကမ္ဘာပေါ်က လူပေါင်း သန်း၇၀၀၀ နေထိုင်နေတဲ့ ဒေသတွေကနေ မြင်တွေ့ရမှာဖြစ်ပါတယ်။ကြာမြင့်ချိန်က စုစုပေါင်း ၈၂ မိနစ်ခန့်ရှိတာမို့ မိုးတိမ်ကင်းစင်နေမယ်ဆိုရင် စောင့်ကြည့်လေ့လာနိုင်မှာဖြစ်ပါတယ်။
လကြတ်ခြင်းဆိုတာ နေနဲ့ လနဲ့ကြားကို ကမ္ဘာဖြတ်သန်း ဝင်ရောက်သွားရောက်သွားပြီး ကမ္ဘာ့ရဲ့ အရိပ်က လအပေါ်ကိုကျရောက်တာဖြစ်ပါတယ်။
လကြတ်ခြင်းများဟာ လပြည့်ညများမှာသာဖြစ်ပေါ်လေ့ရှိပါတယ်။အခုတစ်ခေါက်လကြတ်ခြင်းဟာ Harvest moon လို့ခေါ်တဲ့ ကောက်ရိတ်သိမ်းပွဲကာလ လပြည့်ညမှာဖြစ်ပေါ်မှာဖြစ်ပါတယ်။
စက်တင်ဘာလ ၂၁ ရက်နေ့မှာတော့ တစ်စိတ်တပိုင်း နေကြတ်ခြင်းဖြစ်စဉ် ဖြစ်ပေါ်မှာဖြစ်ပြီး ဒီဖြစ်စဉ်ကိုတော့ကျွန်တော်တို့ မြန်မာနိုင်ငံကနေ မြင်တွေ့ရမှာမဟုတ်ပဲ ကမ္ဘာနေ့ရာအချို့ကသာ မြင်တွေ့ရမှာဖြစ်ပါတယ်။နေကြတ်ခြင်းဆိုတာ လက နေနဲ့ ကမ္ဘာ ကြားထဲ ဝင်ရောက်လာတဲ့အခါ ဖြစ်ပေါ်ပါတယ်။ အဲဒီအခါ လရဲ့အရိပ်က ကမ္ဘာပေါ်ကို ကျရောက်ပြီး နေကို အပြည့်အဝ ဒါမှမဟုတ် တစ်စိတ်တစ်ပိုင်း ဖုံးကွယ်သွားတာကို မြင်ရတာဖြစ်ပါတယ်။
အထူးပြောလိုတာက ဒီနေကြတ်ခြင်းလကြတ်ခြင်းဖြစ်စဉ်တွေဟာ သဘာဝအလျောက် ဖြစ်ပေါ်နေတာဖြစ်ပြီး လူသားတွေရဲ့ကံဆိုးကံကောင်းမှု တွေ အပေါ်မှာ မည်သည့် အကျိူးသက်ရောက်မှုမှ မရှိနိုင်ပဲ အာကာသနက္ခတ်တာရာလေ့လာစရာ ဖြစ်စဉ်သာ ဖြစ်ပါတယ်။
နေကြတ်ခြင်းလကြတ်ခြင်းများကို တကူးတက လေယာဉ်ပျံများဖြင့် သွားရောက်လေ့လာကြတဲ့ NASA နှင့်အာကာသ အဖွဲ့အစည်းများမှ သိပ္ပံပညာရှင်များစွာလည်းရှိပါတယ်။
စက်တင်ဘာလ ၂၂ ရက့်နေ့မှာတော့ ဆောင်းဦးနေတူညတူ ရက်ဖြစ်ပေါ်မှာဖြစ်ပြီး ကျွန်တော်တို့ မြန်မာနိုင်ငံတည်ရှိရာ မြောက်ကမ္ဘာခြမ်း ဒေသတွေအတွက် ဆောင်းဦးရာသီ ၊တောင်ကမ္ဘာခြမ်းဒေသတွေအတွက် နွေဦးရာသီ စတင်ဝင်ရောက်လာပြီဆိုတာကို သိသာစေမယ့် အချိန်အမှတ်အသားနေ့ရက်တွေဖြစ်ပါတယ်။
စက်တင်ဘာတစ်လလုံးမှာတော့ အခုလိုစိတ်ဝင်စားလေ့လာစရာကောင်းတဲ့ ဖြစ်စဉ်တွေ့ဖြစ်ပေါ်မှာမလို့ မိုးကောင်းကင် အာကာသ နက္ခတ်တာရာဖြစ်ရပ်များကို အတူတူလေ့လာကြည့်ကြဖို့ ကြိုတင်အသိပေးဖိတ်ခေါ်လိုက်ပါရစေ။