#ယနေ့ထုတ်သတင်းစာ_နိုင်ငံတကာသတင်း
◼ တိုကျိုတွင် အပူချိန် ၃၅ ဒီဂရီစင်တီဂရိတ်အထက် ရက်ပေါင်း ၁ဝ ရက် ဆက်တိုက် စံချိန်တင်မြင့်တက်
ဂျပန်နိုင်ငံတွင် ဇွန်လနှင့်ဇူလိုင်လအတွင်း သမိုင်းတစ်လျှောက် အပူဆုံးကာလကို ကြုံတွေ့ခဲ့ရပြီးနောက် တိုကျိုမြို့၌ အပူချိန် ၃၅ ဒီဂရီ စင်တီဂရိတ်အထက်ရှိသည့် ရက်ပေါင်း ၁ဝ ရက် ဆက်တိုက်ကြာမှတ်တမ်းတင်ခဲ့ရကြောင်း မိုးလေဝသဌာနက ဩဂုတ် ၂၇ ရက်တွင်ပြောသည်။
လူသားတို့၏ လုပ်ရပ်များကြောင့်ဖြစ်ပေါ်လာသော ရာသီဥတုပြောင်းလဲမှုများသည် ကမ္ဘာတစ်ဝန်းတွင် အပူလှိုင်းများကို ပိုမိုပြင်းထန်စေပြီး စဉ်ဆက်မပြတ်ဖြစ်ပေါ်စေကြောင်း သိပ္ပံပညာရှင်များက ဆိုထားပြီး ဂျပန်နိုင်ငံသည်လည်း အလားတူအခြေအနေနှင့် ရင်ဆိုင်နေရသည်။
၁၈၇၅ ခုနှစ်နောက်ပိုင်း တိုကျိုမြို့၏ထိုကဲ့သို့သော အပူချိန် မြင့်တက်မှုကို ပထမဆုံးအကြိမ်အဖြစ်မှတ်တမ်းတင်ခဲ့ကြောင်း ဂျပန်မိုးလေဝသအေဂျင်စီက ပြောဆိုထားပြီးဩဂုတ် ၂၇ ရက်တွင် ၁ဝ ရက် ဆက်တိုက်ပြည့်မြောက်မည်ဖြစ်သည်။
၁၈၉၈ ခုနှစ်နောက်ပိုင်း ယခုနှစ်ဇွန်လနှင့် ဇူလိုင်လတို့သည် ဂျပန် နိုင်ငံအတွက် အပူဆုံးလများဖြစ်ခဲ့ပြီး ဩဂုတ်လတွင် အလယ်ပိုင်းရှိ အီစီဆာကီမြို့၌ အပူချိန် ၄၁ ဒသမ ၈ ဒီဂရီစင်တီဂရိတ်အထိ မြင့်တက်ကာ နိုင်ငံ၏အမြင့်ဆုံးအပူချိန်ကို မှတ်တမ်းတင်ခဲ့သည်။
အပူဒဏ်ကြောင့် အသက်သေဆုံးခြင်းများကို ကာကွယ်ရန်အတွက် နေအိမ်ပြင်ပသွားလာခြင်းများကို အတတ်နိုင်ဆုံး ရှောင်ကြဉ်ကြရန်နှင့် သင့်လျော်သော လေအေးပေးစက်ရှိရာ နေရာများတွင် နေထိုင်ရန်အပါအဝင် အပူချိန်သတိပေးချက်များကို တာဝန်ရှိသူများက ထုတ်ပြန်သတိပေးထားသည်။
စီအင်န်အေ
