တကယ်တော့ "ခန္ဓာကိုယ် ပျော့ပျောင်းမှုမရှိလို့ ယောဂကျင့်လို့မရဘူး" ဆိုတဲ့ အတွေးဟာ အကြီးမားဆုံး အထင်အမြင်လွဲမှားမှုတစ်ခုပဲ။ ဒီလိုပြောတာက "စာမတတ်လို့ ကျောင်းမတက်တော့ဘူး" ဒါမှမဟုတ် "ကိုယ်လက်မသန်မာလို့ အားကစားရုံမသွားတော့ဘူး" လို့ ပြောနေတာနဲ့ ဘာမှမထူးဘူး။
စဉ်းစားကြည့်လေ... ငါတို့က သန်မာချင်လို့ အားကစားရုံသွားတာ၊ သန်မာပြီးသားမို့လို့ သွားတာမှ မဟုတ်တာ။ အဲဒီလိုပဲ၊ ငါတို့ဟာ ခန္ဓာကိုယ်နဲ့ စိတ်ရဲ့ ပျော့ပျောင်းမှုကို ရဖို့၊ ခွန်အားကိုရဖို့၊ ငြိမ်းချမ်းမှုကိုရဖို့ ယောဂကျင့်တာ။ ပျော့ပျောင်းပြီးသားလူတွေမှ ကျင့်ရတာမဟုတ်ဘူး။
ယောဂရဲ့ တကယ့်အနှစ်သာရ
လူတော်တော်များများက ယောဂဆိုတာကို Instagram တို့၊ Facebook တို့မှာတွေ့ရတဲ့ ခြေထောက်ကို ခေါင်းပေါ်တင်ထားတာတို့၊ လက်တစ်ဖက်တည်းနဲ့ ကိုယ်ကို ထောက်ထားတာတို့လို အလှပြကစားနည်းတစ်ခုလို့ ထင်နေကြတယ်။ ဒါဟာ ယောဂရဲ့ အပေါ်ယံ အခွံသက်သက်ပဲ ရှိပါသေးတယ်။
ယောဂရဲ့ တကယ့်အနှစ်သာရက "ပေါင်းစပ်ခြင်း" ပဲ။ ဘာတွေကို ပေါင်းစပ်တာလဲဆိုတော့ ကိုယ့်ရဲ့ "ခန္ဓာကိုယ်၊ စိတ် နဲ့ အသက်ရှူမှု" ဒီသုံးခုကို တစ်ထပ်တည်းကျအောင် ချိတ်ဆက်ပေးတာ။
မင်းရဲ့ ကိုယ်ဟန်အနေအထားက ဘယ်လောက်ကွေးကွေးညွတ်ညွတ်ဖြစ်နေလဲဆိုတာ အဓိကမဟုတ်ဘူး။ အဲဒီကိုယ်ဟန်အနေအထားထဲမှာ မင်းရဲ့စိတ်က ဘယ်လောက်တည်ငြိမ်နေလဲ၊ မင်းရဲ့အသက်ရှူမှုက ဘယ်လောက်တည်ငြိမ့်မူဖြစ်နေလဲ ဆိုတာကသာ အဓိကကျတာ။
ခန္ဓာကိုယ်တောင့်တင်းသူများအတွက် အားသာချက် မပျော့ပျောင်းတဲ့သူတွေမှာ အားသာချက်တွေတောင် ရှိပါသေးတယ်။
1. ပိုပြီးသတိထားမိတယ်ခန္ဓာကိုယ်က တောင့်တင်းနေတော့ ဘယ်ကြွက်သားကို ဆန့်ထုတ်နေလဲ၊ ဘယ်နေရာမှာ တင်းနေလဲဆိုတာကို ပိုပြီး သိလွယ်တယ်။ ဒီအသိကပဲ ကိုယ့်ခန္ဓာကိုယ်ကို ပိုနားလည်လာစေတယ်။
2. တိုးတက်မှုကို ရှင်းရှင်းလင်းလင်းမြင်ရတယ်အစပိုင်းမှာ လက်က ခြေဖျားကို မမီပေမဲ့၊ လေ့ကျင့်လာတဲ့အခါ လက်တစ်လုံးလောက် ပိုနီးလာတာ၊ အရင်ကထက် ခါးနည်းနည်းပိုကွေးလာတာတွေကို မြင်ရတဲ့အခါ ကိုယ့်ကိုယ်ကိုယ် အားတက်ပြီး ပျော်ရွှင်ကျေနပ်မှုကို ပိုခံစားရတယ်။
3. ခွန်အားကို ပိုတည်ဆောက်နိုင်တယ်အရမ်းပျော့တဲ့သူတွေက တစ်ခါတလေ ကြွက်သားခွန်အားကိုမသုံးဘဲ အရိုးအဆစ်တွေအပေါ်မှာပဲ အားပြုလိုက်တတ်ကြတယ်။ တောင့်တင်းတဲ့သူတွေကတော့ ကိုယ်ဟန်အနေအထားတစ်ခုမှာ နေနိုင်ဖို့ ကြွက်သားခွန်အားကို ပိုသုံးရတဲ့အတွက် ခန္ဓာကိုယ်ရဲ့ တည်ငြိမ်မှုနဲ့ ခွန်အားကို ပိုပြီး တည်ဆောက်နိုင်ပါတယ်။
ယောဂစကျင့်တော့မယ်ဆိုရင် ဒီအချက်တွေကို လိုက်နာကြည့်ပါ...
* ကိုယ့်ခန္ဓာကိုယ်ရဲ့စကားကို နားထောင်ပါ
ယောဂမှာ အရေးအကြီးဆုံး စည်းမျဉ်းပဲ။ နာကျင်တဲ့အထိ အတင်းမလုပ်ပါနဲ့။ ဆန့်ထုတ်လိုက်လို့ "တင်း" နေတဲ့ ခံစားမှုနဲ့ "စူး" ကနဲ နာကျင်တဲ့ ခံစားမှုကို ခွဲခြားသိရမယ်။
* အထောက်အကူပစ္စည်းတွေကို သုံးပါ
(Yoga Block)၊ (Yoga Strap)၊ တို့ဟာ မပျော့ပျောင်းတဲ့သူတွေအတွက် အကောင်းဆုံးမိတ်ဆွေတွေပဲ။ လက်က ကြမ်းပြင်ကို မမီရင် Block ကိုခုသုံးပါ။ ခြေထောက်ကို မမီရင် Strap နဲ့ ဆွဲပါ။ သူတို့က ကိုယ်ဟန်အနေအထားမှန်အောင် ကူညီပေးပါလိမ့်မယ်။
* အသက်ရှူခြင်းကို အဓိကထားပါ
ဘယ်ကိုယ်ဟန်အနေအထားမှာပဲဖြစ်ဖြစ် အသက်ကို ပုံမှန်ရှူပါ။ အသက်အောင့်မထားပါနဲ့။ အသက်ပြင်းပြင်းရှူသွင်းပြီး ကိုယ်ကို ဆန့်ထုတ်၊ အသက်ရှူထုတ်ရင်းနဲ့ ဖြည်းဖြည်းချင်း ကွေးညွှတ်ကြည့်ပါ။
* သူတစ်ပါးနဲ့ မနှိုင်းယှဉ်ပါနဲ့
ယောဂကော်ဇောပေါ်မှာ ကိုယ့်ဘေးကလူက ဘယ်လောက်ပျော့ပျောင်းနေပါစေ စိတ်မပူပါနဲ့။ လူတစ်ယောက်နဲ့တစ်ယောက် ခန္ဓာကိုယ် တည်ဆောက်ပုံ၊ အရိုးအဆစ်အနေအထား မတူညီကြဘူး။ ဒါဟာ ကိုယ့်ရဲ့ ကိုယ်ပိုင်ခရီးစဉ်တစ်ခုပဲ။
ဒါကြောင့် "ငါ့ခန္ဓာကိုယ်က သစ်သားတုံးကြီးလိုပဲ မာကျောနေတာ" လို့တွေးပြီး ယောဂကျင့်ဖို့ လက်မတွန့်ပါနဲ့။ ယောဂကော်ဇောဆိုတာ ပျော့ပျောင်းတဲ့သူတွေအတွက် သီးသန့်နေရာမဟုတ်ပါဘူး။ သူဟာ ကိုယ့်ကိုယ်ကိုယ် ကောင်းအောင် ကြိုးစားချင်တဲ့၊ ကိုယ့်ရဲ့ ကန့်သတ်ချက်တွေကို ကျော်လွှားချင်တဲ့ လူသားတိုင်းအတွက် ကြိုဆိုနေတဲ့ မှော်ကော်ဇောတစ်ချပ်ပဲ ဖြစ်ပါတယ်။
မင်းရဲ့ခရီးက လက်ချောင်းထိပ်လေးတွေက ခြေဖျားကို ထိဖို့ကြိုးစားရာကနေ စရမှာပေါ့။ အဲဒီခရီးကနေတစ်ဆင့် မင်းရလာမှာက ပျော့ပျောင်းတဲ့ ခန္ဓာကိုယ်တစ်ခုတည်းမဟုတ်ဘဲ၊ တည်ငြိမ်တဲ့စိတ်၊ ခိုင်မာတဲ့ခွန်အားနဲ့ ဘဝရဲ့ အတက်အကျတွေကို ရင်ဆိုင်နိုင်တဲ့ ပျော့ပျောင်းတဲ့ နှလုံးသားတစ်ခုကိုပါ ပိုင်ဆိုင်လာမှာဖြစ်တယ်။
ကဲ... ယောဂကော်ဇောပေါ်ကို ယုံကြည်မှုရှိရှိနဲ့ တက်လှမ်းလိုက်ပါ။ သူက သင့်ကို ကြိုဆိုနေပါပြီ။