ဘန်ကောက်မြို့ဟောင်း Sam Yot MRT နား လည်ပတ်လို့ ကောင်းတဲ့ စျေး ၄ ခု
ဘန်ကောက်မြို့ဟောင်း ဧရိယာထဲမှာဆိုရင် ရှေးကတည်းက ရှိတဲ့ စျေးတွေအပြင် စိတ်ဝင်စားဖွယ် ထူးခြားတဲ့ စျေးတွေ အများကြီးရှိပါတယ် ၊ အဲ့ဒီထဲကမှ Sam Yot MRT ဘူတာကနေ အလွယ်တကူ လမ်းလျှောက်သွားလို့ ရမယ့် စျေးနေရာ ၄ ခုအကြောင်းကို ဖော်ပြပေးလိုက်ပါတယ်ဗျ။
Mega Plaza Saphan Lek
SamYot MRT ရဲ့ Exit 1 က ထွက်ပြီး Maha Chai လမ်းမကြီးအတိုင်း Chao Phraya မြစ်ဖက်ကို လမ်းအနည်းငယ်လျှောက်တာနဲ့ ပထမဦးဆုံးတွေ့ရမှာက Mega Plaza Saphan Lek ဆိုတဲ့ ကုန်တိုက်ပါ ၊ ဒီကုန်တိုက်ရဲ့ ထူးခြားချက်ကတော့ ကုန်တိုက်တစ်ခုလုံး အရုပ်ဆိုင်တွေနဲ့ ပြည့်နေတာပါ ။
ဒီကုန်တိုက်မှာ ဆိုင်ခန်းပေါင်း ၆၀၀ ကျော် ရှိပြီး ဆိုင်အများစုဟာ ကလေးကစားစရာ အရုပ်ရောင်းတဲ့ဆိုင်တွေဖြစ်ပါတယ် ၊ အရုပ်အသစ် အဟောင်းတွေသာမက ၊ တကူးတကစုဖို့ ထုတ်လုပ်ထားတဲ့ ရှားပါး အရုပ်မျိုးတွေထိ ဒီကုန်တိုက်မှာ ရပါတယ် ၊ ဒါ့အပြင် ဂိမ်းစက်တွေ ၊ ဂိမ်းခွေတွေ ရောင်းတဲ့ဆိုင်တွေအပြင် ကင်မရာအဟောင်းရောင်းဆိုင်တွေထိ ရှိပါတယ်။ ကလေးငယ်လေးတွေကို အရုပ်ဝယ်ပေးချင်ရင် ဖြစ်ဖြစ် ၊ အရုပ်စုဆောင်းရတာ ဝါသနာပါရင်ဖြစ်ဖြစ် ဒီကုန်တိုက်ကို သွားကြည့်ဖို့ ညွှန်းပေးရမှာပါ ။
Phahurat Market (Little India)
Mega Plaza ကနေ ကားလမ်းကူးပြီး လမ်းနည်းနည်းလျှောက်လိုက်တာနဲ့ Phahurat စျေးဧရိယာကို ရောက်ပါမယ်ဗျ ၊ Phahurat လမ်းမကြီးမှာ ဆောက်လုပ်ထားတဲ့ စျေးဖြစ်တာမို့ Phahurat စျေးလို့ ခေါ်ပါတယ် ။ ဒီစျေးကိုတော့ Little India လို့လည်း သိကြပါတယ် ။
အိန္ဒိယဝတ်စုံ ၊ အသုံးအဆောင်နဲ့ စားသောက်ကုန်တွေ ဝယ်ယူလို့ရတဲ့ စျေးနေရာပါ ။ ဒီနေရာမှာက အိန္ဒိယဝတ်စုံတွေတင်မဟုတ်ပဲ အထည်အလိပ် ပိတ်စတွေကိုလည်း ဝယ်ယူနိုင်မယ့် စျေးဖြစ်ပါတယ်။ အိန္ဒိယစားသောက်ဆိုင်တွေလည်း ဒီဧရိယာထဲမှာ အများကြီး ရှိပါတယ်။
Sampheng Market (၁၀ ဘတ်တန်စျေး)
Phahurat စျေးရဲ့ မျက်နှာခြင်းဆိုင်မှာ Sampheng စျေးရှိပါတယ် ၊ Mega Plaza ရှိတဲ့ လမ်းမကနေ လမ်းနည်းနည်းလျှောက်ပြီး Phahurat စျေးဖက်မဝင်ပဲ ကားလမ်းကူးလိုက်ရင် Sampheng စျေးနေရာကို ရောက်မှာပါ ၊ ဒီ Sampheng စျေးကတော့ မြန်မာတွေကြားမှာ ၁၀ ဘတ်တန်စျေးလို့လည်း လူသိများပါတယ် ၊
စျေးက လမ်းသွယ်လေးရဲ့ နှစ်ဖက်မှာ ဆိုင်ခန်းတွေဖွင့်ပြီးရောင်းကြတဲ့ လက္ကာစျေးတစ်ခုဖြစ်ပါတယ် ၊ ဒီလက္ကားစျေးကတော့ အဝတ်အစားရောင်းချတဲ့ ဆိုင် အနည်းငယ်ရှိပြီး အဓိကအားဖြင့် လူသုံးကုန်ပစ္စည်း ၊ အလှကုန်ပစ္စည်း ၊ ဖန်စီပစ္စည်း လက်ကိုင်အိတ် ၊ ဖိနပ် အပါအဝင် တိုလီမုတ်စမျိုးစုံကို ဝယ်လို့ရတဲ့ စျေးဖြစ်ပါတယ် ၊ စျေးဧရိယာက အတော်ကြီးသလို ဝယ်ယူလို့ရတဲ့ ပစ္စည်းလည်း အတော်လေးကို စုံလင်များပြားပါတယ်။
The Old Siam Palaza
The Old Siam Palaza ကတော့ Mega Plaza ဘေးလမ်းကနေ လျှောက်သွားရင် ရောက်နိုင်သလို ၊ SamYot MRT ဘူတာရဲ့Exit 3 ကနေ ထွက်လိုက်မယ်ဆိုရင် စျေးထိပ်ကို တန်းပြီးတော့ ရောက်ပါတယ် ။ ဒီစျေးရုံကြီးဟာလည်း Phahurat လမ်းမပေါ်မှာ ရှိတဲ့ စျေးဖြစ်ပါတယ် ။ ပလာဇာရဲ့ အနေအထားက ရှေးဟောင်းစျေးရုံကြီးတစ်ခုနဲ့ တူပြီးတော့ ခမ်းနားပါတယ် ၊ အပြင်အဆင်အားဖြင့် ရှေးဟောင်းစျေးကြီးတစ်ခု ပုံစံဖြစ်ပေမယ့် ပလာဇာ တစ်ခုလုံးဟာ သပ်ရပ်သန့်ရှင်း လှပနေတာ​က စျေးဝယ်လာသူတွေကို စိတ်ချမ်းသာစေတာ အမှန်ပါပဲ ။
ဒီပလာဇာမှာတော့ စျေးဝယ်စင်တာရဲ့ နာမည် အပြင်အဆင်အတိုင်းပဲ ထိုင်းရိုးရာ ပိုးထည်တွေ ၊ အထည်စတွေနဲ့ ထိုင်းဝတ်စုံအမျိုးမျိုးကို ဝယ်ယူနိုင်မှာ ဖြစ်ပါတယ် ၊ ထိုင်းဝတ်စုံတွေက ချုပ်ပြီးသားအထည်တွေ ရှိသလို ၊ ကိုယ့်ရဲ့ ကိုယ်တိုင်းနဲ့လည်း ချုပ်ခိုင်းလို့ ရပါတယ် ၊ ထိုင်းမှာ ပွဲတက်အခမ်းအနားတွေ သွားဖို့ ရှိလို့ ထိုင်းဝတ်စုံ ကောင်းကောင်း လိုချင်တယ်ဆိုရင် ဒီပလာဇာကို သွားကြည့်သင့်ပါတယ်။ ဆိုင်ခန်းပေါင်း ရာနဲ့ ချီပြီးတော့ ရှိပြီး အများစုက ထိုင်းရိုးရာဝတ်စုံနဲ့ အလှဆင်ပစ္စည်းတွေ ရောင်းချတဲ့ ဆိုင်တွေပါ ၊ ဒီစျေးရဲ့ မြေညီထပ်က Street Food ဆိုင်တွေဟာလည်း သန့်ရှင်းသပ်ရပ်ပြီးတော့ အစားအသောက်ချစ်သူတွေအတွက် အဆင်ပြေတဲ့နေရာပါ ။
အခုဖော်ပြပေးခဲ့တဲ့ စျေးနေရာ ၄ ခုဟာ ဘန်ကောက်မြို့ဟောင်း ဧရိယာထဲမှာ ရှိတာဖြစ်ပြီး တစ်နေရာနဲ့ တစ်နေရာဟာ လမ်းလျှောက်သွားရုံ ၊ ကားလမ်းကူးလိုက်ရုံနဲ့တင် ရောက်တဲ့ အကွာအဝေးမှာတင် ရှိတာမို့ စျေးဝယ်ထွက်ချင်သူတွေအတွက် အဆင်ပြေစေပါတယ် ၊ သွားရေလာရေး အတွက်ဆိုရင်လည်း MRT အပြာလိုင်းရဲ့ Samyot ဘူတာကနေ အလွယ်တကူ လမ်းလျှောက်သွားလို့ ရပါတယ်။
စျေးနေရာတွေရဲ့ Google Map Link တွေကို ကွန်မန့်မှာ ကြည့်နိုင်ပါတယ်။