“ရှုခင်းသာသည့် နံကိုင်းတောင်နှင့် ရှင်ပင်နံကိုင်းဘုရား”အပိုင်း (၆)
ဆရာတော်ကြီးသည် ဇာတိရွာ နဘက်ကြီး၌ ရွှေဥမင်ဘုရားကြီးနှင့် ကျောင်းကြီးကိုလည်း ပြုပြင်ခဲ့ပြီး ဥပုသ်ဇရပ်တစ်ဆောင်လည်း ဆောက်လုပ်လှူဒါန်းခဲ့သည်။ နဘက်ရွာစာသင်ကျောင်းအဆင့် တိုးမြှင့်ရရှိရေးနှင့် တိုက်နယ်ဆေးရုံဖွင့်လှစ်နိုင်ရေးတို့ ဆောင်ရွက်ခဲ့သည်။ ၁၃၆၀ ပြည့်နှစ်တွင် အဂ္ဂမဟာသဒ္ဓမ္မဇောတိကဘွဲ့ နှင့် ၁၃၆၆ ခုနှစ်တွင် အဘိဓဇအဂ္ဂမဟာသဒ္ဓမ္မဇောတိကဘွဲ့တို့ ရရှိခဲ့သည်။ဆရာတော်ကြီးသည် နေ့စဉ် မဟာသမယသုတ်နှင့် အခြားပရိတ်တော်၊ သုတ်တော်များရွတ်ဖတ်ပြီး သတ္တဝါများ ကျန်းမာချမ်းသာစေကြောင်း မေတ္တာပို့သည်။ သက်တော် ၃၀ ကျော်မှစ၍ ဘုရားဂုဏ်တော်များ ပွားများအားထုတ်ခြင်း၊ မေတ္တာဘာဝနာ၊ ကာယဂတာနုဿတိဘာဝနာတို့ကို တစ်နေ့လျှင် ငါးနာရီအချိန်ယူ၍ ပွားများအားထုတ်ခြင်းတို့ ပြုလုပ်ခဲ့သည်။ဆရာတော်ကြီးသည် ၁၃၇၉ ခုနှစ် ဝါဆိုလဆန်း ၈ ရက်(၂၀၁၇ ခုနှစ် ဇူလိုင်လ ၁ ရက်)နေ့က သက် တော် ၁၀၀ ပြည့်မြောက်သဖြင့် ထိုနေ့မှာ ရာပြည့်မွေးနေ့ပူဇော်ပွဲကျင်းပခဲ့သည်။ သက်တော် ၁၀၂ နှစ်၊ ဝါတော် ၈၂ နှစ်ရှိချိန် ၂၀၁၉ ခုနှစ် ဇန်နဝါရီလ ၂၉ ရက်(၁၃၈၀ ပြည့်နှစ် ပြာသိုလပြည့်ကျော် ၉ ရက်) အင်္ဂါနေ့တွင် တစ်ဘဝချုပ်ငြိမ်းတော်မူသည်။ ဆရာတော်ကြီး၏ ဥတုဇရုပ်ကလာပ်ကို နံကိုင်းတောင်အတက် ကားလမ်းနှင့် စောင်းတန်းအကြား ကုန်းမြင့်ပေါ်တွင် မီးပူဇော်ခဲ့သည်။ရှင်ပင်နံကိုင်းဘုရားနှင့် ဆက်နွှယ်၍ အတော်အတန်ရေးသားပြီးနောက် ‘ရှင်ပင်နံကိုင်းရွှေတစ်ဆိုင်း’ ဟူသော အစဉ်အဆက်ပြောဆိုနေကြသည့် ပုံပြင်ဆန်ဆန် ဆိုရိုးကလေးကိုလည်း ဖော်ပြလိုပါသေးသည်။ ရှင်ပင်နံကိုင်းရွှေတစ်ဆိုင်းဆိုသည်ကို အတော်များများက ကြားဖူးကြပါလိမ့်မည်။ စစ်ကိုင်းနယ်သူနယ်သားများကတော့ ပို၍သိကြပါသည်။‘ရှင်ပင်နံကိုင်း ရွှေတစ်ဆိုင်း’အကြောင်းက ယခုလိုဖြစ်သည်။ ဧရာဝတီမြစ်အတွင်း၌ လှေငယ်တစ်စင်းဖြင့် ကူးသန်းသွားလာကာ ရောင်းဝယ်ဖောက်ကားကြသော ကုန်သည်တို့သည် သောင်မနီး ကမ်းမနီး ရေလယ်တွင်ရှိစဉ် တစ်မိုးလုံးမှိုင်းပြီး မုန်တိုင်းတိုက်သည်နှင့် ကြုံကြရသည်။ လှေမှာ မုန်တိုင်းကြောင့် ပျက်လု၊ မြုပ်လုရှိလာရာ လိုက်ပါလာသူများက ကြောက်လန့်တကြားဖြင့် ရှင်ပင်နံကိုင်းဘုရားကြီးကို မော့ကြည့်ဖူး မြော်ပြီး ‘ရွှေတစ်ဆိုင်းကပ်လှူပါမည်’ဟူ၍ တစာစာအော်ဟစ်ကာ အန္တရာယ်မှ လွတ်မြောက်ပါစေကြောင်း ဆုတောင်း လျှောက်ထားကြသည်။ လေအနည်းငယ်ငြိမ်ကာ ကမ်းကပ်ခါနီးတွင် ရွှေတစ်ဆိုင်းမဟုတ်တော့ဘဲ တစ်ဆိုင်း၏တစ်ဝက်သာ လှူတော့မည်ဖြစ်ကြောင်း ‘ဆိုင်းဝက်ပါဘုရား’ဟု ပြောင်း၍လျှောက်သည်။ ကမ်းသို့ လှေကပ်ပြီး အန္တရာယ်မှလွတ်မြောက်ပြီး ကိုယ့်လိုဘပြည့်သွားသည့်အခါတွင် ဆိုင်းဝက်ကိုပင်မလှူချင်တော့ဘဲ ‘နောက်များမှ လှူပါတော့မည်ဘုရား’ဟု လျှောက်ထားကြလေတော့သည်။ဤသို့ လိုလျှင်တစ်မျိုး မလိုလျှင်တစ်မျိုး ဖြစ်တတ်ကြသော ပုထုဇဉ်လူသားတို့၏ စိတ်သဘောကို ပြောလိုသည့်အခါတွင် ‘ရှင်ပင်နံကိုင်း ရွှေတစ်ဆိုင်း’ဟု ပြောလေ့ရှိကြသည်။တချို့က စစချင်း ရွှေတစ်ဆယ်သားလှူမည်ပြောပြီး နောက်ဆုံး ရွှေတစ်ဆိုင်းသာ လှူတော့သည်ဟု ပြောကြသည်။ အဓိကအဓိပ္ပာယ်အချုပ်ကတော့ အတူတူပင်ဖြစ်သည်။ အပေါ်ကဖွင့်ဆိုချက်မှာ ဓနုဖြူချောင်ဆရာတော်ဘုရားကြီး ဦးအရိယဝံသ၏ ‘စစ်ကိုင်းတောင် အတ္ထုပ္ပတ္တိ သမိုင်းညွန့်ပေါင်း’မှဖြစ်သည်။ယခုဆောင်းပါးအစတွင် ဖော်ပြခဲ့သော ဆရာကြီးဇော်ဂျီ၏ ‘ပဲ့နင်း’ကဗျာကလည်း လူ့မနောကို ဖော်ပြနေသည့် ကဗျာပင်ဖြစ်သည်။ ဂေါဝိန်မှထွက်လာသော ရွက်လှေသည် ရှင်ပင်နံကိုင်းစေတီကို ဖူးမည်ဟန်ပြင်ပြီးမှ အရှေ့ဘက်ကမ်းရှိ ရွှေကြက်ယက်ဘုရားဘက်ကို ဦးလှည့်လိုက်ပြန်သည်။ ထို့နောက် ရွှေကြက်ယက်ဘက် မဟုတ်တော့ပြန်ဘဲ အနောက်ဘက်ကမ်းက ရှင်ပင်နံကိုင်းဘုရားကို ဖူးတော့မည့်ဟန်ဖြင့် နံကိုင်းတောင်ခြေဆီ ဦးတိုက်လိုက်ပြန်သည်။ကြက်နန်းကိုစုန် စုန်ပါတော့လား၊ နံကိုင်းကိုစုန် စုန်ပါတော့လား၊ အခုတော့ ကြက်နန်း(ရွှေကြက်ယက်၊ ရွှေကြက်ကျ)လည်းမရောက်၊ နံကိုင်း(ရှင်ပင်နံကိုင်း)လည်းမရောက်။ ဟိုလိုလို သည်လိုလိုနှင့်၊ ဦးတည်ချက်မပြတ် မသားဖြင့် တစ်ဖက်သားကို လှည့်စားတတ်သည့် လူတွေကို ပဲ့နင်းကဗျာက ထင်ဟပ်ပြနေသည်။ဤကဗျာ၊ ဤအကြောင်းတို့ကို ကြားဖူးဖတ်ဖူးထားသူတို့သည် ရှင်ပင်နံကိုင်းဘုရားရောက်လျှင် ‘ရှင်ပင်နံကိုင်း ရွှေတစ်ဆိုင်း’နှင့် ‘ပဲ့နင်း’ကို သတိရကြပါလိမ့်မည်။ သတိရမိသည့်အလျောက်လည်း ရှင်ပင်နံကိုင်းဘုရားဖူးပြီးနောက် ဧရာဝတီမြစ်ထဲ လှမ်းကြည့်ရင်း လူတွေ၏သဘောကို တစ်ဖန်ထပ်၍ စောကြောမိကြပါလိမ့်မည်။
စာကိုး-(၁)စေတီယကထာမည်သော ရာဇဝင်ချုပ်(မုံရွေးမဟာဇေတဝန်ဆရာတော်),(၂)စစ်ကိုင်းမြို့တည်နန်းတည် အနှစ် ၇၀၀ ပြည့် အထိမ်းအမှတ်မဂ္ဂဇင်း,(၃)စစ်ကိုင်းမြို့ ဝါတွင်းကာလဆွမ်းအလှည့်ကျ ဘုရားစဉ်ဘုရားများသမိုင်းနှင့် အခြားမှတ်တမ်းများ[ဦးမျိုးမြင့်(ဆောက်လုပ်ရေးအင်ဂျင်နီယာ(ငြိမ်း))],(၄)စစ်ကိုင်းတောင်ရိုးမှ သက်တော်ရာကျော် ဆရာတော်ကြီးလေးပါး(ဂျွန်ကောလင်း) [၂၄-၁၁-၂၀၂၁ နှင့် ၂၅-၁၁-၂၀၂၁ နေ့ထုတ် စံတော်ချိန်သတင်းစာများ]
(၅)စစ်ကိုင်းတောင်သမိုင်း(ရွှေပြည်ဦးဘတင်),(၆)စစ်ကိုင်းတောင်အတ္ထုပ္ပတ္တိ သမိုင်းညွန့်ပေါင်း(ဓနုဖြူချောင်ဆရာတော်ဘုရားကြီး ဦးအရိယဝံသ),(၇)စစ်ကိုင်းသာသနာဝင်(အရှင်ကေလာသ),(၈)ဇေယာစလပျို့(မဟာဝိဇ္ဇောဒယဆရာတော်),(၉)ဇေယျာပဗ္ဗတသမိုင်းပေါင်းချုပ်၊ ပထမတောင်ဖီလာပုဂ္ဂိုလ်ကျော်ကျမ်း(မကိုဋ်မှန်ကူဆရာတော် ရေးသားပြုပြင်စီရင်),(၁၀)ပထမထွဋ်ခေါင်ဆရာတော်ဘုရားကြီးအကြောင်း(စစ်ကိုင်းတောင်ရိုး ရွှေဟင်္သာဆရာတော်),(၁၁)မြန်မာပေါရာဏကထာအဘိဓာန်(ပထမတွဲ)(မြန်မာရှေးသုံးစကားအဘိဓာန်)(ကိုရွှေသိမ်းမင်း စုစည်းစိစစ်ခင်းကျင်း),(၁၂)မှန်နန်းမဟာရာဇဝင်တော်ကြီး,(၁၃)ရှင်ပင်နံကိုင်းဘုရားကြီး၏ သမိုင်းအကျဉ်းချုပ်(ဇမ္ဗူ့မင်္ဂလာဆရာတော် ဘဒ္ဒန္တဇနိန္ဒ)(၁၃၅၇ ခုနှစ် ရှင်ပင်နံကိုင်း ရန်အောင်မြင်ရွှေမုဋ္ဌောစေတီတော်မြတ် အဘိဓမ္မာ ၇ ကျမ်းပူဇော်ပွဲ ပင့်ဖိတ်ကြားလွှာ),(၁၄)သုတေသနခရီးသွား ဇေယျာပူရမှတ်တမ်းများ[အောင်ငြိမ်းချမ်း(မန်းတက္ကသိုလ်)],(၁၅)အင်းဝရွှေနန်းရောက် ဗြိတိသျှသံအဖွဲ့မှတ်တမ်း(၁၈၅၅)(တက္ကသိုလ်နေဝင်း)
[၃၁-၈-၂၀၂၄(စနေနေ့)၊ ၁-၉-၂၀၂၄(တနင်္ဂနွေနေ့)နှင့် ၂-၉-၂၀၂၄(တနင်္လာနေ့)ထုတ် စံတော်ချိန်နေ့စဉ်သတင်းစာများ]