တုံ့ပြန်ပြောဆိုမှုဆိုတာ လုပ်ရတယ်တဲ့။
မလုပ်ဘဲနဲ့ ငုံ့ခံနေလို့ ရှိရင် သူတို့စွပ်စွဲမှုတွေက မှန်သလို အဓိပ္ပာယ်ရောက်တတ်တယ်။
ဒါကြောင့်မို့လို့ မမှန်ဘူးဆိုတာ တုံ့ပြန်ပြောရမယ်၊ငုံ့ခံမနေရဘူး။
နေရာတကာတိုင်း၊ဆဲရင်တော့ ငုံ့ခံလိုက်ပေါ့။
ဆဲတာကျတော့ ပြန်မဆဲနဲ့။
ပြန်ဆဲရင်လည်း သူဆဲသလို ဆဲရမှာ ဖြစ်နေတယ်။
ဒီတော့ ကိုယ့်ကို စွပ်စွဲလာပြီဆိုလို့ရှိရင် တုံ့ပြန်ပြောရမယ်တဲ့၊ဖြေရှင်းရမယ်။
မြတ်စွာဘုရားက နောင်မှာလည်း ဒီအတိုင်းပဲ ဟောတယ်။
ဗြဟ္မဇာလသုတ္တန်မှာ မြတ်စွာဘုရားက အဘူတံ အဘူတတော နိ ေဗ္ဗဌေတဗ္ဗံ မဟုတ်ရင် မဟုတ်တဲ့အကြောင်း ဖြေရှင်းရမယ်တဲ့။
စွပ်စွဲလာလို့ရှိရင် ကျင့်စဉ် တစ်ခုကို မြတ်စွာဘုရားဟောထားတာ မှတ်သားပြီးတော့ လိုက်နာဖို့ အင်မတန်မှ ကောင်းတယ်။
“ငါ့ကိုဖြစ်စေ,ငါ့ရဲ့တရားဓမ္မနဲ့ဖြစ်စေ,သံဃာတွေနဲ့ ပတ်သက်ပြီးတော့ ဖြစ်စေ အတင်းအဖျင်း ပြောလာမယ်ဆိုလို့ရှိရင် သင်တို့ စိတ်မဆိုးကြနဲ့တဲ့၊စိတ်ဆိုးနေလို့ အကျိုးမရှိဘူး”တဲ့ ၊
စိတ်ဆိုးနေလို့ရှိရင် အကောင်းအဆိုးဆိုတာ ခွဲခြား သိနိုင်စွမ်း မရှိဘူး။
ဟုတ်တယ် စိတ်ဆိုးနေလို့ရှိရင် အကောင်းအဆိုး အကြောင်း အကျိုး ဘယ်သိမလဲ။
ဒေါသရဲ့လွှမ်းမိုးမှု ခံနေရလို့ရှိရင် အကောင်းအဆိုး အကြောင်းအကျိုး မသိဘူး။
ဒါကြောင့်မို့ စိတ်မဆိုးကြနဲ့တဲ့။
"စိတ်ဆိုးရင် ကိုယ့်စိတ်ကို လွှမ်းမိုးခံထားရပြီးတော့ အကြောင်းအကျိုး အကောင်းအဆိုးကို သိမှာ မဟုတ်ဘူးတဲ့။
ဒါကြောင့်မို့ စိတ်မဆိုးဘဲနဲ့ မမှန်ရင် မမှန်တဲ့အကြောင်း ဖြေရှင်း ချက်ပေးရမယ်လို့ မြတ်စွာဘုရားက ဒီလိုဆုံးမထားတာ ရှိတယ်။
ကျေးဇူးတော်ရှင် ပါမောက္ခချုပ်ဆရာတော်
ဒေါက်တာ နန္ဒမာလာဘိဝံသ
လောကသားတို့အတွက် မြတ်ဗုဒ္ဓ၏ ကြိုးပမ်းချက်(ပထမတွဲ)မှ ကောက်နှုတ်ရေးသားတင်ပြပါသည်။
