ဂါဇာမြို့တော်ကို အလုံးစုံသိမ်းပိုက်ဖို့ အစ္စရေးရဲ့ မြေပြင်ထိုးစစ်သစ် စတင်
တဲလ်အဗစ်၊ ဩဂုတ်-၂၁-၂၀၂၅
မျိုးဆက်(VOM)
ဂါဇာမြို့တော်ကို အလုံးစုံ သိမ်းပိုက်ဖို့ မြေပြင်ထိုးစစ် ကနဦးအဆင့်တွေကို စတင်လိုက်ပြီလို့ အစ္စရေးစစ်တပ်က ထုတ်ပြန်လိုက်ပါတယ်။
ထိုးစစ်အတွက် တပ်ဖွဲ့ဝင်တွေဟာ ဇိုင်တွန်နဲ့ ဂျာဘာလီယာဒေသတွေမှာ စတင်တပ်ဖြန့်နေပြီလို အစ္စရေးကာကွယ်ရေးဝန်ကြီး အစ္စရးကက်ဖ်က အတည်ပြုခဲ့ပြီး ယခုသီတင်းပတ်နှောင်းပိုင်းမှာ လုံခြုံရေးဝန်ကြီးအဖွဲ့ထံ တင်ပြသွားမယ်လို့ ပြောရေးဆိုခွင့်ရှိသူကလည်း ဆိုပါတယ်။
စစ်ဆင်ရေးအတွက် စက်တင်ဘာလဆန်းမှာ စစ်မှုထမ်း ခြောက်သောင်းခန့်ကို ဆင့်ခေါ်ထားပါတယ်။ အပြစ်မဲ့အရပ်သားတွေကို ရက်စက်ကြမ်းကြုတ်တဲ့စစ်ပွဲ ဆက်လက်ဆင်နွှဲဖို့ အပစ်အခတ်ရပ်စဲရေးသဘောတူညီချက်ကို အစ္စရေးက ဟန့်တားနေတယ်လို့ ဟားမတ်စ်က စွပ်စွဲထားပါတယ်။
အစ္စရေးရဲ့ သိမ်းပိုက်ရေးအစီအစဉ်အတွက် ပြင်ဆင်မှုတွေ လုပ်ဆောင်နေချိန်မှာ ဂါဇာမြို့တော်ရှိ ထောင်ပေါင်းများစွာသော ပါလက်စတိုင်းတွေကို ဘေးလွတ်ရာသို့ ရွှေ့ပြောင်းဖို့ ညွှန်ကြားထားပြီး ဂါဇာတောင်ပိုင်းရှိ ခိုလှုံရေးစခန်းတွေကို သွားရောက်ကြဖို့ရှိနေပါတယ်။
ပြင်သစ်သမ္မတ မက်ခရွန်နဲ့ အစ္စရေးရဲ့ မဟာမိတ် အများအပြားက ဒီအစီအစဉ်ကို ရှုတ်ချခဲ့ပြီး ဒါဟာ နှစ်ဖက်စလုံးအတွက် ကောင်းကျိုးမရှိဘဲ ဒေသတခုလုံးကို အမြဲတမ်းစစ်ပွဲသံသရာထဲသို့ ကျရောက်သွားစေမယ့် အန္တရာယ်သာ ဖြစ်နိုင်တယ်လို့ သတိပေးထားပါတယ်။
နိုင်ငံတကာ ကြက်ခြေနီကော်မတီ ကလည်း ဂါဇာကမ်းမြောင်ဒေသရှိ လူဦးရေ ၂ ဒသမ ၁ သန်းအတွက် ဆိုးရွားနေပြီဖြစ်တဲ့ လူသားချင်းစာနာမှုအခြေအနေဟာ ကပ်ဘေးတခုလို ဆိုးရွားသွားနိုင်တယ်လို့ သတိပေးထားပါတယ်။
ပြီးခဲ့တဲ့ လက အပစ်အခတ်ရပ်စဲရေးနဲ့ ဓားစာခံ လွတ်မြောက်ရေး သဘောတူညီချက်ကို ဟားမတ်စ်နဲ့ သွယ်ဝိုက် ဆွေးနွေးပြီးနောက် ဂါဇာကမ်းမြောင်တခုလုံးကို သိမ်းပိုက်ဖို ပအစ္စရေးအစိုးရက ကြေညာခဲ့တာဖြစ်ပါတယ်။
