◼ မြန်မာ၌လှုပ်ခတ်ခဲ့သောငလျင်ဘန်ကောက်မြို့တွင်လည်းခံစားခဲ့ရ၊ လူတချို့အထိတ်တလန့်ထွက်ပြေး
မြန်မာနိုင်ငံတွင်ယနေ့နံနက်ပိုင်းကလှုပ်ခတ်ခဲ့သောမြေငလျင်အားထိုင်းနိုင်ငံ၊ဘန်ကောက်မြို့တော်ရှိတချို့နေရာများတွင်လည်းသိရှိခံစားခဲ့ရပြီးလုပ်ငန်းများမှတာဝန်ရှိသူနှင့်အလုပ်သမားများအဆောက်အဦအတွင်းမှအထိတ်တလန့်ထွက်ပြေးခဲ့ကြကြောင်းထိုင်းသတင်းဌာန Khaosod ကဖော်ပြသည်။
ထိုင်းမိုးလေဝသဌာန၏မြေငလျင်စောင့်ကြည့်ရေးဌာန၏အဆိုအရအဆိုပါင လျင်သည်တာ့ခ်ပြည်နယ်၊မဲဆောက်ခရိုင်မှအနောက်တောင်ဘက် ၂၁၁ ကီ လိုမီတာအကွာရှိမြန်မာနိုင်ငံတောင်ပိုင်းကမ်းလွန်မြေအောက်အနက် ၁၀ ကီ လိုမီတာတွင် ပြင်းအား မဂ္ဂနီကျု ၅ဒသမ၄ဖြင့်လှုပ်ခတ်ခဲ့ခြင်းဖြစ်ကြောင်းသိရသည်။
အဆိုပါငလျင်ကြောင့်ထိုင်းနိုင်ငံနေရာအများအပြား၌အထိတ်တလန့်ဖြစ်ခဲ့ကြပြီး ထိုင်း အလုပ် သမား ဝန်ကြီးဌာနတည်ရှိရာ ဒင်ဒန်ခရိုင်အပါအဝင်တချို့နေရာများမှ အဆောက်အဦအတွင်း တုန်ခါမှုကို ခံစား ခဲ့ရပြီး လူအများအပြားကို အရေးပေါ်ထွက်ခွာစေခဲ့ရသည်။
ထို့အတူဒေသစံတော်ချိန်နံနက် ၉ နာရီ ၅၈ မိနစ်ခန့်တွင် ဝါဒါနာခရိုင်၊ ခလောင်တိုအီနူအာခရိုင်ခွဲ၌လည်း ၁၀ စက္ကန့်အကြာအနည်းငယ်တုန်ခါခြင်းကိုခံစားခဲ့ရပြီးရတ်ချာထဝီခရိုင်၊ဖက်ချာဘူရီခရိုင်ခွဲရှိဘန်ထပ်ထောင်လမ်းပေါ်မှရုံးအ ဆောက်ဦတစ်ခုယိမ်းခါနေကြောင်းလူတစ်ဦးကသတင်းပေးသည်။
မွမ်သာဘူရီခရိုင်၊ဘန်ကရာဆိုခရိုင်ခွဲ၊ခဲရိုင် ဧရိယာမှကိုးလွှာရှိအထပ်မြင့်အ ဆောက်အအုံတစ်ခုလည်း ယိမ်းခါခဲ့ပြီး မူးဝေမှုများခံစားခဲ့ရသည်ဟုဆိုသည်။
ဘန်ကောက်မြို့ရှိ ဘန်ရက် ခရိုင်၊ စီလွန် ခရိုင်ခွဲတွင်လည်း လူအများ မူးဝေမှုခံစားခဲ့ရပြီး အဆောက်အဦနှင့် အရာဝတ္ထုများ လှုပ်ခါသွားသော်လည်းအချိန် မကြာမြင့်ခဲ့ပေ။
ထို့ပြင်ဘန်ကောက်မြို့၊ ဖရာထိုင်းခရိုင် ဆမ်ဆန်နိုင် ခရိုင်ခွဲရှိ အထပ်မြင့် အဆောက်အအုံတစ်ခု၏ ၁၁လွှာ တွင်ယိမ်းခါမှုကို ခံစားခဲ့ရပြီး မီးဆိုင်းများ လှုပ်ယမ်းနေသည်ဟုဆိုသည်။
ဘန်ကောက်မြို့၊ ခလောင်တိုအီခရိုင်ရှိ ကွန်ဒိုတစ်ခု၏ ၁၂ လွှာတွင်ရှိသော ရေလှောင်ကန်အတွင်းရှိ ရေများ လည်းအနည်းငယ် လှိုင်းထနေခဲ့ကြောင်းသိရသည်။
ထို့အတူဘန်ကောက်မြို့၊ ခလောင်ဆန်ခရိုင်ရှိ ကွန်ဒိုတစ်ခု၏ ၁၈ ထပ်တွင် အဆောက်အဦမှပွတ်တိုက်ရွေလျားသံကြားရပြီး မီးဖိုခန်းမီးအိမ်များလှုပ်ယမ်းနေခဲ့သည်။
ဘန်ကောက်မြို့၊ ရတ်ချာထဝီခရိုင်၊ သောင်ဖရာထိုင်းခရိုင်ခွဲတွင် လူအများအပြား အထိတ်တလန့်ဖြစ်ခြင်း၊ မူးဝေခြင်းတို့ကို ခံစားခဲ့ရပြီး မျက်နှာကျက်မီးဆိုင်းများလှုပ်ခါသွားခဲ့ကြောင်းသိရသည်။
သတင်း-လင်းခေတ်
ကိုးကား- Khaosod English
#နိုင်ငံတကာသတင်း
