◼ ဇီလန်စကီးနှင့်ဆွေးနွေးပွဲကိုရုရှားမတင်မကျပြောဆို ၊ ပူတင်က သဘောတူညီမှုယူချင်မှယူမည်ဟု ထရန့် သတိပေး
ယူကရိန်းစစ်ပွဲအဆုံးသတ်ရေး ရုရှားနှင့်ယူကရိန်းခေါင်းဆောင်နှစ်ဦး တွေ့ဆုံ ဆွေးနွေးကြရန် အမေရိကန်သမ္မတ ဒေါ်နယ်ထရန့် က ထပ်လောင်းတိုက်တွန်း ပြောကြားချိန်မှာပင် ပူတင်နှင့် ဇီလန်စကီး ဆွေးနွေးပွဲ ဖြစ်လာနိုင်သည့်အပေါ် ကရင်မလင် က မတင်မကျပြောကြားသည်။
အမေရိကန်သမ္မတ က ဗလာဒီမာပူတင်နှင့် ပြီးခဲ့သည့်သီတင်းပတ်တွင် အလာစကာ၌ တွေ့ဆုံခဲ့ပြီး ယခုသီတင်းပတ်တွင် ဇီလန်စကီးနှင့် ဥရောပခေါင်း‌ဆောင်ခုနစ်ဦး အား အိမ်ဖြူတော်တွင် တွေ့ခဲ့ပြီးနောက် နှစ်ဖက်ဆွေးနွေးရန် တွန်းအားပေးမှု ထွက်ပေါ်လာခြင်းဖြစ်သည်။
ရုရှား-ယူကရိန်းပဋိပက္ခမှာ ဖြေရှင်းရန်ခက်ခဲနေကြောင်း နှင့် ရုရှားသမ္မတက စစ်ပွဲအား အဆုံးသတ်ရန် စိတ်မဝင်စားခြင်းလည်း ဖြစ်နိုင်ကြောင်း အမေရိကန်သမ္မတ ဒေါ်နယ်ထရန့်က ဝန်ခံခဲ့သည်။
“ ရှေ့လာမယ့် သီတင်းပတ်အနည်းငယ်မှာ ကျွန်တော်တို့ သမ္မတ ပူတင်အကြောင်း သိလာရပါလိမ့်မယ်။ သူက သဘောတူညီချက် မယူချင်တာလည်း ဖြစ်နိုင်ပါတယ်။” ဟု ဒေါ်နယ်ထရန့်က ယမန်နေ့တွင်ပြောကြားသည်။
ထိုသို့ ဖြစ်လာခဲ့ပါက ပူတင်အနေဖြင့် ခက်ခဲသောအခြေအနေနှင့်ရင်ဆိုင်ရမည် ဖြစ်ကြောင်း အသေးစိတ်များကို မဖွင့်ဟဘဲ ဒေါ်နယ်ထရန့်က ပြောသည်။
ယူကရိန်းနှင့်တိုက်ရိုက်ဆွေးနွေးပွဲ စိတ်ကူးကို ၎င်းအနေဖြင့် လမ်းဖွင့်ထားကြောင်း ရုရှားသမ္မတ က ဒေါ် နယ် ထရန့်အား တနင်္လာနေ့တွင် ပြောကြားခဲ့သော်လည်း နောက်တစ်နေ့တွင် နိုင်ငံခြား‌ရေးဝန်ကြီး ဆာဂေးလက်ဗ်ရော့က အဆိုပါမရေရာသော ကတိကဝတ်ကို ထပ်မံလျှော့ပေါ့ပြောကြားခဲ့သည်။
ခေါင်းဆောင်နှစ်ဦး တွေ့ဆုံမှုအတွက် တဖြည်းဖြည်း ပြင်ဆင်သွားရမည် ဖြစ်ကြောင်း၊ ကျွမ်းကျင်သူများအဆင့်နှင့် စတင်ပြီးနောက် အခြားလိုအပ်သောအဆင့်များကိုလည်း လုပ်ဆောင်သွားရမည်ဖြစ်ကြောင်း ကရင်မလင် က မကြာခဏပြောကြားခဲ့သည့် ပုံစံအတိုင်း လက်ဗ်ရော့က ထပ်မံပြောကြားသည်။
“တိုက်ရိုက်ဆွေးနွေးနိုင်မယ့်အခွင့်အရေးကို ဘယ်သူကမှ ပယ်ချမထားပါဘူး။ ဒါပေမယ့်လည်း ဒါဟာ မည်ကာမတ္တ တွေ့ဆုံလိုက်တယ် ဆိုတာမျိုးလည်း မဖြစ်သင့်ပါဘူး။” ဟု ကုလသမဂ္ဂဆိုင်ရာ ဒုတိယရုရှားသံအမတ်ကြီး ဒီမီထရီပိုလီယန်စကီး က ဘီဘီစီသတင်းဌာနအားပြောကြားသည်။
ပြီးခဲ့သည့် ရက်ပိုင်းတွင်ပြုလုပ်ခဲ့သော ဆွေးနွေးမှုများမှနေ၍ စစ်ပွဲ၏ရှုပ်ထွေးမှုများ နှင့် မော်စကိုနှင့်ကိဗ်ကြားက ကွာဟချက်ကြီးမားကြောင်း ကို ဒေါ်နယ်ထရန့်တစ်ယောက် ပိုမိုနားလည်လာပုံရကြောင်း ဘီဘီစီသတင်းက ဖော်ပြသည်။
မျှော်လင့်ချက်များ ပုံအောခဲ့ကြသော အပစ်အခတ်ရပ်စဲရေးကို သဘောတူရန် ထရန့်က ပူတင်အား မဆွဲဆောင်နိုင်ဖြစ်ခဲ့ပြီးနောက် ရုရှားနှင့်ယူကရိန်းတို့ အမြဲတမ်းငြိမ်းချမ်းရေး သဘောတူညီချက်ရရှိ‌ရေး လုပ်ဆောင်သင့်သည်ဟု ကန်သမ္မတက ယခုအခါပြောကြားလာခဲ့သည်။
တစ်ဖက်တွင်လည်း ငြိမ်းချမ်းရေးသဘောတူညီချက် ရရှိလာခဲ့ပါက ယူကရိန်းအတွက် ငြိမ်းချမ်းရေး အာမ ခံချက်များက အရေးပါကြောင်း ဥရောပခေါင်းဆောင်များက ဒေါ်နယ်ထရန့် ယုံကြည်အောင် လုပ်ဆောင်နိုင်ခဲ့ကြကာ ယင်းအတွက် ကြိုတင် ဆွေးနွေး ပြင်ဆင်မှုများ ရှိလာခဲ့သည်။
အပစ်အခတ်ရပ်စဲမှု သို့ မဟုတ် ငြိမ်းချမ်းရေးသဘောတူညီမှုရရှိလာခဲ့ပါက ‌ဥရောပက ယူကရိန်းသို့ တပ်ဖွဲ့များ စေလွှတ်ပေးပြီး အမေရိကန်က လေကြောင်းမှ ကူညီပေးနိုင်ကြောင်း ဒေါ်နယ်ထရန့် က ယမန်နေ့တွင်ပြောကြားခဲ့ပြီး အမေရိကန်တပ်ဖွဲ့များ စေလွှတ်ရေးကိုမူပယ်ချခဲ့သည်။
ပြင်သစ်နှင့် ယူကေတို့ ဦးဆောင်သော စိတ်တူကိုယ်တူ မဟာမိတ်အဖွဲ့ကလည်း စစ်ပွဲရပ်တန့်သွားပါက ယူကရိန်းသို့ စေလွှတ်နိုင်မည့် ငြိမ်းချမ်း‌ရေးအာမခံတပ်ဖွဲ့ ဖွဲစည်းရန် အစီအစဉ်များ ခိုင်မာလာစေရန် လုပ်ဆောင်နေကြသည်။
ထိုအ‌တောအတွင်းမှာပင် မစ္စတာပူတင် က ငြိမ်းချမ်းရေးလမ်း လျှောက်လှမ်းမည်လား ဆိုသည်ကို သံသယရှိကြောင်းလည်း ဥရောပ‌‌ခေါင်းဆောင်များက ပြောကြားကြသည်။
ရုရှားသမ္မတ က ငြိမ်းချမ်း‌‌ရေးယူရန် စိတ်အားထက်သန်သလားဆိုခြင်းအပေါ် အကြီးမားဆုံးသံသယ ရှိကြောင်း ပြင်သစ်သမ္မတ မက်ခရွန်ကပြောကြားသည်။
မစ္စတာပူတင်အား ယုံကြည်စိတ်ချနိုင်ခြင်းမှာ အလွန်ရှားပါးကြောင်း နှင့် ဇီလန်စကီး နှင့် အစည်း အဝေးဖြစ်ပေါ်လာနိုင်ခြေကိုလည်း ယုံမှားသံသယရှိနေကြောင်း ဖင်လန်သမ္မတ အလက်ဆန်းဒါးစတပ်ဗ်ကလည်း ပြောကြားသည်။
သတင်း-ရဲမင်း
ကိုးကား-BBC
#နိုင်ငံတကာသတင်း