◼ ရေကြီးခဲ့သော ဧရိယာများတွင် ကယ်ဆယ်ရေးလုပ်ငန်းများကို ပါကစ္စတန်ပြန်လည်စတင်၊ သေဆုံးသူ ၃၀၀ ကျော်ရှိ
မိုးသည်းထန်မှုကြောင့် လုပ်ငန်းများကို နာရီများစွာ ရပ်တန့်ထားခဲ့ရပြီးနောက် ရုတ်တရက်ရေကြီးမှုများဖြစ်ပေါ်ပြီး လူပေါင်း ၃၀၀ ကျော် အသက်ဆုံးရှုံးခဲ့ရသော နိုင်ငံအနောက်မြောက်ပိုင်းတွင် ကယ်ဆယ်ရေးနှင့်အကူအညီပေးရေး လုပ်ငန်းများကို ပါကစ္စတန်အာဏာပိုင်များက ပြန်လည်စတင်လိုက်ကြောင်း အစိုးရအရာရှိတစ်ဦးက ပြောသည်။
သောကြာနေ့က စတင်ခဲ့သော မိုးသည်းထန်မှုများက မြောက်ပိုင်းခရိုင်းအများအပြားတွင် ကြီးမားသော ပျက်စီးဆုံးရှုံးမှုများ လူ့အသက်ဆုံးရှုံးမှုများဖြစ်ပေါ်စေခဲ့ကာ လူအများစုမှာ လျှပ်တစ်ပြက်ရေကြီးမှုများကြောင့် အသက်ဆုံးရှုံးခဲ့ရကြောင်း အမျိုးသား ဘေးအန္တရာယ်စီမံခန့်ခွဲရေးရုံးက ပြောကြားသည်။
တောင်ထူတပ်သောဧရိယာများတွင် မိုးသည်းထန်မှုနှင့်အတူ ရွှံ့နွံများ၊ ကျောက်တုံးများ ပြိုဆင်းမှုများဖြစ်ပေါ်လာခဲ့ကာ နေအိမ်များ ၊ကားများ ၊ အဆောက်အဦးများ နှင့် အခြားပိုင်ဆိုင်မှုများ မျောပါသွားခဲ့ရသည်။ ရေကြီး မြေပြိုမှုဒဏ်အဆိုးရွားဆုံး ခံစားခဲ့ရသော ဘူနာခရိုင်တွင် သေဆုံးသူ ၂၀၀ ကျော်ခဲ့သည်။
ဘူနာခရိုင်အပါအဝင် ရေကြီးမှုဖြစ်ခဲ့သော ဧရိယာများတွင် မိုးသည်းထန်နေခဲ့သဖြင့်လည်း ကယ်ဆယ်ရေးအဖွဲ့များက နာရီပေါင်းများစွာ ကယ်ဆယ်ရေးလုပ်ငန်းများ ဆိုင်းငံ့ထားခဲ့ရကြောင်း ဒေသခံအစိုးရ အရာရှိ အဘစ်ဝါဇေ က ရိုက်တာသတင်းဌာနကိုပြောကြားသည်။
“ အခုအချိန်မှာ ဦးစားပေးက လမ်းတွေကို ရှင်းလင်းဖယ်ရှား၊ တံတားတွေပြန်ထိုးပြီး ထိခိုက်ခဲ့တဲ့သူတွေကို အကူအညီပေးပို့ရေးဖြစ်ပါတယ်” ဟု ၎င်းက ပြောသည်။
ထိခိုက်ခဲ့သော ဒေသများသို့ ကယ်ဆယ်ရေးပစ္စည်းများ ပို့ဆောင်ထားပြီဖြစ်ကြောင်း ပြန်ကြားရေးဝန်ကြီး အက်တော်လာတာရာ က ပါကစ္စတန် Geo News ရုပ်သံအားပြောကြားသည်။
အစားအသောက်၊ ဆေးဝါး၊ စောင်များ၊ ယာယီတဲများ၊ မီးစက်တစ်လုံး နှင့် ရေစုပ်ထုတ်သော ပန့်များလည်း ကယ်ဆယ်ရေးပစ္စည်းများတွင် ပါဝင်ကြောင်း ဘေးအန္တရာယ်စီမံခန့်ခွဲရေးရုံးက ထုတ်ပြန်ပြောကြားသည်။
မြို့တော် အစ္စလာမာဘတ်မှ ကားဖြင့် သုံးနာရီခွဲသွားရသော ဘူနာ ခရိုင်သည် ကျဉ်းမြောင်းသောဧရိယာတွင် ရုတ်တရက်မိုးပြိုသည့် ရှားပါးသောဖြစ်ရပ် (cloudburst) နှင့် ကြုံတွေ့ခဲ့ရကြောင်း ယင်းဧရိယာတွင် တစ်နာရီအတွင်း မိုးရေချိန် ၅ လက်မကျော် ရွာသွန်းခဲ့ကြောင်း အရာရှိများက ပြောကြားကြသည်။
သတင်း-ရဲမင်း
ကိုးကား-Reuters
#နိုင်ငံတကာသတင်း
