တရားထိုင်တဲ့အခါ အတွေးတွေကို ဘယ်လိုဖျောက်ရမလဲ အရှင်ဘုရား။
ဝိတက်က တော်တော်တိုက်ဖျက်ရခက်တယ်။ ဝိတက်ကို တိုက်တဲ့အခါမှာ အာနာပါနက အကောင်းဆုံးပဲ။ သို့သော်လည်း အာနာပါန အားထုတ်ရင်းကိုက ဒီဝိတက်ကို မနိုင်နိုင်ဖြစ်နေတယ်။ အဲ့လိုမနိုင်တဲ့အချိန်အခါမှာတော့ ကမ္မဋ္ဌာန်းကို ခဏရပ်ထားလိုက်။ ရပ်ထားပြီးတော့ မိမိရဲ့သေခြင်းတရားလေးကို အများဆုံးဆင်ခြင်ပေးပါ။ မရဏာနုဿတိကမ္မဋ္ဌာန်းကိုပွားရင် အဲဒါက အကျိုးကျေးဇူး သိပ်များတယ်။ တစ်ခါတစ်ရံ ဗုဒ္ဓနုဿတိကမ္မဋ္ဌာန်းဘက်ကို ပြောင်းပေးလိုက်။ စိတ်ကလေးတွေက နည်းနည်း ကြည်လင်လာမယ်နော်။ အကောင်းဆုံးဆင်ခြင်တာကတော့ အဲဒီဝိတက်များရင် အာနာပါနကို အားထုတ်ပါ။
သို့သော် မနိုင်ဘူးဆိုရင်တော့ မရဏာနုဿတိက ပိုကောင်းတယ်။ မိမိသေတဲ့ပုံကို ဉာဏ်ထဲမှာ မြင်အောင်ကြည့်။ တကယ်တမ်းပုပ်ပွလာတဲ့ပုံကို ဉာဏ်ထဲမှာ မြင်အောင်ကြည့်။ အဲဒီသေခြင်းတရားကို ဆင်ခြင်တဲ့အပိုင်းမှာလည်း တစ်ခါတုန်းက ဘုရားရှင်က ရဟန်းတွေကို မေးခွန်းမေးခဲ့ဖူးပါတယ်။ မရဏာနုဿတိကမ္မဋ္ဌာန်းကို သင်ဘယ်လိုပွားသလဲ။ တစ်ပါးက ၇ရက်အတွင်း မသေရရင်တော့ တော်ပြီပေါ့။ ငါ ၇ရက်လောက်ဘုရားတရား အားထုတ်ရရင် တော်ပြီလို့ ဒီလိုနှလုံးသွင်းတယ်။ တစ်ပါးကတော့ တစ်ရက်လောက်၊ နောက်တစ်ပါးကျတော့ တစ်မွန်းတည့်လောက်။ တစ်ပါးကတော့အသက်တစ်ရှူပဲ။ ဒီအသက် တစ်ရှူအတွင်းမှာကိုပဲ ငါမသေပဲနဲ့ ဘုရားတရားလေး နှလုံးသွင်းရရင် တော်ပြီလို့ နှလုံးသွင်းတယ်တဲ့။ အဲဒီလောက်အထိ သေခြင်းတရားကို နီးနီးကပ်ကပ် နှလုံးသွင်းတာကို ဘုရားရှင်က နှစ်သက်တယ်။
ဘုန်းကြီးတို့ပရိသတ် အခု ၉နာရီ ထိုးတော့မယ်။ ၉နာရီကျရင် အကုန်လုံးသေမယ်လို့ နှလုံးသွင်းလိုက်ရင် မနက်ဖြန် ဘာလုပ်မယ်ဆိုတဲ့ စီမံကိန်းတွေကို ဖျက်သိမ်းလို့ မရဘူးလား။ ရသွားတယ်နော်။ ဒါဝိတက်သန့်ရှင်းရေးမှာ သိပ်ကောင်းတယ်နော်။ ဒါကြောင့် ဒီမရဏာနုဿတိလေးကို ခဏခဏ ပွားပေးပါ။ ကိုယ်ပွားတဲ့အခါမှာ ကိုယ်သေနေတာကိုလည်း မြင်အောင်ကြည့်၊ ကိုယ်ချစ်တဲ့သူတွေ သေနေတာကိုလည်း မြင်အောင်ကြည့်။ ချန်တော့မထားနဲ့။
📌 ဖားအောက်ဆရာတော်ဘုရားကြီး
Credit - KHH
#ဓမ္မအသိဖြင့်အကျိုးရှိရှိနေမည်
