◼ ယူကရိန်းကိုယ်တိုင် အနာဂတ်ကို ဆုံးဖြတ်ပိုင်ခွင့်ရှိရမည်ဟု ဥရောပခေါင်း ဆောင်များပြောကြား
ယူကရိန်းစစ်ပွဲနှင့်ပတ်သက်၍ ယခုသီတင်းပတ်နှောင်းပိုင်းတွင် ရုရှားသမ္မတ ဗလာဒီမာပူတင်နှင့်ပြုလုပ်မည့် ထိပ်သီးတွေ့ဆုံမှု၌ ၎င်းတို့၏ လုံခြုံရေးအကျိုးစီးပွားများကို ကာကွယ်ရန် ဥရောပသမဂ္ဂခေါင်းဆောင်များက အမေရိကန်သမ္မတ ဒေါ်နယ်ထရန့်အား ပန်ကြားခဲ့ကြသည်။
၎င်းတို့အား ဖိတ်ကြားခဲ့ခြင်းမရှိသော သောကြာနေ့ အစည်းအဝေးအပေါ် လွှမ်းမိုးမှုတချို့ ထည့်သွင်းရန် ဥရောပက ကြိုးစားနေပြီး အဆိုပါ တွေ့ဆုံမှု၌ ယူကရိန်းပါဝင်မည်လား ဆိုသည်မှာလည်း ရှင်းရှင်းလင်းလင်းမရှိသေးပေ။
စစ်ပွဲအဆုံးသတ်ရေးအပေါ် သမ္မတ ပူတင် က အလေးအနက်ရှိသလား ဆိုသည်ကို ၎င်းအနေဖြင့် လေ့လာလိုကြောင်း အမေရိကန်သမ္မတ ဒေါ်နယ်ထရန့်က ပြောကြားသည်။
သို့ရာတွင် ရုရှားက ထိန်းချုပ်ထားသော နယ်မြေအချို့ကို ယူကရိန်းက စွန့်လွှတ်သွားရမည်ဖြစ်ကြောင်း ပြောကြားခြင်းဖြင့် ထရန့်က အမေရိကန်မဟာမိတ်တချို့အား စိတ်ပျက်စေခဲ့သည်။
နယ်မြေအလဲအလှယ်လုပ်ခြင်းကို ရုရှားဘက်ကလည်း လက်သင့်ခံရမည်ဟု ထရန့်ကပြောကြားခဲ့သော်လည်း ပူတင်ဖက် က လိုက်လျောမည်လားဆိုခြင်းမှာ ရှင်းရှင်းလင်းလင်းမရှိပေ။
ယူကရိန်းနိုင်ငံသားများက ၎င်းတို့၏ အနာဂတ်ကို လွတ်လပ်စွာ ဆုံးဖြတ်ပိုင်ခွင့် ရှိရမည်ဖြစ်ကြောင်း နှင့် သံတမန်ရေးဖြေရှင်းမှုတစ်ရပ်သည် ယူကရိန်းနှင့် ဥရောပအကျိုးစီးပွားများကို ကာကွယ်စောင့်ရှောက်သွားရမည်ဖြစ်ကြောင်း ဥရောပနိုင်ငံ ၂၆ နိုင်ငံ အကြီးအကဲများက ထုတ်ပြန်ချက်တစ်ရပ်တွင် ပြောကြားသည်။
အပစ်အခတ်ရပ်စဲထားခြင်း သို့မဟုတ် တိုက်ခိုက်မှုများလျှော့ချထားခြင်း အခြေအနေအောက်တွင်သာ အဓိပ္ပာယ်ပြည့်ဝသောဆွေးနွေးညှိနှိုင်းမှုများ ဖြစ်ပေါ်နိုင်ကြောင်း ၊ သံတမန်ရေးဖြေရှင်းချက်တစ်ရပ်သည် ယူကရိန်းနှင့် ဥရောပ၏ လုံခြုံရေးအကျိုးစီးပွားများကို ကာကွယ်ပေးရမည် ဟု မိမိတို့ ယုံကြည်ပါကြောင်း ဥရောပခေါင်းဆောင်များက ဆက်လက်ပြောကြားသည်။
တနင်္လာနေ့ညနေပိုင်းတွင် သဘောတူခဲ့ကြပြီး ယနေ့ နံနက်တွင် ထုတ်ပြန်ခဲ့သော သဘောတူညီချက်အား ဟန်ဂေရီနိုင်ငံမှလွဲ၍ ကျန်အီးယူအဖွဲ့ဝင် ၂၆ နိုင်ငံစလုံး က ထောက်ခံချက်ပေးခဲ့ကြကြောင်း သိရသည်။
တစ်ဖက်တွင်လည်း အပစ်အခတ်ရပ်စဲမှုရရှိရန် ယူကရိန်းက နယ်မြေများ စွန့်လွှတ်ပေးရန် ကတိပြုရမည်ဟူသော စိတ်ကူးကိုလည်း ယူကရိန်းသမ္မတ ဗိုလိုဒီမာ ဇီလန်စကီးက ပယ်ချထားသည်။
ဒေါ်နယ်ထရန့်ကမူ နယ်မြေအလဲအထပ် လုပ်ခြင်းများ ပါဝင်မည်ဖြစ်ကြောင်း ယမန်နေ့ကပင် ထပ်မံပြောကြားခဲ့သည်။
သောကြာနေ့ထိပ်သီးဆွေးနွေးပွဲကို အမေရိကန်နိုင်ငံပိုင် အလက်စကာပြည်နယ်တွင် ကျင်းပမည်ဖြစ်ကာ ယင်းနယ်မြေမှာ ၁၈၆၇ ခုနှစ်တွင် ဇာဘုရင် ဒုတိယအလက်ဇန်းဒါး က အမေရိကန်ထံ ရောင်းချလိုက်ချိန်အထိ ရုရှားကိုလိုနီဖြစ်ခဲ့သော ဒေသ ဖြစ်သည်။
သတင်း-ရဲမင်း
ကိုးကား-FRANCE 24
#နိုင်ငံတကာသတင်း
