◼ ငြိမ်းချမ်းရေးဆွေးနွေးရန် အာမေးနီးယားနှင့် အဇာဘိုင်ဂျန်ခေါင်းဆောင်တို့ကို အိမ်ဖြူတော်၌ ဒေါ်နယ်ထရန့် လက်ခံတွေ့ဆုံမည်
အာမေးနီးယားနှင့် အဇာဘိုင်ဂျန်ခေါင်းဆောင်နှစ်ဦး ငြိမ်းချမ်းရေးဆွေးနွေးနိုင်ရန် ၎င်းတို့အား အမေရိကန်သမ္မတ ဒေါ်နယ်ထရန့်က အိမ်ဖြူတော်၌ လက်ခံတွေ့ဆုံသွားမည် ဖြစ်ကြောင်း အမေရိကန်အရာရှိတစ်ဦးက ရိုက်တာသတင်းဌာနအား ပြောကြားသည်။
သောကြာနေ့ အစည်းအဝေးတွင် ငြိမ်းချမ်း‌ရေးသဘောတူညီမှုဆိုင်ရာ မူဘောင် သဘောတူညီချက်တစ်ခုကို ကြေညာနိုင်မည်ဟု မျှော်လင့်ကြောင်း အဆိုပါအရာရှိက ဆက်ပြောသည်။
အိမ်ဖြူတော် ဆွေးနွေးမှုများနှင့်ပတ်သက်၍ ဝါရှင်တန်ပို့စ် က ဦးစွာ သတင်းဖော်ပြခဲ့ကြောင်း သိရသည်။
၁၉၉၁ ခုနှစ်တွင် ဆိုဗီယက်ယူနီယံ ထံမှ လွတ်လပ်ရေး ရရှိခဲ့ကြသော နှစ်နိုင်ငံသည် အဇာဘိုင်ဂျန်၏ ဒေသတစ်ခုဖြစ်သော နာဂါနို-ကာရာဘက်ဒေသက အာမေးနီးယား၏ အကူအညီဖြင့် အဇာဘိုင်ဂျန်နိုင်ငံထဲမှ ခွဲထွက်သွားခဲ့သည့် ၁၉၈၀ ခုနှစ်များ ကတည်းက တစ်ဖက်နှင့်တစ်ဖက် ရန်စောင်နေခဲ့ကြသည်။
၂၀၂၃ ခုနှစ်တွင် အဇာဘိုင်ဂျန်နိုင်ငံက ယင်းဒေသကို ပြန်လည်တိုက်ခိုက်သိမ်း ပိုက်ခဲ့ရာ ယင်းဒေသတွင် နေထိုင်သော အာမေးနီးယားလူမျိုး တစ်သိန်းခန့် အာမေးနီးယားနိုင်ငံသို့ ထွက်ပြေးသွားခဲ့ရသည်။
ယင်းနှစ်နိုင်ငံက မူကြမ်းငြိမ်းချမ်းရေးသဘောတူညီချက်တစ်ခုကို မတ်လက နှစ်ဖက် သဘောတူခဲ့ကြပြီးနောက်ပိုင်းတွင်မူ တိုးတက်မှုနှေးကွေးသွားခဲ့သည်။
ပြဿနာကိုဖြေရှင်းရန် အာမေးနီးယားဝန်ကြီးချုပ် နီကိုးလ်ပါရှင်ယန်နှင့် အဇာဘိုင်ဂျန်သမ္မတ အီလ်ဟမ်အလီယက်ဗ်တို့ ဇူလိုင်လအတွင်း အဘူဒါဘီ၌ တွေ့ ဆုံခဲ့ကြသော်လည်း ပြေလည်မှုမရသေးပေ။
အငြင်းပွားနေသော ဒေသ၌ ခရစ်ယာန် အာမေးနီးယားများ နေထိုင်ခဲ့သည့် ခြေ ရာလက်ရာ အားလုံးကို အများအားဖြင့်မွတ်ဆလင်များဖြစ်သည့် အဇာဘိုင်ဂျန်တို့က ဖျောက်ဖျက်ပစ်နေကြောင်း ကုလသမဂ္ဂ၏ နိုင်ငံတကာတရားရုံး(ICJ) သို့ တင်ပြသော အမှုတွင် အာမေးနီးယား က စွပ်စွဲခဲ့သည်။
ယင်းအမှုမှာလည်း နာဂါနို-ကာရာဘက် ဒေသနှင့် ပတ်သက်၍ နှစ်နိုင်ငံကြား အပြည့်အဝ စစ်ခင်းခဲ့ကြပြီး လူပေါင်း ၆၆၀၀ ဦး သေဆုံးခဲ့သည့် ၂၀၂၀ ပြည့်စစ်ပွဲမှ ပေါ်ထွက်လာခဲ့ခြင်းဖြစ်သည်။
အာမေးနီးယားလူမျိုးများအား နာဂါနို-ကာရာဘက် ဒေသသို့ ပြန်ခွင့်ပြုရမည်ဟု ကုလထိပ်တန်းတရားရုံးက ဆုံးဖြတ်ခဲ့သည်။
ဒေသခံများအားလုံး ၏ ဘေးကင်းလုံခြုံမှုကို အာမခံကြောင်း နှင့် ၎င်းတို့အ နေဖြင့် မည်သည့် အာမေးနီးယားလူမျိုးကိုမှ ကာရာဘက်ဒေသမှ အတင်းအဓ္ဓမ ထွက်ခွာခိုင်းခြင်း မရှိခဲ့ကြောင်း အဇာဘိုင်ဂျန်က ပြန်ကြားခဲ့သည်။
အာမေးနီးယားလူမျိုးများကသာ ၁၉၉၀ နှစ်များက အဇီရီလူမျိုးများကို မောင်းထုတ်ခဲ့ကြကြောင်း အဇာဘိုင်ဂျန်က စွပ်စွဲပြောကြားသည်။
သတင်း-ရဲမင်း
ကိုးကား-Reuters
#နိုင်ငံတကာသတင်း