#ယနေ့ထုတ်သတင်းစာ_သတင်း
◼ ထိုင်းနယ်စပ်တွင် မြန်မာနိုင်ငံသား ၄၅ ဦး ဖမ်းဆီးခံရ
ထိုင်းနိုင်ငံ တာ့ခ်ခရိုင် ဖုပ်ဖရာတွင် ဩဂုတ် ၄ ရက် ညပိုင်းက တရားမဝင်နယ်စပ်ဖြတ်ကျော် ဝင်ရောက်လာသည့် မြန်မာနိုင်ငံသား ၄၅ ဦးနှင့် ခေါ်ဆောင်လာသူနှစ်ဦးကို ဖမ်းဆီးခဲ့ကြောင်း ထိုင်းသတင်းတွင် ဖော်ပြချက်အရ သိရသည်။
ရာ့ချ်မနူအထူးတပ်ဖွဲ့မှ ခြေလျင်တပ်ရင်း ၄၂၁ နှင့် ဖုပ်ဖရာခရိုင် ရဲတပ်ဖွဲ့၊ အုပ်ချုပ်ရေးအဖွဲ့တို့သည် ဖုပ်ဖရာမြို့နယ် ဟိုင်နမ့်နတ်ကျေးရွာ ဝန်းကျင်တွင် ကင်းလှည့်စဉ် ယာဉ်လေးစီး မောင်းနှင်လာသည်ကိုတွေ့ရှိခဲ့ပြီး ယာဉ်များကို ရပ်တန့်ရန် အချက်ပြစစ်ဆေးခဲ့ရာ ယာဉ်များအတွင်း၌မြန်မာနိုင်ငံသား ၄၅ ဦးကို တွေ့ရှိခဲ့ပြီး ၎င်းတို့အား တရားမဝင်နယ်စပ်ဖြတ်ကျော်မှုဖြင့် ဖမ်းဆီးခဲ့ခြင်းဖြစ်ကြောင်း သိရသည်။
ခေါ်ဆောင်သူနှင့် အကူအညီပေးသူ ယာဉ်မောင်းနှစ်ဦးကို ဖမ်းဆီးရမိခဲ့ပြီး နှစ်ဦးမှာ ထွက်ပြေးလွတ်မြောက်သွားကာ ရဲတပ်ဖွဲ့၏ စစ်ဆေးမေးမြန်းမှုအရ ယာဉ်မောင်းနှစ်ဦးသည် တာ့ခ်ခရိုင် ဖုပ်ဖရာမြို့နယ် ဟိုင်နမ့်နတ် ကျေးရွာပြောင်းခင်း တစ်ခုမှ မြန်မာနိုင်ငံသားများကို ခေါ်ဆောင်လာခဲ့ပြီး ဖုပ်ဖရာခရိုင် ခီရီရတ်မြို့နယ် ၄၈ ကီလိုမီတာသို့ ပို့ဆောင်ရန်ဖြစ်ပြီး လူတစ်ဦးလျှင် ပို့ဆောင်ခဘတ် ၅ဝဝ ရရှိမည်ဟု ဝန်ခံခဲ့ကြောင်း သိရသည်။
မြန်မာနိုင်ငံသား ၄၅ ဦးမှာ အမျိုးသား ၂၃ ဦးနှင့် အမျိုးသမီး ၂၂ ဦးဖြစ်ပြီး ဗန်ကောက်မြို့တွင် အလုပ်လုပ်ရန် ရည်ရွယ်ချက်ဖြင့် လာရောက်ခြင်းဖြစ်ကြောင်း ရဲတပ်ဖွဲ့ထံဝန်ခံခဲ့ပြီး ၎င်းတို့အား ဖုပ်ဖရာရဲစခန်းသို့ ဥပဒေအရ အရေးယူနိုင်ရန် လွှဲပြောင်းပေးအပ်ခဲ့ကြောင်း သိရသည်။
