◼ တာချီလိတ်၌ မိန်းကလေး အလောင်းတစ်လောင်း တွေ့ရှိ
ရှမ်းပြည်နယ်(အရှေ့ပိုင်း)၊ တာချီလိတ်မြို့၌ အသက်(၈) နှစ်အရွယ်ရှိ မိန်းကလေးတစ်ဦး၏ ရုပ်အလောင်းကို ယမန်နေ့(ဩဂုတ် ၄ ရက်) က မိုင်းဖုန်း(ခ)နန်းမလွှတ်ရွာမဲခေါင်မြစ်အတွင်းတွေ့ရှိခဲ့ ကြောင်း ဦးလှမိုး(တာချီလိတ်) လူမှုကူညီရေးအသင်းထံမှသိရသည်။
သေဆုံးသူမှာ ဟောင်လိတ်ဝမ်ဟောင်ရပ်ကွက်တွင် မိခင်နှင့်အတူနေထိုင်သူဖြစ်ပြီး ဇူလိုင် ၃၀ ရက်၊ မွန်းလွဲ ၂ နာရီခန့်တွင်မိခင်ဖြစ်သူအဝတ်လျှော်နေချိန် နေအိမ်မှကစားရန်ထွက်သွားခဲ့ပြီး ညနေအထိ ပြန်လည်းရောက်လာခြင်းမရှိသောကြောင့် မိခင်ဖြစ်သူမှရှာဖွေပေးရန် အကူညီတောင်းခံထားသူဖြစ် ကြောင်း အဆိုပါလူမှုကူညီရေးအသင်းထံမှသိရသည်။
"ကလေး dead body တစ်ခုတွေ့ထားပါတယ်။ လာရောက် ကူညီပေးပါဆိုပြီး ကျွန်မတို့အသင်းဆီ ဖုန်းဆက်လာပါတယ်။ ဒါကြောင့်သွားရောက်ကူညီခဲ့ရာသေဆုံးနေတဲ့ကလေးမှာ ဇူလိုင် ၃၀ ရက်မှာ မိခင်ဖြစ်သူက အသင်းကိုဓာတ်ပုံနဲ့အတူလာပြီးကူညီရှာဖွေပေးဖို့ အကူညီတောင်းခံထားတဲ့သမီးလေး မငြိမ်းနှင်းနွယ်ဖြစ်နေကြောင်းစိတ်မကောင်းစွာဖြင့်သိရှိခဲ့ရပါတယ်" ဟု ဦးလှမိုး(တာချီလိတ်) လူမှုကူညီရေးအသင်းမှတာဝန်ရှိသူတစ်ဦးကပြောသည်။
ယင်းကလေးသေဆုံးမှုနှင့်ပတ်သက်ပြီး ပျောက်ဆုံးနေသည့်မိန်းကလေးနေအိမ်သို့အဝင်အထွက်ရှိပြီး သံသယရှိသူဟုယူဆရသူအမျိုးသားတစ်ဦးကို ဟောင်လိတ်နယ်မြေရဲစခန်းမှ စစ်ဆေးမှုများဆောင်ရွက် လျက်ရှိကြောင်းသိရသည်။
သတင်း - ပိုင်လေး
ဓာတ်ပုံ - ဦးလှမိုး(တာချီလိတ်) လူမှုကူညီရေးအသင်း
#ပြည်တွင်းသတင်း