◼ တောင်တရုတ်ပင်လယ်တွင် ဖိလစ်ပိုင်နှင့်အိန္ဒိယရေတပ် ပထမဆုံး ပူးတွဲ ခုတ်မောင်း
ဖိလစ်ပိုင်သမ္မတ ဖာဒီနန်မားကို့စ် က နယူးဒေလီသို့ နိုင်ငံတော် အလည်အပတ်ခရီးထွက်ခွာသွားချိန်မှာပင် ဖိလစ်ပိုင်နှင့် အိန္ဒိယရေတပ်တို့က တောင်တရုတ်ပင်လယ်တွင် ပူးတွဲ ခုတ်မောင်းခဲ့ကြကြောင်း တာဝန်ရှိသူများက ယနေ့ ပြောကြားသည်။
အဆိုပါရေလမ်းကြောင်းတွင် တရုတ်နိုင်ငံ၏ ပိုင်ဆိုင်ကြောင်း ကျယ်ပြန့်သော ပြောဆိုမှု များကို တန်ပြန်ရန် စာချုပ်မဟာမိတ် အမေရိကန်အပြင်၊ ဂျပန်၊ ဩစတြေးလျ၊ ပြင်သစ်၊ ကနေဒါ နှင့် ပူးတွဲခုတ်မောင်းသွားလာမှုများ အပါအဝင် နိုင်ငံရပ်ခြားရေတပ်များနှင့် ပူးပေါင်းလှုပ်ရှားမှုများကို ဖိလစ်ပိုင်က ၂၀၂၃ ခုနှစ် နှောင်းပိုင်းမှ စတင်လုပ်ဆောင်ခဲ့သည်။
ယမန်နေ့က စတင်ခဲ့သည့် နှစ်ရက်ကြာပူးတွဲခုတ်မောင်းသွားလာမှု စိတ်ကူးကို မတ်လက ၎င်း၏ အိန္ဒိယခရီးစဉ်အတွင်း အိန္ဒိယစစ်ဘက်အကြီးအကဲ နှင့် တွေ့ဆုံချိန်က ရရှိခဲ့ခြင်း ဖြစ်ကြောင်းနှင့် ဖိလစ်ပိုင်၏ သီးသန့်စီးပွားရေးဇုန်အတွင်းမှာပင် ပြုလုပ်ခဲ့ခြင်း ဖြစ်ကြောင်း ဖိလစ်ပိုင် စစ်ဘက်အကြီးအကဲ ရိုမီရို ဘရောင်နာက ပြောကြားသည်။
“ မလိုလားအပ်တဲ့ ဖြစ်ရပ်တွေ ကျွန်တော်တို့ မကြုံခဲ့ပါဘူး။ ဒါပေမယ့်လည်း မျှော်လင့်ထားသလိုပဲ ကျွန်တော်တို့ကို နောက်ယောင်ခံခဲ့တဲ့ သူတွေရှိပါတယ်။” ဟု တရုတ် အား နာမည်တပ်ခြင်းမရှိဘဲ ဘရောင်နာက သတင်းထောက်များအား ပြောကြားသည်။
နယ်မြေဒေသနှင့် ရေကြောင်းအငြင်းပွားမှုများအား တိုက်ရိုက်ပတ်သက်သော နိုင်ငံများကြားတွင်သာ ဖြေရှင်းသင့်ကြောင်းနှင့် ကြားနိုင်ငံများ မပါဝင်သင့်ကြောင်း တရုတ်နိုင်ငံခြားရေးဝန်ကြီးဌာနက ထုတ်ပြန်ချက်တစ်ရပ်၌ ပြောကြားသည်။
နှစ်နိုင်ငံ ပထမဆုံးအကြိမ် ပူးတွဲ ခုတ်မောင်းသွားလာမှုတွင် အိန္ဒိယနိုင်ငံမှ ပဲ့ထိန်း ဒုံးကျည် တပ်သင်္ဘောတစ်စီး၊ ရေနံတင်သင်္ဘောတစ်စီး နှင့် စစ်ရေယာဉ်တစ်စီး ပါဝင်ခဲ့ကာ ဖိလစ်ပိုင်ရေတပ် မှ ဖရီးဂိတ်နှစ်စီးနှင့် အခြား စစ်ရေယာဉ်နှစ်စီး ပါဝင်ခဲ့ကြောင်း သိရသည်။
ယင်းပူးတွဲ လေ့ကျင့်မှုသည် ဖိလစ်ပိုင်သမ္မတ ဖာဒီနန်မားကို့စ်၏ ငါးရက်ကြာအိန္ဒိယခရီးစဉ်နှင့်လည်း တိုက်ဆိုင်နေသည်။ ရေကြောင်းဆိုင်ရာ ပူးပေါင်းလုပ်ဆောင်မှုအပြင် ကာကွယ်ရေး၊ ဆေးဝါးလုပ်ငန်း ၊ စိုက်ပျိုးရေးလုပ်ငန်း တို့တွင်လည်း အိန္ဒိယနှင့် ပူးပေါင်းဆောင်ရွက်လိုကြောင်း မားကို့စ်က ပြောသည်။
ဘရူနိုင်း၊ အင်ဒိုနီးရှား၊ မလေးရှား ဖိလစ်ပိုင်နှင့် ဗီယက်နမ်တို့၏ ပင်လယ်ပြင် စီးပွားရေးဇုန်များလည်း ပါဝင်သော တောင်တရုတ်ပင်လယ်တစ်ခုနီးပါးအား တရုတ် က သူပိုင်အဖြစ် ပြောဆိုနေသည်။
တရုတ်နိုင်ငံ၏ ပိုင်ဆိုင်မှု ပြောဆိုခြင်းများမှာ နိုင်ငံတကာဥပဒေအခြေခံမရှိကြောင်း ၂၀၁၆ ခုနှစ်တွင် နိုင်ငံတကာ အငြင်းပွားမှုဖြေရှင်းရေးတရားရုံး တစ်ရုံးက ဆုံးဖြတ်ထားသော်လည်း တရုတ်က ပယ်ချထားသည်။
သတင်း-ရဲမင်း
ကိုးကား-Reuters
#နိုင်ငံတကာသတင်း
