#ယနေ့ထုတ်သတင်းစာ_သတင်း
◼ ဂျပန်ပင်လယ်ဒေသ၌ ရုရှားနှင့်တရုတ် ရေတပ်စစ်ရေးလေ့ကျင့်မှု ပြုလုပ်
တရုတ်နှင့် ရုရှားရေတပ်တို့မှ စစ်သင်္ဘောများသည် ဂျွိုင့်ဆီး- ၂ဝ၂၅ အမည်ရှိ နှစ်စဉ်ပူးတွဲ စစ်ရေးလေ့ကျင့်မှုကို ဂျပန်ပင်လယ်ဒေသ၌ ဩဂုတ် ၃ ရက်တွင် စတင်ပြုလုပ်နေပြီဖြစ်ကြောင်း သိရသည်။
ဂျွိုင့်ဆီး-၂၀၂၅ ပူးတွဲရေတပ် စစ်ရေးလေ့ကျင့်မှုကို ရုရှားနိုင်ငံ ဗလာဒီဗော့စတော့ ဆိပ်ကမ်းအနီး ဂျပန်ပင်လယ်အတွင်း ပြုလုပ်နေခြင်းဖြစ်ကြောင်း တရုတ်ကာကွယ်ရေးဝန်ကြီးဌာနက သတင်းထုတ်ပြန်ထားသည်။
သုံးရက်ကြာမြင့်မည့် ဂျွိုင့်ဆီး-၂ဝ၂၅ ပူးတွဲ စစ်ရေးလေ့ကျင့်မှုအတွင်း တရုတ်နှင့်ရုရှားစစ် သင်္ဘောများသည် ရေငုပ်သင်္ဘော ချေမှုန်းရေး၊ လေကြောင်းရန်ကာကွယ်ရေးနှင့် ပင်လယ်ပြင်တိုက် ပွဲဝင်မှု လေ့ကျင့်ခန်းများ ပြုလုပ်သွားမည်ဖြစ်ကြောင်း သိရသည်။
တရုတ်နှင့် ရုရှားနိုင်ငံတို့သည် ဂျွိုင့်ဆီး ပူးတွဲရေတပ်စစ်ရေးလေ့ကျင့်မှုများကို ၂ဝ၁၂ ခုနှစ်ကပင် စတင်ပြုလုပ်ခဲ့ပြီး ၂၀၂၄ ခုနှစ်တွင်မူ တရုတ်နိုင်ငံ တောင်ပိုင်းကမ်းရိုးတန်းဒေသ၌ ပြုလုပ်ခဲ့သည်။
ရုရှားနှင့်တရုတ်တို့သည် နှစ်နိုင်ငံမိတ်ဖက်ဆက်ဆံရေးကိုမြှင့်တင်၍ အမေရိကန်ပြည်ထောင်စု ဦးဆောင်သော နိုင်ငံတကာ ဖွဲ့စည်းခင်းကျင်းမှု ပုံစံကို တန်ပြန်ထိန်းညှိရန် ကြိုးပမ်းနေသောနိုင်ငံ များဖြစ်သည်။
ပြီးခဲ့သည့်နှစ်များအတွင်း ရုရှားနှင့်တရုတ်တို့သည် နှစ်နိုင်ငံ စစ်ရေးပူးပေါင်းဆောင်ရွက်မှုများကိုလည်း မြှင့်တင်ခဲ့သည်။
တရုတ်နိုင်ငံသည် ရုရှား၏ သုံးနှစ်ကျော်ကြာ ယူကရိန်းကျူးကျော်စစ်ကို တရားဝင်ရှုတ်ချဝေဖန်မှုမရှိခဲ့သလို ယူကရိန်းမှ ရုရှားတပ်များကိုပြန်လည် ရုပ်သိမ်းပေးရေးအတွက်လည်း တောင်းဆိုခဲ့ခြင်း မရှိပေ။
အေပီ