သင့်တင့်သည့် ကုန်ဈေးနှုန်းများဖြစ်စေရေး ထိန်းသိမ်းကြပ်မတ်ရန် နိုင်ငံတော်ဝန်ကြီးချုပ်ပြော
ရန်ကုန်
ဈေးကွက်အတွင်းမှာ သင့်တင့်တဲ့ ကုန်ဈေးနှုန်းတွေ ဖြစ်စေရေး ဝန်ကြီးဌာနတွေအပါအဝင် သက်ဆိုင်ရာ တိုင်ဒေသကြီး၊ ပြည်နယ်တွေအလိုက် ထိန်းသိမ်းကြပ်မတ် ဆောင်ရွက်ဖို့ နိုင်ငံတော်ဝန်ကြီးချုပ် ဦးညိုစောက ပြောပါတယ်။
သြဂုတ်လ ၁ ရက်နေ့က နိုင်ငံတော်ဝန်ကြီးချုပ်ရုံး အစည်းအဝေးခန်းမမှာ ပထမဆုံးအကြိမ် ကျင်းပခဲ့တဲ့ ပြည်ထောင်စုအစိုးရအဖွဲ့ အစည်းအဝေးမှာ ဦးညိုစောက အထက်ပါအတိုင်း ထည့်သွင်းပြောကြားခဲ့တာပါ။
မိမိတို့နိုင်ငံအနေနဲ့ စိုက်ပျိုးမွေးမြူရေးကို အခြေခံတဲ့ စီးပွားရေးကို ဆောင်ရွက်ပြီး နိုင်ငံ့စီးပွားရေးကို မြှင့်တင်ဆောင်ရွက်နေတယ်လို့ ဆိုပါတယ်။
ဒါ့ကြောင့် စိုက်ပျိုးမွေးမြူရေးကုန်ထုတ်လုပ်ငန်းတွေ တိုးတက်အောင်ဆောင်ရွက်နိုင်မှပဲ နိုင်ငံခြားငွေတွေ ယခုထက် ပိုမိုတိုးတက်ရရှိမှာဖြစ်တယ်လို့လည်း ဆက်ပြောပါတယ်။
တစ်ဖက်မှာလည်း တောင်သူတွေရဲ့ စားဝတ်နေရေးအတွက် ဝင်ငွေတိုးတက်လာမှာဖြစ်ပြီး နိုင်ငံ့စီးပွား ဖွံ့ဖြိုးတိုးတက်လာနိုင်မယ်လို့ နိုင်ငံတော်ဝန်ကြီးချုပ်က ပြည်ထောင်စုအစိုးရအဖွဲ့ အစည်းအဝေးမှာ ပြောကြားခဲ့ပါတယ်။
ယခုနှစ် မိုးရာသီမှာ စိုက်ဧကပြည့်မီစေရေးနဲ့ ပန်းတိုင်အထွက်နှုန်း တိုးတက်စေရေးအတွက် ဓာတ်မြေဩဇာတွေကို တောင်သူတွေလက်ဝယ် အချိန်မီရောက်ရှိစေရေး သက်ဆိုင်ရာဝန်ကြီးဌာနတွေ၊ တိုင်းဒေသကြီးနဲ့ ပြည်နယ် အသီးသီးအနေနဲ့ ဆောင်ရွက်သွားရမယ်လို့ ဆိုထားပါတယ်။
ယခုကာလမှာ နိုင်ငံတော်အနေနဲ့ အခက်အခဲတွေကို ကျော်လွှားပြီး ဆောင်ရွက်နိုင်ခဲ့တာတွေ ရှိတယ်လို့ ဝန်ကြီးချုပ် ဦးညိုစောက ပြောကြားထားပါတယ်။
