#ယနေ့ထုတ်သတင်းစာ_နိုင်ငံတကာသတင်း
◼ ဟိုက်ပါဆိုးနစ်ဒုံးကျည်များ ထုတ်လုပ်မှုစတင်နေပြီဟု ရုရှားသမ္မတ ပြောကြား
အသံထက်မြန်နှုန်းလွန် ဟိုက်ပါဆိုးနစ်ဒုံးကျည်များ ထုတ်လုပ်မှုကို စတင်နေပြီဖြစ်ကြောင်း ရုရှားသမ္မတပူတင်က ဩဂုတ် ၁ ရက်တွင် ထုတ်ဖော်ပြောကြားလိုက်သည်။
ယင်းအပြင်အဆိုပါ ဟိုက်ပါဆိုးနစ်ဒုံးကျည်များအား မဟာမိတ်ဘီလာရုစ်နိုင်ငံ၌ နေရာချဖြန့်ကြက်ထားမည့် အစီအစဉ်ကိုလည်း ရုရှားသမ္မတပူတင်က ထပ်မံအတည်ပြုခဲ့ကြောင်း သိရသည်။
လက်ရှိအချိန်တွင် ရုရှားစစ်ဘက်အနေဖြင့် အော်ရက်ရှ်နစ်ခ် အမျိုးအစား အထက်ပါဟိုက်ပါဆိုးနစ် ဒုံးကျည်စနစ်များ ဖြန့်ကြက်မည့်နေရာများကို စတင်ရွေးချယ်နေပြီဖြစ်ကြောင်း ရုရှားသမ္မတပူတင်က ဘီလာရုစ်သမ္မတ လူကာရှန်ကိုနှင့် စိန့်ပီတာစဘတ်မြို့၌ တွေ့ဆုံဆွေးနွေးစဉ် ထုတ်ဖော်ပြောကြားထားသည်။
ရုရှားသမ္မတပူတင်၏ အဆိုအရ ပထမဆုံးအသုတ် အော်ရက်ရှ်နစ်ခ် ဟိုက်ပါဆိုးနစ်ဒုံးကျည်စနစ်များကို ရုရှားလက်နက်ကိုင်တပ်များက စတင်သုံးစွဲနေပြီဖြစ်ကြောင်း သိရသည်။
ပြီးခဲ့သည့်နှစ် နိုဝင်ဘာလအတွင်းယူကရိန်းနိုင်ငံကို တိုက်ခိုက်စဉ် အော်ရက်ရှ်နစ်ခ် ဟိုက်ပါဆိုးနစ်ဒုံးကျည်စနစ်ကို ပထမဆုံးအကြိမ်အဖြစ် စမ်းသပ်အသုံးပြုခဲ့သည်။
အော်ရက်ရှ်နစ်ခ် ဟိုက်ပါဆိုးနစ်ဒုံးကျည်များသည် ထိပ်ဖူးအများအပြားသယ်ဆောင်၍ အကွာအဝေးမိုင်ပေါင်း ၃၄ဝဝ အထိ ပျံသန်းနိုင်သော တာလတ်ပစ် ဒုံးကျည်စနစ်ဖြစ်သည်။
ရိုက်တာ
