Adidas Sourcing Limited ၏ မြန်မာရုံးခွဲကို ဖျက်သိမ်း
ရန်ကုန်၊ ဇူလိုင် ၃၁
Adidas ရဲ့ ကုမ္ပဏီအုပ်စုဝင်ဖြစ်တဲ့ ဟောင်ကောင်အခြေစိုက် Adidas Sourcing Limited က မြန်မာနိုင်ငံမှာ လာရောက်ဖွင့်လှစ်ထားတဲ့ ရုံးခွဲကို ဖျက်သိမ်းမှာဖြစ်ကြောင်း ဇူလိုင်လ ၄ ရက်နေ့ထုတ် မြန်မာနိုင်ငံပြန်တမ်းမှာ ဖော်ပြထားပါတယ်။
မြန်မာနိုင်ငံကုမ္ပဏီများဥပဒေပုဒ်မ ၅၅ အရ မြန်မာရုံးခွဲကို စာရင်းရှင်းလင်းဖျက်သိမ်းမှာဖြစ်တာကြောင့် မြီရှင်တွေအနေနဲ့ သြဂုတ်လ ၄ ရက်နေ့အထိ နောက်မကျဘဲ ကုမ္ပဏီမှ ရရန်ရှိနဲ့ ပေးရန်ရှိတာတွေကို တရားဝင်စာရင်းရှင်းလင်းဖျက်သိမ်းရေးအရာရှိထံ အထောက်အထားခိုင်လုံစွာနဲ့ တင်ပြနိုင်ပါကြောင်း ကြေညာထားပါတယ်။
Adidas Sourcing Limited အနေနဲ့ ၎င်းရဲ့ မြန်မာရုံးခွဲကို ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA) မှာ ၂၀၁၄ ခုနှစ် ဇူလိုင်လ ၂၉ ရက်နေ့က မှတ်ပုံတင်ခဲ့ပါတယ်။
DICA ရဲ့ ဖော်ပြထားမှုအရ ပြည်ပကော်ပိုရေးရှင်းအမျိုးအစားဖြစ်ပြီး အဓိကစီးပွားရေးလုပ်ငန်းတွေအနေနဲ့ ရုံးချုပ်ရဲ့ လုပ်ငန်းတာဝန်များ၊ စီမံခန့်ခွဲအကြံပေးဆောင်ရွက်ခြင်း၊ ရုံးလုပ်ငန်းအုပ်ချုပ်ရေးနဲ့ ရုံးလုပ်ငန်းများ၊ အခြားစီးပွားရေးလုပ်ငန်းတွေကို ထောက်ပံ့ပေးတဲ့ လုပ်ငန်းတွေ ဆောင်ရွက်ဖို့ ဖြစ်ပါတယ်။
မြန်မာရုံးခွဲဖျက်သိမ်းလိုက်ခြင်းက စီမံအုပ်ချုပ်ရေးဆိုင်ရာ သဘောသဘာဝအရဖြစ်ပြီး မြန်မာနိုင်ငံမှာ ချုပ်လုပ်နေတဲ့ အထည်ချုပ်အမှာတွေနဲ့ သက်ဆိုင်ခြင်းမရှိကြောင်း Adidas ရဲ့ မီဒီယာဆက်ဆံရေးဒါရိုက်တာ Stefan Pursche က Myanmar Now ကို ပြောပါတယ်။
လက်ရှိမှာ မြန်မာ့အထည်ချုပ်ကဏ္ဍအနေနဲ့ ရှိရင်းစွဲ အပြည်ပြည်ဆိုင်ရာ ရောင်းသူ၊ ဝယ်သူချိတ်ဆက်ပေးတဲ့ ကွန်ယက်တွေက အခြားသောနိုင်ငံတွေနဲ့ နှိုင်းယှဉ်ရင် ကြီးထွားဖို့ လိုအပ်နေသေးတယ်လို့ မြန်မာနိုင်ငံ အထည်ချုပ်လုပ်ငန်းရှင်များအသင်းကနေ သိရပါတယ်။
လက်ရှိမှာ MGMA အသင်းဝင် စက်ရုံပေါင်း ၅၂၃ ရုံရှိတဲ့အနက် ၆၀ ရာခိုင်နှုန်းက ဥရောပဈေးကွက်၊ ၂၀ ရာခိုင်နှုန်းက ဂျပန်ဈေးကွက်နဲ့ ကျန် ၂၀ ရာခိုင်နှုန်းက အခြားဈေးကွက်တွေကို တင်ပို့နေတာပါ။
၂၀၂၄ ခုနှစ်အတွင်း မြန်မာ့အထည်ချုပ်ကဏ္ဍမှ ပို့ကုန်ဝင်ငွေ အမေရိကန်ဒေါ်လာ ၄.၄၆ ဘီလီယံရရှိခဲ့ပြီး ၂၀၂၃ ခုနှစ်ကထက် ဒေါ်လာ ၇၅၀ သန်းခန့် ဝင်ငွေရရှိမှု လျော့သွားတာကို မှတ်တမ်းတွေအရ သိရပါတယ်။
မြန်မာနိုင်ငံမှ အထည်ချုပ်တွေကို အမေရိကန်၊ အီးယူ၊ ဂျပန်၊ ကိုရီးယား အပါအဝင် နိုင်ငံပေါင်း ၈၀ ကျော်ကို တင်ပို့လျက်ရှိကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရပါတယ်။
