UFO မဟုတ်တဲ့ ဥက္ကာခဲ သို့ 3I /ATLAS
ပြီးခဲ့တဲ့ လပိုင်းအတွင်းက နေအဖွဲ့အစည်းပြင်ပ အာကာသ ကနေ နေအဖွဲ့အစည်း အတွင်းကို ဝင်ရောက်လာတဲ့ 3I/ATLAS လို့ နာမည်ပေးထားတဲ့ Comet တစ်ခုအကြောင်းကို ကျွန်တော်တို့ MASES မှာ ဖော်ပြခဲ့ပြီးပါပြီ။
အခုရက်ပိုင်းအတွင်းမှာ ဒီသတင်းကိုပဲ တစ်ချို့မီဒီယာတွေက ဒါဟာ Alien Ship တစ်မျိုးဖြစ်တယ်ဆိုပြီး Harvard က astrophysicist တစ်ယောက်ဖြစ်တဲ့ Avi Loeb ဆိုတဲ့ သူက ပြောလာတယ်ဆိုပြီး သတင်းတွေ ထွက်လာပါတယ်။
(Mizzima လို သတင်းဌာနတွေပါ ဖော်ပြလာတော့ သို့လောသို့လောတွေ ဖြစ်လာကြပြီး page မှာလာမေးကြပါတယ်။)
အတိုပြောရရင်တော့ ဒီ 3I/ATLAS လို့အမည်ပေးထားတဲ့ ဥက္ကာခဲက တကယ်တော့ ကြယ်တံခွန် (comet) တစ်ခုပါ။
ဒီသတင်းကိုစဖြန့်တဲ့ Avi Loeb က သူ့အရင် အရှေ့က Interstellar object တွေကိုလည်း Alien UFO တွေလို့ ပြောဖူးပါတယ်။
အထင်ရှားဆုံးကတော့ ၂၀၁၇ ခုနှစ်မှာ နေအဖွဲ့အစည်းထဲကို ဝင်ရောက်လာခဲ့တဲ့ 'Oumuamua' လို ဥက္ကာခဲ ကနေစပြီးအခုလို ဆက်တိုက်ပြောနေတာဖြစ်ပါတယ်။သူပြောနေတာ ပြောတာပဲရှိပြီး သက်သေမပြနိုင်ပါဘူး။Hypothesis သက်သက်သာဖြစ်ပါတယ်။
'Oumuamua' ဟာလည်း ပုံသဏ္ဌာန် ထူးခြားတာ၊ ကြယ်တံခွန် အမြီးမပါဘဲ အရှိန်ရွေ့လျားတာ စတဲ့အချက်တွေကြောင့်စစပိုင်းတုန်းကတော့ သိပ္ပံပညာရှင်တွေကို အံ့အားသင့်စေခဲ့ပါတယ်။
ဒါပေမယ့် နောက်ဆုံးမှာတော့
'Oumuamua' ဟာ သဘာဝအတိုင်း ဖြစ်ပေါ်နေတဲ့ ဥက္ကာပျံ (သို့မဟုတ်) ကြယ်တံခွန်တစ်မျိုးသာ ဖြစ်တယ်လို့ သိပ္ပံပညာရှင်အများစုက ကောက်ချက်ချခဲ့ကြပြီး Alien Ship မဟုတ်ဘူးဆိုတာကို အတည်ပြုခဲ့ပြီးပါပြီ။
ပါမောက္ခ Avi Loeb ကိုယ်တိုင်က Alien လို့ခေါ်တဲ့ ဂြိုဟ်သားရှိတယ်ဆိုတာကို အရမ်းယုံကြည်ပြီး အဲ့အတိုင်းဖြစ်စေချင်နေတဲ့သူတစ်ယောက် ဖြစ်ပါတယ်။
အရင်တုန်းက Pacific ocean ထဲမှာ alien tech တွေရှိတယ်ဆိုပြီး research အဖွဲ့တစ်ခုကိုဦးဆောင်ပြီးလုပ်ဖူးပါတယ် ဒါပေမယ့် သူပြောသလို နှစ်တော်တော်ကြာတဲ့ အထိ သက်သေ မတွေ့တာကြောင့် အဖွဲ့ပျက်သွားပါတယ် ။အခုတစ်ခါ တစ်စခန်းထလာတာမျိုးပါ။
ဒါကြောင့် သူ့ရဲ့အဆိုပြုချက်တွေဟာ လက်တွေ့သိပ္ပံအချက်အလက်တွေနဲ့ ကိုက်ညီမှုမရှိတာမျိုးတွေ ရှိနေပါတယ်။
နက္ခတ္တသိပ္ပံပညာရှင်အများစုကတော့ 3I/ATLAS ဟာ ကြယ်တာရာကြားကနေ ဝင်ရောက်လာတဲ့ သဘာဝဥက္ကာပျံ (natural comet) တစ်ခုအဖြစ်ပဲ သုံးသပ်ကြပါတယ်။ သူ့ရဲ့ ရွေ့လျားနှုန်းနဲ့ လမ်းကြောင်းဟာ ထူးခြားနေတယ်ဆိုပေမဲ့ comet တွေရဲ့သဘာဝ ကြောင့် ဖြစ်ရတာ ဖြစ်နိုင်ခြေပိုများပါတယ်။
ဥက္ကာပျံတွေမှာ ကာဗွန်ဒိုင်အောက်ဆိုဒ်၊ ကာဗွန်မိုနောက်ဆိုဒ်လို မတည်ငြိမ်တဲ့ ရေခဲတွေ ပါဝင်တာကြောင့်နေအနားနီးလာတဲ့အချိန်မှာ သူတို့ရဲ့ အမြန်နှုန်းပြောင်းလဲသွားတာမျိူး ဖြစ်နိုင်ချေရှိပါတယ်။
အခုလို နောက်ပြီးတော့ NASA နဲ့ တစ်ခြားspace agency တွေ ယုံကြည်ရတဲ့ သိပ္ပံပညာရှင်တွေက 3I/ATLAS ကို ဥက္ကာခဲတစ်ခုလို့ပဲ တစ်ညီတစ်ညာတည်း ကောက်ချက်ချထားပါတယ်။
ပြီးတော့ သူ့ကို နေ့တိုင်းစောင့်ကြည့်နေတဲ့ ပညာရှင်တွေအများကြီးရှိနေတာကြောင့် တစ်ခုခုထူးခြားတာနဲ့ ကျွန်တော်တို့သိရမှာပါ။
အခုခေတ် မီဒီယာလောကမှာ Clickbait လို့ခေါ်တဲ့ ခေါင်းစဉ်ကို စဖတ်လိုက်ချင်းမှာဖတ်ချင်အောင် ဆွဲဆောင်မှုရှိတဲ့ သတင်းတွေဟာ အရမ်းပေါများလာပါတယ်။
ဒီလိုသတင်းတွေဟာ လူတွေရဲ့ စိတ်ဝင်စားမှုကို ချက်ချင်းဆွဲဆောင်နိုင်ပေမဲ့ အချက်အလက်မှန်ကန်မှုမှာတော့ အရမ်းအားနည်းနိုင်ပါတယ်။
သိပ္ပံပညာရဲ့ အခြေခံမူတစ်ခုကတော့ "Falsifiable" (မှားကြောင်းပြသနိုင်ခြင်း) ဖြစ်ပါတယ်။ ဆိုလိုတာက သိပ္ပံနည်းကျ သီအိုရီတစ်ခုဟာ မှန်ကန်တယ်လို့ အတည်ပြုဖို့အတွက် စမ်းသပ်မှုတွေ၊ လေ့လာမှုတွေကနေတစ်ဆင့် မှားကြောင်းပြသလို့မရမှသာ အမှန်တရားအဖြစ်လက်ခံနိုင်တာမျိုးပါ။
လက်ရှိအချိန်အထိ 3I/ATLAS ကို Alien Ship လို့ သတ်မှတ်ဖို့ ခိုင်မာတဲ့ သိပ္ပံနည်းကျ အထောက်အထား ဘာတစ်ခုမှ မရှိသေးပါဘူး။ သိပ္ပံပညာရှင်အများစုက ဒါဟာ သဘာဝအတိုင်းဖြစ်တည်နေပြီး နေအဖွဲ့အစည်းတွင်းကိုဝင်လာနေတဲ့ ကြယ်တံခွန်တစ်လုံးပဲလို့ အတည်ပြုထားပါတယ်။