ဟတ်ယိုင်ကြက်ကြော်
ဟတ်ယိုင်ကြက်ကြော်အတွက် မုန့်နှစ်နယ်နည်းကို သင်ကိုယ်တိုင်လဲ လုပ်နိုင်ပါတယ်။
ပြုလုပ်ပုံအဆင့်ဆင့်ကတော့ အောက်ပါအတိုင်းပါပဲ 👇
ပါဝင်ပစ္စည်းများ ပြင်ဆင်ခြင်း......
၁။ ပါဝင်ပစ္စည်းများအားလုံးကို ညက်အောင် ထောင်းပါ။
* နံနံပင်အမြစ် ၃ မြစ်
* တရုတ်ကြက်သွန်ဖြူ ၁၀ မြွှာ
* ဇီယာမှုန့် လက်ဖက်ရည်ဇွန်း ၁/၂ ဇွန်း
* နံနံစေ့ လက်ဖက်ရည်ဇွန်း ၁/၂ ဇွန်း
* ငရုတ်ကောင်းစေ့ (အဖြူ) လက်ဖက်ရည်ဇွန်း ၂ ဇွန်း
၂။ ပန်းကန်လုံးတစ်လုံးထဲ ထည့်ပြီး ရောစပ်ပါ။
* ဆား လက်ဖက်ရည်ဇွန်း ၁ ဇွန်း
* ပဲငံပြာရည်အကြည် စားပွဲဇွန်း ၃ ဇွန်း
* ကြက်သားမှုန့် လက်ဖက်ရည်ဇွန်း ၂ ဇွန်း
* ရေအေး စားပွဲဇွန်း ၆ ဇွန်း
* အကြော်မှုန့် စားပွဲဇွန်း ၅ ဇွန်း
* အချိုမှုန့် လက်ဖက်ရည်ဇွန်း ၁/၂ ဇွန်း
* ပြီးရင် အားလုံးကို သမအောင် ရောမွှေပါ။
ကြက်သားနယ်ခြင်းနှင့် ကြော်ခြင်း..........
၃။ ကြက်သား ၁.၅ - ၂ ကီလိုဂရမ်ကို ထည့်၍ နယ်ပါ။
ကြက်သားတုံးကြီးတွေဆိုလျှင် အရိုးဘေးနဲ့ အသားနေရာတွေကို ဓားနဲ့ အပေါက်လေးတွေ ဖောက်ပေး/ထိုးပေးပါ၊ ဒါမှ အသားတွေ ညီညာစွာ ကျက်လွယ်ပါလိမ့်မယ်။
ကြက်သားနဲ့ ပါဝင်ပစ္စည်းတွေကို သမအောင် နယ်ပြီး ရေခဲသေတ္တာထဲမှာ ၁ နာရီမှ ၂ နာရီအထိ နှပ်ထားပါ။
(နှပ်နေစဉ်အတွင်းမှာ ကြက်သွန်နီလှီးပြီး ဆားနဲ့ အကြော်မှုန့် အနည်းငယ်ထည့်ပြီး သမအောင် ရောမွှေပါ။
ရွှေညိုရောင်သန်းပြီး ကြွပ်လာတဲ့အထိ ကြော်ပြီး ဖယ်ထားပါ။)
၄။ ကြက်သားနှပ်ပြီးသွားရင် ကြက်သားမှာ အပေါ်ယံကြွပ်ကြွပ်လေးကပ်နေတာ လိုချင်တယ်ဆိုရင် အကြော်မှုန့် စားပွဲဇွန်း ၈ ဇွန်း ထပ်ထည့်ပြီး ကြက်သားပေါ်မှာ ကပ်အောင် နယ်ပေးပါ။
၅။ ဆီပူလာတဲ့အထိ စောင့်ပြီး မီးအလယ်အလတ်နဲ့ ကြော်ပါ။ ကြက်သားကို ရွှေညိုရောင်သန်းပြီး ကြွပ်လာတဲ့အထိ ကြော်ပါ။ ကြက်သားကို ဆယ်ခါနီး ၁ မိနစ်လောက် မီးပြင်းပြင်းနဲ့ ကြော်ပေးပါ ဒါမှ ဆီကို စစ်ထုတ်ပေးပါလိမ့်မယ်။
၆။ ဆီစစ်သွားအောင် ခဏထားပြီး စားသုံးနိုင်ပါပြီ။
